3
Ayt n Harun
1 Aqa ina d tarwa n Harun d Musa deg wussan nni issiweř SIDI ak-d Musa x wedrar n Sina.
2 Aqa ina d ismawen n warraw n Harun: Nadab d amenzu, xenni Abihu, Aliɛazar d Itamar.
3 Aqa ina d ismawen n warraw n Harun, ikehhanen inni ittwadehnen u inni ittwařeqqmen am yikehhanen.
4 Maca Nadab d Abihu mmuten zzat i wudem n SIDI, umi qeddmen timessi tařɣibt zzat i wudem n SIDI di řexřa n Sina. War tuɣi ɣarsen arraw. S uya tuɣa Aliɛazar d Itamar sexxaren am ukehhan zzat i wudem n babatsen Harun.
Tasexxart n ayt n Lawi
5 Issiweř SIDI ak-d Musa, inna:
6 “Sqarreb-dd taqbič n Lawi uca egg i-ten zzat i wudem n ukehhan Harun, ḥima ad xas sexxaren.
7 Ejj i-ten ad řhan tasexxart nnes d tsexxart n marra tamesmunt zzat i Uqiḍun n Umsagar, maḥend ad kemmřen řxedmet n Tzeddiɣt.
8 Ad ḥḍan x marra řeqcuɛ n Uqiḍun n Umsagar uca ad ṭṭfen aḥeṭṭu n ayt n Israil maḥend ad sexxaren di tsexxart n Tzeddiɣt.
9 Cek ad tewced Ilawiyyen i Harun u i warrawen nnes. Aqa d yina i d as immewcen i netta waha zeg ayt n Israil.
10 Ad třeqqmed Harun d warraw nnes maḥend ad ḥḍan x tukehhant. Abarrani nni i dd ɣa iqarrben ad ittwaneɣ.”
11 Issiweř SIDI ak-d Musa, inna:
12 “Xzar, Necc ksiɣ Ilawiyyen zi řwesṭ n ayt n Israil deg wemcan n imenza, marra inni yarezmen řemřawet d amezwaru jar ayt n Israil. Ilawiyyen ad iřin inu,
13 minzi kuř amenzu aqa inu. Deg wass min di wtiɣ marra imenza di temmurt n Miṣra, aqa ssqeddseɣ i Yixef inu marra imenza di Israil, zi bnadem ař řmař. Nitni ad iřin inu, Necc d SIDI!”
Řqedd n Ilawiyyen
14 Issiweř SIDI ak-d Musa di řexřa n Sina, inna:
15 “Ḥseb ayt n Lawi, am ttwasettfen nitni ɛlaḥsab tudrin n ibabaten nsen, ɛlaḥsab řaǧat nsen. Marra iwetman nni iǧan d ijj n uyur sennej, ad ten teḥseb.”
16 Uca Musa iḥseb i-ten x řumur n SIDI, am mammec d as iweṣṣa.
17 Tuɣa ina d ayt n Lawi ak-d ismawen nsen: Jarcun, d Qahat d Marari.
18 Tuɣa ina d ismawen n ayt n Jarcun, ɛlaḥsab řaǧat nsen: Libni d Cimɛi.
19 Ayt n Qahat, ɛlaḥsab řaǧat nsen: Ɛamram d Yiṣhar d Ḥabrun d Ɛuzziyil.
20 Ayt n Marari, ɛlaḥsab řaǧat nsen: Maḥli d Muci. Tuɣa ina d řaǧat n Ilawiyyen, ttwasettfen ɛlaḥsab tudrin n ibabaten nsen.
21 Ɣar Jarcun tuɣa teǧa řaǧ n Ilibniyyen d řaǧ n Icimɛiyyen. Tuɣa tina d řaǧat n Ijarcuniyyen.
22 Řqedd n yinni zzaysen ittwaḥesben, n marra iwetman zeg ijj n uyur sennej, aqa řqedd nni n yinni zzaysen ittwaḥesben tuɣa di sebɛa-ařaf u-xemsa-mya.
23 Wtint řaǧat n Ijarcuniyyen iqiḍan nsen ɣar ḍeffar n Tzeddiɣt, ɣar řɣarb.
24 Tuɣa Ilyasaf, mmis n Layil, d řḥakem n taddart n babatsen n Ijarcuniyyen.
25 Zi jjihet n Uqiḍun n Umsagar ḥḍan ayt n Jarcun x Tzeddiɣt, x Uqiḍun ak-d tseqqafin nnes, x warwaq ɣar wadaf n Uqiḍun n Umsagar,
26 x řizarat n řemraḥ d warwaq ɣar wadaf n řemraḥ i zi tᵉttwanneḍ Tzeddiɣt d uɛalṭar, u x ifiřan nnes, uřa x marra min dd-ittasen ak-d tsexxart nni.
27 Zi Qahat tuɣa iqqarṣ-dd řaǧ n Iɛamramiyyen d řaǧ n Iṣhariyyen d řaǧ n Iḥibruniyyen d řaǧ n Iɛaziyiliyyen. Tuɣa tina d řaǧat n Iqahatiyyen.
28 Tuɣa řqedd n marra iwetman zeg ijj n uyur sennej temn-ařaf u-setta-mya. Nitni ḥḍan x Zzawect Iqeddsen.
29 Wtint řaǧat n ayt n Qahat iqiḍan nsen ɣar uɣezdis n Tzeddiɣt, ɣar ljanub.
30 Iliṣafan, mmis n Ɛuzziyil, tuɣa d řḥakem n taddart n babatsen n řaǧat n Iquhatiyyen.
31 Nitni tuɣa ḥeṭṭan x Ttabut d tzewḍa d řqendiř d iɛalṭaren u x řeqcuɛ n Zzawect Iqeddsen i ssxedmen u x uřeḥḥaf, wah, x marra i dd-ittasen ak-d tsexxart nni.
32 Tuɣa Aliɛazar, mmis n ukehhan Harun, d řḥakem amezwaru qaɛ x marra řḥukkam n Lawi. Netta iṭṭef acbar x yinni tuɣa iḥeṭṭan x Zzawect Iqeddsen.
33 Zi Marari tuɣa iqqarṣ řaǧ n Imaḥliyyen d řaǧ n Imuciyyen. Tuɣa tina d řaǧat n Marari.
34 Tuɣa řqedd n yinni zzaysen ittwaḥesben, n marra iwetman zeg ijj n uyur sennej, di setta-ařaf u-mitayn.
35 Tuɣa Suriyil, mmis n Abixayil, d řḥakem n taddart n babatsen n řaǧat n Marari. Nitni wtin iqiḍan nsen ɣar uɣezdis n Tzeddiɣt, ɣar ccamal.
36 Ayt n Marari tuɣa tᵉṭṭfen acbar maḥend ad wcen taynit i marra tifeřwin n Tzeddiɣt, i tḥenya n uɛarreḍ, i ipilaren nnes, i tyarsawin nnes u i marra řeqcuɛ nnes, wah. i marra min dd-ittasen ak-d tsexxart nni,
37 uřa i ipilaren nni dd-innḍen i řemraḥ ak-d tyarsawin nsen d řewtad nsen d ifiřan nsen.
38 Musa d Harun ak-d warraw nnes wtin iqiḍan nsen zzat i wudem n Tzeddiɣt, zzat i wudem n Uqiḍun n Umsagar, ɣar ccarq manis dd-tneqqar tfuct. Nitni ḥḍan x Zzawect Iqeddsen di ṭṭweɛ n ayt n Israil. Abarrani nni dd-iqarrben, tuɣa ittxeṣṣa ad ittwaneɣ.
39 Marra inni ittwaḥesben n Ilawiyyen, inni iḥseb Musa ak-d Harun ɛlaḥsab řumur n SIDI, am ttwasettfen nitni ɛlaḥsab řaǧat nsen, marra iwetman zeg ijj n uyur sennej, tuɣa aten di tnayen u-ɛicrin-ařef.
40 Inna SIDI i Musa: “Ḥseb marra imenza n iwetman n ayt n Israil, zeg ijj n uyur sennej, uca ksi řqedd n ismawen nsen.
41 Ad teksid Ilawiyyen i Necc - Necc d SIDI! - deg wemcan n marra imenza jar ayt n Israil uřa d řebhayem n Ilawiyyen deg wemcan n marra imenza jar řebhayem n ayt n Israil.”
42 Uca iḥseb Musa marra imenza jar ayt n Israil am mammec d as yumur SIDI.
43 Řqedd n ismawen n marra imenza iwetman n ijj n uyur sennej, n yinni zzaysen ittwaḥesben, tuɣa aten di tnayen u-ɛicrin-ařef u-mitayn u-třata u-sebɛin.
44 Issiweř SIDI ak-d Musa, inna:
45 “Ksi Ilawiyyen deg wemcan n marra imenza jar ayt n Israil uřa d řebhayem n Ilawiyyen deg wemcan n řebhayem nsen, minzi Ilawiyyen ad iřin inu. Aqa Necc d SIDI.
46 Zi jjihet n mitayen u-třata u-sebɛin, inni ittxeṣṣa ad ttwafdin, maɣar nitni qqimen sennej i Ilawiyyen n imenza n ayt n Israil,
47 ittxeṣṣa ad teksid xemsa ciqlu i kuř ijj n uzeǧif. Ad t teksid anect n ciqlu n Zzawect Iqeddsen. Ciqlu wanita aqa dayes ɛicrin jira.
48 Ad tewced nnuqart nni i Harun u i warraw nnes, aqa-tt i ttaman n ufekki n yinni iqqimen sennej i řqedd n Ilawiyyen.”
49 Xenni iksi Musa nnuqart n ttaman n ufekki n yinni iqqimen sennej n yinni ittwafdin s Ilawiyyen.
50 Uca iṭṭef nnuqart nni zeg imenza n ayt n Israil: ařef u-teřt-mya u-xemsa u-settin ciqlu, ɛlaḥsab ciqlu n Zzawect Iqeddsen.
51 U Musa iwca nnuqart n yinni iwcin ttaman n ufekki i Harun u i warraw nnes, ɛlaḥsab awař n uqemmum n SIDI, am mammec d as yumur SIDI i Musa.