Filimun
1
Aseǧem ɣar umezwaru d tẓaǧit n uqadi
1 Bulus, ameḥbus n Yasuɛ Lmasiḥ, d tawmat Timutiyu, i Filimun iɛizzen wenni d amsexxar akidneɣ,
2 i učmatneɣ Apfiya iɛizzen, i Arxippus, wenni d amsexxar akidneɣ, u i tmesmunt di taddart nnec:
3 arḍa d řehna ad kidwem iřin zi AREBBI, Babatneɣ, u zi Siditneɣ Yasuɛ Lmasiḥ.
4 Necc ttqadiɣ AREBBI inu řebda u ttfekkareɣ dayek di tẓaǧitin inu,
5 xzar, ɛad zeg wami necc sřiɣ x l’iman d tayri nnec i dayek iǧan zi jjihet n Siditneɣ Yasuɛ u zi jjihet n marra imqeddasen,
6 ḥima ad din yiři ijj n uqarri yuǧɣen n l’iman nnec ař ɣa tawyed řɣiǧet di řexdayem u di tussna n marra řxar i ɣarwem di Yasuɛ Lmasiḥ.
7 Maɣar neccin aqa ɣarneɣ řefraḥet tameqqrant d ufewwej, minzi zi ssibbet n tayri nnec ttwassareyyḥen uřawen n imqeddasen.
Bulus ittceffeɛ di tmesřact n Unisimus
8 S uyenni, waxxa necc ɣari taryast aṭṭas di Lmasiḥ ḥima ad cek umureɣ min icuwwaren,
9 aqa necc ɣari ḥsen, di ssibbet n tayri, ad zzayek ttareɣ. Necc Bulus, aqa ayi d awessar am mammec tessned, uca řexxu ɛawed d ameḥbus n Yasuɛ Lmasiḥ,
10 necc ɣari ict n tutra zi jjihet n mmi Unisimus, wenni dd-jjiɣ di ssnaseř da di řeḥbes.
11 Netta tuɣa war cek ineffeɛ zic, maca řexxu aqa ineffeɛ cek d nnec aṭṭas.
12 Necc aqa arriɣ ac t-i-dd ɣarek, maca qbeř i-t am mmi.
13 Maɣar necc mři ufiɣ iři aqa jjiɣ t danita akidi maḥend ad xafi isexxar deg wemcan nnec min da ɣa kkeɣ di ssnaseř x ssibbet n L’Injil.
14 Maca necc war xseɣ ca ad ggeɣ walu břa ma i ɣa mcawareɣ akidek, ḥima tcuni i teggid war tᵉttiři s uɣiř, maca s řxaḍar.
15 Minzi nican tuɣa immsebḍa xak i drus n řweqt, ḥima ad ɣarek yiři ɛawed i řebda,
16 zi ssa d tsawent war iǧi ɛad am umsexxar, maca am yijjen i iǧan ktar zeg umsexxar, am wuma iɛizzen, i necc beɛda, mahu i cek, am di ddat am di Siditneɣ!
17 Mařa teǧid d amɛacar akidi di l’iman, qebř i-t am wenni nnec.
18 Mařa netta tuɣa iḍḍarri cek niɣ zeɛma dayes amarwas, egg i-t xafi!
19 Necc, Bulus, uriɣ s ufus inu, aqa ad t xeǧṣeɣ! Maḥend war qqareɣ ca, aqa uřa d cek tᵉttursed ayi ixef nnec.
20 Wah, a tawmat inu, aqa ttwassareyyḥeɣ zzayek di Siditneɣ, sareyyeḥ tayri inu di Lmasiḥ.
Awař ɣar uneggaru d useǧem
21 Necc ttiqqeɣ ad ayi tesřid. Uriɣ ac-dd, uca ssneɣ aqa cek ad tegged mahu min d ac iniɣ.
22 Sewjed ayi amcan mani ɣa ssenseɣ, minzi ssitimeɣ ad ɣarwem dd-arezfeɣ s tẓaǧit nwem.
23 Ipafras, wenni akidi da di řeḥbes di Yasuɛ Lmasiḥ, aqa iseǧem xak s řehna,
24 uřa d Markus d Aristarxus d Dimas d Luka inni d ayi itticen afus.
25 Arḍa n Siditneɣ Yasuɛ Lmasiḥ ad yiři ak-d buḥbeř nwem. Amin!