1 Buṭrus
1
Arreḥmet n Arebbi d tuyurt nneɣ s tqeddast
1 Buṭrus, rrasul n Yasuɛ Lmasiḥ, i yinni ittwafarzen d imeɛzab, inni ittwaẓeǧɛen di Punṭus, Galaṭiya, Kappadukiya, Asiya d Bitiniya,
2 inni ittwafarzen ɛlaḥsab tussna i iǧan ɣar AREBBI, Babatneɣ, qbeř, s tuqeddsi n Arruḥ, i ṭṭaɛet u i urucci s Idammen n Yasuɛ Lmasiḥ: arḍa d řehna ad daywem immarni.
3 Lbaraka i AREBBI, Babas n Siditneɣ Yasuɛ Lmasiḥ, wenni d aneɣ dd-yejjin zi jdid s arreḥmet nnes tameqqrant s tnukra n Yasuɛ Lmasiḥ, maḥend ad tiřim d asitem iddaren,
4 maḥend ad ɣarwem tiři ict n řwart war tfenni, war tᵉttwabeqqeḍ, war tᵉttesřiw, wenni i d awem ittwasswejden deg ijenwan,
5 am tᵉttwaḥḍam kenniw s jjehd n AREBBI u s l’iman i Tudart i iwejden ḥima ad tᵉttwasseḍhar di řweqt taneggarut.
6 Dayes i ɣa tfarḥem i řebda, waxxa tḥeznem di řweqt-a drus zi ssibbet n ɛřam kuř ijarriben i xawem dd-ittekken,
7 ḥima taqeǧebt n l’iman nwem, tenni tiɣřa x wureɣ iqquren wenni ittwassiṣfen zi tmessi, ad tiři i usemɣar d ccan d uɛuǧi x minni dd-ɣa iḍhar Yasuɛ Lmasiḥ,
8 wenni war t teẓrim, waxxa tᵉttexsem t. S l’iman zzayes tfarrḥem kenniw s ict n řefraḥet iɛuǧen war izemmar ad zzayes inṭeq iřes,
9 maɣar ad tᵉṭṭfem řmunet n l’iman nwem, aqa-tt d Tudart n buḥbeř nwem.
10 Tudart-a tuɣa arezzun xas inabiyyen, inni tuɣa ittnabben x arḍa i d awem dd-ikkaren,
11 umi tuɣa arezzun man řweqt i d asen isscen Arruḥ n Lmasiḥ i daysen izeddɣen, u man řweqt i xef tuɣa icehhed, aqa ad dd-yas uweddeb i ɣa ikken x Lmasiḥ uřa d aɛuǧi nnes awarni man aya.
12 Aqa ittwassargeb asen, aqa marra min xef tuɣa arezzun, aqa war t arzun di tizi nsen, maca tuɣa ttnabben di tizi nneɣ u zi ssibbet nneɣ x tmesřayin i d awem ittwasssargben řexxu zeg yinni i d awem ibeccaren s Řexbar Aṣebḥan s Arruḥ Iqeddsen nni dd-ittwasssekken zeg ujenna, timesřayin i di ttmeẓẓrent uřa d lmalakat ad daysent xzarent.
13 S uyenni ḥezmem řxansra n řeɛqeř nwem, iřim tᵉttfaqem nican, uca smunem marra asitem nwem di řefraḥet i d awem ɣa yawḍen xmi dd ɣa iḍhar Siditneɣ Yasuɛ Lmasiḥ.
14 Iřim am tarwa ittᵉṭṭaɛen, war dd-tdekkwiřem tcarrcem di nnecwat nwem tinni tuɣa teḍfarem qbeř s nnecwet, umi tuɣa kenniw ɛad d iqubbaniyyen.
15 Maca řexxu iřim d imqeddasen di marra min tᵉtteggem, am mammec Netta wenni xawem dd-iřaɣan, aqa-t d amqeddas,
16 minzi tura:
“Iřim d imqeddasen, minzi uřa d Necc d Amqeddas!”
17 U mařa tᵉttřaɣam i Tababat, wenni war itteggen s wudmawen, d wenni iḥekkmen kuř ijjen ɛlaḥsab řexdayem nnes, xenni uyurem s tiggʷudi di řweqt-a umi kenniw ɛad d imeɛzab di ddunect-a.
18 Maɣar tessnem belli kenniw war tᵉttwafdim s nnuqart d wureɣ ifennan zi řexdayem nwem ibeḍřen tinni tᵉṭṭfem kenniw zi řejdud nwem,
19 maca s Idammen iɣřan n Izmar war dayes bu řɛib, war ibeqqḍen, aqa-t d Lmasiḥ.
20 Netta tuɣa ittwafarz i man aya qbeř ma ad ittwagg dsas n ddunect, uca ittwasseḍhar awem-dd řexxu di zzmanat ineggura n řweqt di ṭṭweɛ nwem,
21 i kenniw inni zzayes ittamnen di AREBBI, wenni t-i-dd-issnekkaren zi taddart n imettinen uca iwca as aɛuǧi, ḥima l’iman d usitem nwem ad iřin x AREBBI.
22 D man aya ḥima ad ttwaqeddsen řeɛmur nwem s ṭṭaɛet i tidett, ad ttwaɛemmaren s tayri břa řfarz n bnadem, uca ad texsem ayawya s wuř izdig ikmeř,
23 am iwdan i dd-ittwaxeřqen d jdid, war iǧi zi zzariɛet ifennan, maca zi tenni war ifennin, aqa zeg Wawař iddaren n AREBBI i ittduman i řebda.
24 “Minzi marra ddat am arbiɛ
uca marra aẓri nnes
am tawardect deg yeyyar s arbiɛ,
Arbiɛ ad isřaw, tawardect ad tewḍa,
25 maca Awař n AREBBI nneɣ
ittɣima i řebda qaɛ.”
Awař-a netta d Řexbar Aṣebḥan wenni d awem dd-ittwabarrḥen.