36
Tasɣart n řwart i yessis n Ṣalufḥad
1 Zi řaǧat n iḥenjiren n Yusuf qarrben-dd izeǧifen jar ibabaten n řaǧ n iḥenjiren n Jilɛad, mmis n Makir, mmis n Manassa uca nitni ssiwřen zzat i wudem n Musa u zzat i wudem n řḥukkam, izeǧifen nneɣni x ibabaten n řaǧat n ayt n Israil
2 uca nitni nnan: “SIDI yumur sidi inu maḥend ad iwc tammurt s tqedduḥt i ayt n Israil d řwart. Uca yumur SIDI i sidi inu ad iwc tasɣart n řwart n umatneɣ Ṣalufḥad i yessis.
3 Mařa dewřent nitenti d tinemřač ak-d ijjen zeg iḥenjiren n tqebbař nneɣni n ayt n Israil, xenni ad tᵉttwakkes tesɣart nsent di řwart n řejdud nneɣ uca ad tᵉttwarni tasɣart nsent i tesɣart n teqbič i ɣar ɣa munent uca ammu ad ittwassemẓi min iǧan d tasɣart nneɣ s tqedduḥt.
4 Xmi dd ɣa yas useggʷas n usřiwřew i ayt n Israil, xenni ad tᵉttwamarni tesɣart nsent i tesɣart n teqbič ak-d wi ɣa munent. Ammu i ɣa tᵉttwakkes xenni tesɣart nsent di řwart n teqbič n řejdud nneɣ.”
5 Xenni yumur Musa i ayt n Israil ɛlaḥsab řumur n SIDI, inna: “Aqa d tidett am mammec tessiweř teqbič n ayt n Yusuf.
6 Wa d awař i zi yumur SIDI x yessis n Ṣalufḥad, iqqar: ‘Ejj i-tent ad meřcent ak-d wenni d asent yarecqen. Ittxeṣṣa mɣir ad meřcent di řaǧ n teqbič n babatsent.
7 War iɛeddeř ad traḥ tesɣart n ayt n Israil zi teqbič ɣar teqbič nneɣni, minzi kuř aryaz n ayt n Israil ad iqqim iṭṭef di tesɣart n teqbič n řejdud nnes.
8 Yeǧis n kuř ijj i ɣa iṭṭfen ict n tesɣart zeg ayt n Israil, ittxeṣṣa as ad temřec ak-d ijj zeg ijj n řaǧ zi teqbič n babas, ḥima kuř ijj zeg ayt n Israil ad iwart tasɣart n řejdud nnes.
9 War iɛeddeř ad traḥ tesɣart n ict n teqbič ɣar teqbič nneɣni, minzi ittxeṣṣa i kuř ict zi tqebbař n ayt n Israil ad iqqim iṭṭef di tesɣart nnes.’ ”
10 Yessis n Ṣalufḥad ggint am mammec t yumur SIDI i Musa.
11 Maḥla, Tirṣa, Ḥujla, Milka d Nuɛa, yessis n Ṣalufḥad, dewřent d tinemřač ak-d iḥenjiren n ɛemmitsent.
12 Dewřent d tinemřač di řaǧat n ayt n Manassa, mmis n Yusuf. Ammu i teqqim tesɣart nsent di teqbič n babatsent.
13 Tina d tiweṣṣa d lfarayiḍ nni yumur SIDI s tsexxart n Musa i ayt n Israil di řewḍat n Mu’ab, ɣar L’Urdun arendad n Ariḥa.