11
1 Řmizan aɣeccac d nnɛi i SIDI,
maca aẓru n řewzen nican
ittaf arḍa nnes.
2 Mařa tusa-dd nnfaxet,
tusa-dd uřa d řefḍiḥet,
maca ɣar imwaḍɛen teǧa tiɣit.
3 Řeṣfayet n inni igguren nican
tneddeh i-ten,
maca taḥraymect n iɣeddaren
taředdeǧ i-ten.
4 Agřa war ineffeɛ
ɣar wass n uduqqez n ufugem,
maca tasegda tᵉttfekka zi řmewt.
5 Tasegda n wenni igguren nican
ittarra abrid nnes nican,
maca aɛeffan iweṭṭa s tuɛeffna nnes.
6 Tasegda n inni igguren nican
ad ten tfekk,
maca iɣeddaren ad ttwacarfen
deg umeẓri nsen.
7 Mařa immut bnadem aɛeffan,
ifna řayas nnes,
uřa d min ttrajan
yeryazen daysen teryast ad ifna.
8 Amsegged ad dd-ittwafekk
zi řeḥṣaret,
uca xenni aɛeffan ad dd-yas
deg wemcan nnes.
9 Amnafeq ittareddeǧ jjar nnes
s uqemmum nnes,
maca imseggaden
ad ttwafekken s tussna.
10 Tandint tᵉttesřiwřiw
mařa imseggaden aqa aten mliḥ,
u mařa ttwahellken iɛeffanen,
aqa din asřiwřew.
11 Tᵉttwassgeɛɛed tendint
s lbaraka n inni igguren nican,
maca s uqemmum n iɛeffanen
ad tᵉttwahdem.
12 Wenni war ɣar iǧi ca wuř imten,
isseḥqara jjar nnes,
maca aryaz wenni ɣar iǧa řefhamet
ittesqar.
13 Wenni igguren da d diha s texbarjit,
ittɛarra min innuffaren,
maca wenni i di iǧa arruḥ
dayes řaman, aqa issnuffara tamesřact.
14 Mařa war din adebbar, iweṭṭa řgens,
maca ad yiři usenjem s řemɣaret n umcawar.
15 Wenni iḍemmnen řbarrani,
war dd as tᵉtteffeɣ ca mliḥ,
maca wenni icarrhen
inni itteggen ticti x ufus,
aqa-t di řaman.
16 Tamɣart tᵉttaf arḍa, tᵉṭṭef
di řɛezz nnes,
maca ayt n bu-řexcunet
ttᵉṭṭfen deg wagřa.
17 Bnadem s tmexsiwt icewwaren
ittegg řxar i řeɛmar nnes,
maca aqessaḥ ittɣezza
aysum n yixef nnes.
18 Aɛeffan imejjar řɣiǧet n řɣecc,
maca wenni izarrɛen tasegda,
imejjar ict n řmunet imetnen.
19 Tasegda nican tᵉttawi ɣar tudart,
wenni yareddfen řɣar,
yarezzu řmewt nnes.
20 Inni ɣarsen uř ifarɣen
aqa aten d nnɛi i SIDI,
maca inni igguren nican
Netta yareṭṭa daysen.
21 S tidett, aɛeffan war ittɣimi břa řexřaṣ,
maca tarwa n imseggaden
ad ttwassnejmen.
22 Amecnaw ict n txadent n wureɣ
di tinzar n yiřef,
ammu i teǧa ict n temɣart tecna
war di iǧa umeyyez.
23 Meẓri n imseggaden
mɣir ɣar min iṣebḥen,
maca řayas n iɛeffanen
aqa-t nhřa řeɛbar.
24 Aqa din ijjen wenni ibeṭṭan s wecrim,
waxxa amenni ittwarni as ɛad ktar,
u aqa din ijjen wenni imennɛen ktar
x min icuwwaren,
waxxa man aya ineddeh ɣar zzeřḍ.
25 Řeɛmar nni ittbarken ad ittwassjiwen,
u wenni itticen aman,
ad as immewc waman
i netta simant nnes.
26 Wenni ittxemmařen imendi,
ineɛɛeř i-t cceɛb,
maca lbaraka ad tiři
x uzeǧif n wenni iznuzan imendi.
27 Wenni ittceṭṭaren di ṭṭweɛ n
min iṣebḥen,
yarezzu min yarḍan,
maca wenni ittḥaman řɣar, ad t iřqef.
28 Wenni ittcařen x wagřa nnes, ad iwḍa,
maca imseggaden ttneɛniɛen
am ifetwan izizawen.
29 Wenni ihekkwřen aytbab n taddart nnes,
ad iwart asemmiḍ,
u abuhaři ad yiři d amsexxar
n wenni di iǧa wuř amiɣis.
30 Řɣiǧet n umseggad
d ict n tcejjart n tudart,
wenni yarebbḥen řeɛmur aqa-t d amiɣis.
31 Xzar, aqa ad ittwaxeǧeṣ
umsegged di temmurt,
xenni mahu aɛeffan d umednub.