15
Tiɣarṣa n tmessi
1 Issiweř SIDI ak-d Musa, inna:
2 “Siweř ak-d ayt n Israil, ini asen: ‘Xmi ɣa tadfem ɣar temmurt mani ɣa tzeddɣem, tammurt nni d awem ɣa wceɣ,
3 uca ad tesswejdem din ict n tewhibt n tmessi i SIDI, ict n tɣarṣt n wecmaḍ niɣ ict n tewhibt i tɣarṣt i ukemmeř n ijj n lwaɛd niɣ ict n tewhibt s řxaḍar niɣ ict n tewhibt i řeɛyudat nwem ittwaggen, maḥend ad tiři d ict n řefwaḥet ittfuḥen i SIDI, zi řebhayem niɣ zeg wuǧi,
4 xenni wenni dd ɣa iqeddmen tawhibt nnes i SIDI, ad yawi ɛawed ict n tewhibt n řɣiǧet zeg ict n teɛcart n yijj n ifa n waren azdad ixeǧḍen s yijj n arbeɛ n ijj n uhinu n zzect.
5 Ad tesswejded ak-d man aya ijj n arbeɛ n ijj n uhinu n binu am tewhibt n useyyeb i kuř ijj n izmar, maḥend ad tiři x tɣarṣt n wecmaḍ niɣ x tewhibt i tɣarṣt,
6 niɣ, mařa ad tiři i yijj n icarri, xenni ittxeṣṣa ad tesswejded ict n tewhibt n řɣiǧet zi tnayen n teɛcuray n ijj n ifa n waren azdad ixeǧḍen s ict n ttuřut n ijj n uhinu n zzect,
7 uca ad tqeddmed ɛawed ict n ttuřut n ijj n uhinu n binu am tewhibt n useyyeb, am yict n řefwaḥet ittfuḥen i SIDI.’ ”
8 “Xmi ɣa tesswejded ameẓyan n ufunas am tɣarṣt n wecmaḍ niɣ am tewhibt i tɣarṣt maḥend ad yiři i ukemmeř n ijj n lwaɛd niɣ am tɣarṣt n řehna i SIDI,
9 xenni ittxeṣṣa ad tqeddmed ak-d umeẓyan n ufunas ɛawed ict n tewhibt n řɣiǧet n třata n teɛcuray n ijj n ifa n waren azdad ixeǧḍen deg wezyen n uhinu n zzect,
10 uca ittxeṣṣa ɛawed ad dd-tawyed azyen n uhinu n binu am tewhibt n useyyeb, am tewhibt n tmessi, ict n řefwaḥet ittfuḥen i SIDI.
11 Ammu i ittxeṣṣa ad ggen i kuř afunas, niɣ i kuř icarri, niɣ i kuř ijj zeg wuǧi, zeg iḥuřiyyen niɣ zeg iɣayḍen.
12 Ɛlaḥsab řqedd n imuddaren i tɣarṣt i ɣa tesswejdem, ad teggem ammu i kuř ijj n umuddar, ɛlaḥsab řqedd ikemmřen n imuddaren.
13 Marra inni dd-ittwaxeřqen di temmurt ad ggen timesřayin-a ammu, xmi dd ɣa qeddmen nitni ict n tewhibt n tmessi, ict n řefwaḥet ittfuḥen i SIDI.
14 Xmi ɣa tafed jar marra jjiřat nwem ijj n ubarrani i iqqimen akidwem, niɣ ijjen wenni izeddɣen di řwesṭ nwem, aqa netta ad issewjed ict n tewhibt n tmessi, ict n řefwaḥet ittfuḥen i SIDI, xenni ad tt igg am mammec tt tᵉtteggem kenniw.”
15 Ay, agraw n řgens, ad din tiři ict n tewṣeyyet, ict n tewṣeyyet i řebda i kenniw u i ubarrani nni akidwem iqqimen i marra jjiřat nwem. Ad yiři ubarrani am mammec teǧam kenniw zzat i wudem n SIDI.
16 Ad yiři ijj n uzerf d ict n lfariḍa i kenniw u i ubarrani nni akidwem iqqimen.”
Imezwura n waren
17 Issiweř SIDI ak-d Musa, inna:
18 “Siweř ak-d ayt n Israil uca ini asen: ‘Xmi ɣa tadfem ɣar tammurt mani kenniw ɣa yawyeɣ,
19 xenni ad imsar, umi ɣa teccem aɣrum zi řɣiǧet n temmurt, aqa kenniw ad tessgeɛɛdem ict n tewhibt n usgeɛɛed i SIDI.
20 Zi tmezwarut n warecti nwem ad tessgeɛɛdem ict n temsemment am tewhibt n usgeɛɛed. Ad tt tessgeɛɛdem am mammec tessgeɛɛdem tawhibt n usgeɛɛed n unedrar.
21 Zi tmezwarut n warecti nwem ad tqeddmem ict n tewhibt n usgeɛɛed i SIDI di marra jjiřat nwem.’ ”
Ddenb war iǧi neɛmada
22 “Mařa tweddarem u war tᵉtteggem marra řumurat-a i tuɣa issawař SIDI ak-d Musa
23 - marra min d awem yumur SIDI s tsexxart n Musa zeg wass min zi t yumur SIDI, ssenni d tsawent, di marra rejyuř nwem -
24 xenni ad imsar, mařa ittwagg s uweddar barra i tiṭṭawin n tmesmunt, aqa tamesmunt marra ad tessewjed ijj n ufunas, ameẓyan n tfunast, am tɣarṣt n wecmaḍ, am ict n řefwaḥet ittfuḥen i SIDI ak-d tewhibt nnes n řɣiǧet d tewhibt nnes n useyyeb ɛlaḥsab lfariḍa u ak-d yijj n umyan zeg iɣayḍen am tɣarṣt n ddenb.
25 Xenni ad igg ukehhan asřaḥ i marra tamesmunt n ayt n Israil uca ad asen ittwaɣfar, minzi man aya imsar zeg uweddar, uca nitni qeddmen tawhibt nsen, ict n tewhibt n tmessi i SIDI, uřa d taɣarṣt nsen n ddenb, zzat i wudem n SIDI.
26 Marra tamesmunt n ayt n Israil ad tᵉttwaɣfar, uřa d abarrani nni izeddɣen di řwesṭ nwem, x umi imsar am iweddar marra řgens.”
27 “Mařa ijjen bnadem ixḍa am netta iweddar, xenni ad dd-issqarreb ict n tɣayḍet n ijj n useggʷas am tɣarṣt n ddenb.
28 Akehhan ad igg aṣřaḥ zzat i wudem n SIDI x bnadem nni tuɣa iweddar, am tuɣa ixḍa s uweddar zzat i wudem n SIDI, am xas i ɣa yegg asřaḥ uca xenni ad as ittwaɣfar.
29 Ad din yiři ijj n uzerf i wenni iggin ca s uweddar, i wenni dd-ixeřqen di temmurt uřa i ubarrani nni izeddɣen di řwesṭ nwem.”
Ddenb s ufus igeɛɛden
30 “Maca bnadem nni iggin ca s ufus igeɛɛden, ma netta ittwaxřeq-dd di temmurt niɣ netta d abarrani, aqa netta iceqqef di SIDI uca bnadem nni ad ittwaqess zi řwesṭ n řgens nnes,
31 umi isseḥqar awař n SIDI u yarẓa řumur nnes. Bnadem nni ad ittwaqess qaɛ zi řgens nnes, řmuɛṣiyyet nnes ad tiři xas.”
32 Řami tuɣa ayt n Israil di řexřa, ufin ijj n weryaz ittḥarwac akeccuḍ deg wass n ssebt.
33 Inni t yufin am tuɣa ittḥarwac akeccuḍ, iwyen t ɣar Musa d Harun d marra tamesmunt.
34 Ggin t di tḥeṭṭut, minzi tuɣa war dd-ibin min zzayes ɣa ggen.
35 Xenni inna SIDI i Musa: “Aryaz nni ad ittwaneɣ nican. Marra tamesmunt ad t tarjem barra i řmargeḥ n řɛeskar.”
36 Xenni tessuffeɣ i-t marra tmesmunt barra i řmargeḥ n řɛeskar uca nitni arejmen t ařami immut, am mammec t yumur SIDI i Musa.
Ticarcifa n řidaret
37 Issiweř SIDI ak-d Musa, inna:
38 “Siweř ak-d ayt n Israil uca ini asen, ad ggen i yixef nsen ticarcifa ɣar tɣemmura n warruḍ nsen di marra jjiřat nsen uca ad ggen ijj n ufiřu d adeḥmi ɣar tcarcifa, tinni ɣar tɣemmura.
39 Ad yiři ufiřu ɣar tcarcift, ḥima ad twařam afiřu nni uca ad tidarem di marra řumurat n SIDI uca ad tent teggem u war tḍeffarem ccehwat n wuřawen nwem d tiṭṭawin nwem, inni awarni asent tennumem ad tessefsedem ixef nwem,
40 u ḥima ad txarrṣem di řumurat inu, ad zzaysent teggem, maḥend ad tiřim tᵉttwaqeddsem zzat i AREBBI nwem.
41 Necc d SIDI, AREBBI nwem wenni kenniw dd-issuffɣen zi temmurt n Miṣra ḥima ad iřiɣ d AREBBI nwem. Necc d SIDI, AREBBI nwem!”