25
Israil d l’aṣnam n yessis n Mu’ab
1 Izdeɣ Israil di Ciṭṭim uca ibda řgens ad issefsed ixef nnes ak-d yessis n Mu’ab.
2 Ɛarḍen-dd řgens ɣar tɣarṣi n irebbiten nsent uca řgens icca zzaysent, uca nitni bendqen i irebbiten nsent.
3 Ammu imun řgens ak-d Baɛl-Faɣur uca yarɣa weɣḍab n SIDI x Israil.
4 Inna SIDI i Musa: “Ksi marra iryazen nni iǧan d izeǧifen n řgens uca ayeř i-ten zzat i SIDI di tfuct iḥarren, xenni ad iggʷej řḥaduq n weɣḍab n SIDI x Israil.”
5 Xenni inna Musa i řquḍat n Israil: “Ejj kuř ijj ad ineɣ inni zi jar yeryazen nnes i imunen ak-d Baɛl-Faɣur!”
6 Uca xzar, ijj n weryaz zeg ayt n Israil yusa-dd uca netta yiwi-dd ict n temɣart Tmidiyanect ɣar aytmas zzat i tiṭṭawin n Musa u zzat i tiṭṭawin n marra tamesmunt n ayt n Israil, am ttrun nitni ɣar wadaf n Uqiḍun n Umsagar.
7 Iẓra i-t Finaḥas, mmis n Aliɛazar, mmis n Harun. Netta ikkar zi řwesṭ n tmesmunt, iksi ijj n uḥric deg ufus nnes
8 uca iruḥ awarni i weryaz zi Israil ɣar uqiḍun s řqubbet uca issnuqqeb i-ten s tnayen, am weryaz nni zi Israil, am temɣart s uɛeddis nnes. Xenni tbedd jjriḥect x ayt n Israil.
9 Uca mmuten di jjriḥect arebɛa u-ɛicrin-ařef n iwdan.
10 Issiweř SIDI ak-d Musa, inna:
11 “Fineḥas, mmis n Aliɛazar, mmis n Harun, akehhan, isseggwej asɛar inu x ayt n Israil, minzi netta tuɣa imḥeḍ aṭṭas di řwesṭ nsen di ṭṭweɛ n tusmi inu iqeddsen, ařami Necc war hdijeɣ ɛad ad teḥḥiɣ ayt n Israil di řweqt n tusmi inu iqeddsen.
12 S uya ini: ‘Xẓar, Necc ad as wceɣ Řɛahd inu n řehna.
13 I netta u i zzariɛet nnes awarni as ad ɣarsen yiři Řɛahd n tukehhant i řebda, minzi netta tuɣa imḥeḍ di ṭṭweɛ n AREBBI nnes uca igga aṣřaḥ di ṭṭweɛ n ayt n Israil.’ ”
14 Isem n weryaz n Israil nni inɣa Fineḥas, i tuɣa ittwaneɣ jmiɛ ak-d temɣart Tamidyanect, tuɣa-t d Zimri, mmis n Salu, ijj n řḥakem x taddart n babatsen, x Icimɛuniyyen.
15 Isem n temɣart Tamidyanict i tuɣa ittwanɣen tuɣa-tt Kuzbi, yeǧis n Ṣur, wenni d ijj n uzeǧif x tqebbařt n taddart n ijj n tbabat n Imidyaniyyen.
16 Issiweř SIDI ak-d Musa, inna:
17 “Ḥṣarem x Imidyaniyyen uca ɣellbem xasen,
18 minzi nitni ḥṣaren kenniw s teḥraymect nsen s minzi kenniw zeřɣen zi jjihet n Faɣur d Kuzbi, yeǧis n řḥakem n Midyan, učmatsen, tenni ittwanɣen deg wass n jjriḥect di ssibbet n Faɣur.”
19 Uca awarni i jjriḥect imsar min dd-igguren.