18
Řeḥmeř d řmunet n ikehhanen d Ilawiyyen
1 Inna SIDI i Harun:
“Cek d warraw nnec d taddart n babac akidek, ad tarbum řmuɛṣiyyet n Zzawect Iqeddsen nwem. Cek d warraw nnec akidek ad arbun řmuɛṣiyyet n tukehhant nwem.
2 Ad dd-tiwyed akidek uřa d aytmac, taqbič n Lawi, taqbič n babac. Nitni ad dd-mmarenyen ɣarek, ad ac sexxaren, maca cek, jmiɛ ak-d iḥenjiren nnec, ad tsexxared zzat i wudem n Uqiḍun n Cchadet.
3 Ad ṭṭfen acbar nnec uca ad ḥḍan x marra Aqiḍun, maca war zemmaren ad dd-qarrben ɣar řeqcuɛ n Zzawect Iqeddsen u ɣar uɛalṭar ḥima war ttᵉttmettin, war iǧi řa d nitni uřa d kenniw.
4 Ittxeṣṣa asen ad mmarenyen ɣarek uca ad ṭṭfen acbar x Uqiḍun n Umsagar u x marra tasexxart n Uqiḍun. Wenni war ɣar iǧi ttesriḥ war izemmar ad ɣarwem dd-iqarreb.
5 Ad tᵉṭṭfem acbar x Zzawect Iqeddsen uřa x uɛalṭar, ḥima war dd-ittis ɛad uduqqez n weɣḍab x ayt n Israil.
6 Necc, aqa da Necc, ksiɣ awmaten nwem, Ilawiyyen, zi jar řwesṭ n ayt n Israil. Aqa nitni am yict n tewhibt i kenniw tenni ittxeṣṣa ad twehhbem i SIDI maḥend ad sexxaren nitni deg Uqiḍun n Umsagar.
7 Maca cek d iḥenjiren nnec akidek ad tᵉṭṭfem tukehhant nwem di marra min iqqnen ak-d uɛalṭar d min iǧan daxeř i uřeḥḥaf uca ammu ad tsexxarem kenniw. Necc ad awem wceɣ tukehhant d tsexxart am yict n terzeft. Abarrani nni dd ɣa iqarrben, ad ittwaneɣ.”
8 Issiweř SIDI ak-d Harun:
“Necc, xzar, aqa d Necc i d ac iwcin aḥeṭṭu x tewhibin n usgeɛɛed i qeddmen nitni i Necc. Necc wciɣ tent ak-d marra tiwhibin iqeddsen n ayt n Israil am tesɣart i x ittwagg wedhan, i cek u i warraw nnec, am yict n tewṣeyyet i řebda.
9 Zi tewhibin iqeddsen ad iřint iziynat i war yudifen ɣar tmessi i cek: marra tiwhibin nsen ak-d marra tiwhibin nsen n řɣiǧet, ak-d marra tiɣarṣa nsen n ddenb u ak-d marra tiɣarṣa nsen n umarwas nni d ayi dd ɣa yarren am texriṣt. Man aya marra ad yiři d amqeddas qaɛ i cek u i iḥenjiren nnec.
10 Ad tecced aya deg ijj n wemcan iqeddsen qaɛ. Kuř awtem ad zzayes yecc. Aya ad yiři d amqeddas i kenniw.”
11 “Ɛawed d man aya ad yiři i cek: tawhibt n usgeɛɛed n tewhibt nsen ak-d marra tiwhibin n wenhezzi n ayt n Israil. Wciɣ tent i cek u i warrawen nnec d tarrawin nnec nni kidek iǧan. Aqa-tt d ict n tewṣeyyet i řebda. Kuř ijjen di taddart nnec nni iǧan d amezdag, ad zzaysent yecc.”
12 “Min iǧan řemxeyyar n zzect d min iǧan řemxeyyar n binu n jdid u zeg irden, aqa d tamezwarut i zzaysen ad wcen i SIDI, aqa wciɣ ac tt.
13 Tamenzut n marra min iǧan x temmurt nsen, nni dd ɣa yawyen ɣar SIDI, aqa marra man aya ad yiři i cek. Kuř ijjen wenni iǧan d amezdag di taddart nnec, izemmar ad zzayes yecc.”
14 “Marra min ittwaḥarrmen di Israil, ad yiři nnec.
15 Marra min yarezmen řemřawat d amezwaru jar marra aysum i ɣa qeddmen i SIDI, zi bnadem niɣ zi řebhimet, ad yiři nnec. Maca ad tefdid qaɛ amenzu n iwdan uca ittxeṣṣa ɛawed ad tefdid amenzu n řebhayem ixemjen.
16 Wi zzaysen ɣa ttwafdin nitni, ad ttwafdin d mmis n ijj n uyur ɛlaḥsab řqimet i tqeddared cek di nnuqart, xemsa ciqlu ɛlaḥsab ciqlu n Zzawect Iqeddsen, wenni iǧan ɛicrin jira.
17 Maca amenzu n ufunas d umenzu n uḥuři d umenzu n iɣayḍ, war t tfeddim ca. Aqa aten qeddsen i ǧan. Ad tzeǧɛed idammen nsen x uɛalṭar u tadunt nsen ad tt tessbexxared am tewhibt n tmessi, am yict n řefwaḥet ittfuḥen i SIDI.
18 Aysum nnes ad yiři nnec, am yidmaren n wenhezzi am ucekrud afusi ad iřin nnec.
19 Marra tiwhibin n usgeɛɛed zi tewhibin iqeddsen nni ɣa ssgeɛɛden ayt n Israil i SIDI, wciɣ tent i cek u i iḥenjiren nnec d tḥenjirin nnec inni akidek iǧan. Aqa d ict n tewṣeyyet i řebda, ad yiři d ijj n řɛahd s řemřaḥet i řebda zzat i wudem n SIDI, i cek u i zzariɛet nnec nni akidek iǧan.”
20 Inna SIDI i Harun:
“War tᵉttᵉṭṭfed řwart di temmurt nsen u war ɣarek tᵉttiři bu tesɣart di řwesṭ nsen. Necc d tasɣart nnec d řwart nnec di řwesṭ n ayt n Israil.
21 Xzar, Necc wciɣ i ayt n Lawi marra řeɛcur di Israil d řwart di ṭṭweɛ n tsexxart nni ggin nitni, tasexxart n Uqiḍun n Umsagar.
22 Ayt n Israil war dd-ttqarriben ɛad ɣar Uqiḍun n Umsagar, ḥima war dd-ttiwyen ammu ddenb x yixef nsen uca ad mmten.
23 Maca Ilawiyyen ad sexxaren di tsexxart n Uqiḍun n Umsagar uca ad arbun řmuɛṣiyyet nsen. Aqa-tt d ict n tewṣeyyet i řebda i marra jjiřat nwem, aqa nitni war ttᵉṭṭfen řwart di řwesṭ n ayt n Israil,
24 minzi řeɛcur n ayt n Israil nni ssgeɛɛden nitni i SIDI am tewhibt n usgeɛɛed, wciɣ ten i Ilawiyyen. X uya nniɣ asen: War warrten di řwesṭ n ayt n Israil!”
25 Issiweř SIDI ak-d Musa, inna:
26 “Ammu i ɣa tessiwřed ak-d Ilawiyyen uca ad asen tinid: ‘Xmi teksim řeɛcur n ayt n Israil nni wciɣ kenniw d řwart, xenni ad zzaysen tessgeɛɛdem ict n tewhibt n usgeɛɛed i SIDI, řeɛcur zi řeɛcur.
27 Ad awem dd-tᵉttwaḥseb am tewhibt n usgeɛɛed, am yirden n unedrar u am teccuret n tsirt n uḍiř.
28 Ammu i d awem ittxeṣṣa ad tessgeɛɛdem ict n tewhibt n usgeɛɛed i SIDI zi marra řeɛcur nwem nni ɣa teksim zeg ayt n Israil. Ittxeṣṣa ad tewcem tawhibt, tenni tessgeɛɛdem zzaysen i SIDI, ɣar ukehhan Harun.
29 Zi marra min d awem ɣa wcen, ad tessgeɛɛdem tawhibt n usgeɛɛed tmun i SIDI, zi řemxeyyar nnes, tasɣart nnes iqeddsen zzayes.’
30 Uca ittxeṣṣa ac ad asen tinim: ‘Mařa teksim zzayes řemxeyyar nnes, aqa aya ad dd-ittwaḥseb d řɣiǧet n unedrar d řɣiǧet n tsirt n uḍiř i Ilawiyyen.
31 Ad teccem aya di kuř amcan, kenniw d aytbab n taddart nwem, minzi ta d řmunet i tsexxart nwem deg Uqiḍun n Umsagar.
32 Mařa ad zzayes teksim min iǧan ḥsen, xenni war xawem tarebbum ddenb. War iɛeddeř ad tfesdem tiwhibin iqeddsen n ayt n Israil, ḥima war tᵉttmettim ca.’ ”