4
Awař d useǧem aneggaru
1 S uya, a aytma iɛizzen d iɣřan, aqa kenniw d řefraḥet inu d ttaj inu, beddem xenni ammu nican di Siditneɣ, a imɛizzen inu!
2 Necc ttzawageɣ zeg Uwudiya d Sintici, maḥend ad imun array nsent di Siditneɣ.
3 Ttzawageɣ ɛawed zzayek, a amɛacar amtiqqi inu, maḥend ad tewced afus i tinni i ixeddmen akidi x ssibbet n tbarreḥt n L’Injil, uřa ak-d Klimins d imsexxaren inu nneɣni, inni ismawen nsen yuran deg Wedlis ittwanḍen n Tudart.
4 Farḥem řebda di Siditneɣ, necc qqareɣ ɛawed: Farḥem!
5 Ad yiři uwaḍeɛ nwem ittwassen ɣar iwdan marra. Siditneɣ aqa yudes.
6 War kessim ca s wemnus x walu, maca ad yiři marra min tᵉttarem řebda ittwassen ɣar AREBBI s tẓaǧit d tkessit n řmeɛruf ak-d uqadi.
7 Uca řehna n AREBBI i iɛdun marra řefhamet ad iḥḍa uřawen d ixarriṣen nwem di Yasuɛ Lmasiḥ.
8 Ɣar uneggar, a aytma, marra min iǧan d tidett, marra min iqquren, marra min iseggden, marra min izdigen, marra min iɛizzen, marra min ɣar iǧa řḥess aṣebḥan, u marra min ɣa isdaheǧen ccan d usemɣar, xarṣem dayes.
9 Min teɣrim u tqebřem, min tesřim u teẓrim zzayi, ggem t, uca AREBBI n řehna ad kiwem yiři!
10 Aqa farḥeɣ aṭṭas di Siditneɣ umi daywem iǧa wemnus maḥend ad ayi tᵉthillam, am mammec daywem t tuɣa qbeř, maca war d as tufim mammec ad teggem.
11 War tt nniɣ, minzi necc ḥwajeɣ ca, minzi řemdeɣ ad qenɛeɣ mammec ma dd-tusa.
12 Necc aqa ssneɣ umi qqaren ddeǧ, uca aqa ssneɣ umi qqaren afeyyeḍ. Mani ma u di marra aqa řemdeɣ, am di tyawant, am di řaẓ am deg ufeyyeḍ uřa di řeɣben.
13 Qeddeɣ qaɛ zi Lmasiḥ wenni d ayi iwcin jjehd.
14 Waxxa amenni mliḥ řami d ayi tewcim afus di řemḥayem inu.
15 Tessnem ɛawed simant nwem, a Ifilippiyyen, belli ɣar umezwaru n tbarreḥt n Řexbar Aṣebḥan, umi dd-ffɣeɣ zi Makiduniya, uřa d ict n tmesmunt war teggi akidi řeḥsab x min wcin d min ksin, mɣir tenni nwem waha.
16 Minzi ɛawed di Tissalunika tᵉssekkem ayi-dd min d ayi ittxeṣṣan, ijj n umur u ijj n umur nneɣni.
17 War arezzuɣ ad dayi tewcem ca, maca arezzuɣ ad twesseɛ řɣiǧet nwem.
18 Necc ṭṭfeɣ kuřci u ɣari kuřci s zzyada, aqa jjiwneɣ. Necc ksiɣ marra min d ayi dd-tᵉssekkem s ufus n Ipafruditus: ict n řefwaḥet ittfuḥen d ict n tɣarṣt yarḍan qibač i AREBBI.
19 Maca AREBBI inu ad issyiwen marra min teḥdajem ɛlaḥsab agřa nnes deg uɛuǧi i iǧan n Yasuɛ Lmasiḥ.
20 Aqa i AREBBI, Babatneɣ, ad ɣares yiři uɛuǧi d ccan i řebda qaɛ. Amin.
21 Seǧmem x kuř imqeddasen di Yasuɛ Lmasiḥ s řehna.
Awmaten inni akidi, ttseǧamen xawem s řehna.
22 Aqa marra imqeddasen ttseǧamen xawem s řehna, amezwaru inni iǧan zi taddart n qayṣar.
23 Arḍa n Siditneɣ Yasuɛ Lmasiḥ ad yiři akidwem marra. Amin.