10
Accawen n icarri i usuḍi
1 Issiweř SIDI ak-d Musa, inna:
2 “Egg i yixef nnec tnayen n řebwaq iziraren n nnuqart, s yijj n umarsu s wefḍis ad ten tegged uca ad iřin i ubarreḥ n tmesmunt u i usmuṭṭi n řemrageḥ n řɛeskar.
3 Xmi daysen ɣa suḍen, ad ɣarek tmun tmesmunt marra ɣar wadaf n Uqiḍun n Umsagar.
4 Xmi ɣa suḍen deg ijj zi tnayen nni, xenni mɣir řḥukkam, izeǧifen x řuřuf n Israil, i xak dd ɣa imunen.
5 Xmi ɣa tsuḍem s wesruddeḥ di řbuq, xenni ad mmuṭṭiyent řemrageḥ nni immarsen ɣar ccarq.
6 Xmi ɣa tsuḍem s wesruddeḥ di řbuq tnayen n twařawin, xenni ad mmuṭṭiyent řemrageḥ nni immarsen ɣar uɣezdis n ljanub. Ad suḍen s wesruddeḥ umi ɣa muṭṭiyen zeg wemcan ɣar wemcan nneɣni.
7 I tmesmunt n wegraw n řgens ittxeṣṣa ad tsuḍem di řebwaq, maca břa asruddeḥ.
8 Ad suḍen warraw n Harun, ikehhanen, di řebwaq. Ad tiři d ict n tewṣeyyet i řebda i marra jjiřat nwem.”
9 “Xmi dd ɣa teffɣem ɣar garra di temmurt nwem, ḥima ad tmenɣem ak-d weɣrim nni kenniw dd-ihekkweřen, xenni ad tsuḍem s wesruddeḥ di řebwaq uca kenniw ad tᵉttwatidarem zzat i wudem n SIDI, AREBBI nwem, uca ad tnejmem zi řɛedyan nwem.
10 Ammu di kuř ijj n wass n řefraḥet u di řeɛyudat ittwaggen u deg umezwaru n iyuren nwem ad tsuḍem di řebwaq xmi ɣa tawyem tiɣarṣa n wecmaḍ nwem d tɣarṣa n uqadi nwem uca ammu i ɣa iřint di ṭṭweɛ nwem i řidaret zzat i wudem n AREBBI, Necc d SIDI, AREBBI nwem.”
Aggʷejji zi řexřa n Sina
11 Imsar deg useggʷas wiss tnayen, deg uyur wiss tnayen, deg wass wiss ɛicrin n uyur, aqa ittwassgeɛɛed useynu zi sennej n Tzeddiɣt n Cchadet.
12 Uca fesyen ayt n Israil iqiḍan nsen, mmuṭṭiyen zeg wemcan ɣar wemcan zi řexřa n Sina uca ibedd-dd useynu di řexřa n Faran.
13 Ammu fesyen iqiḍan nsen twařa tamezwarut, x řumur n SIDI, x ufus n Musa.
14 D amezwaru tᵉttwakkes tɛeǧant n řmargeḥ n řɛeskar n ayt n Yahuda, uyuren am ttwasettfen ɛlaḥsab tirbiɛin n řɛeskar nsen. Naḥcun, mmis n Ɛamminadab, tuɣa d azeǧif x řɛeskar.
15 Natanayil, mmis n Ṣuɣar, tuɣa d azeǧif x řɛeskar n teqbič n ayt n Issakar.
16 Iliyab, mmis n Ḥilun, tuɣa d azeǧif x řɛeskar n teqbič n ayt n Zibulun.
17 Awarni man aya hedmen Tzeddiɣt uca fesyen ayt n Jarcun d ayt n Marari iqiḍan nsen uca arbun Tazeddiɣt.
18 Xenni tᵉttwakkes tɛeǧant n řmargeḥ n řɛeskar n Rubin uyuren, ttwasettfen ɛlaḥsab tirbiɛin n řɛeskar nsen. Iliṣur, mmis n Cadayur, tuɣa d azeǧif x řɛeskar nnes.
19 Calumiyil, mmis n Ṣuricadday, tuɣa d azeǧif x řɛeskar n teqbič n ayt n Cimɛun.
20 Ilyasaf, mmis n Daɛuyil, tuɣa d azeǧif x řɛeskar n teqbič n ayt n Jad.
21 Xenni fesyen ayt n Qahat iqiḍan nsen, arbun Zzawect Iqeddsen. Uca ayt n Jarcun d ayt n Marari bnan Tazeddiɣt qbeř twasit nsen.
22 Awarni as tᵉttwakkes tɛeǧant n řmargeḥ n řɛeskar n ayt n Ifrayim, uyuren, ttwasettfen ɛlaḥsab tirbiɛin n řɛeskar nsen. Ilicamaɛ, mmis n Ɛammihud, tuɣa d azeǧif x řɛeskar nnes.
23 Jamaliyil, mmis n Fadahṣur, tuɣa d azeǧif x řɛeskar n teqbič n ayt n Manassa.
24 Abidun, mmis n Jidɛuni, tuɣa d azeǧif x řɛeskar n teqbič n ayt n Binyamin.
25 Xenni tᵉttwakkes tɛeǧant n řmargeḥ n řɛeskar n ayt n Dan, am uɣezdis uneggar n marra řemrageḥ, uca uyuren, ttwasettfen ɛlaḥsab tirbiɛin n řɛeskar nsen. Axiɛazar, mmis n Ɛammicadday, tuɣa d azeǧif x řɛeskar nnes.
26 Fajɛiyil, mmis n Ɛukran, tuɣa d azeǧif x řɛeskar n teqbič n ayt n Acir.
27 Axiraɛ, mmis n Ɛinan, tuɣa d azeǧif x řɛeskar n teqbič n ayt n Zibulun.
28 Ammu i ssmuṭṭiyen ayt n Israil iqiḍan nsen zeg wemcan ɣar wemcan, am ttwasettfen nitni ɛlaḥsab řɛeskarat nsen, ammu i fesyen nitni iqiḍan nsen.
29 Inna Musa i Ḥubab, mmis n Raɛuyil, Amidyani, aḍeggʷař n Musa: “Neccin ad nemmuṭṭi ɣar wemcan i d aneɣ inna SIDI: ‘Necc ad awem t-i-dd wceɣ!’ As-dd akidneɣ, ad ac negg tcuni, minzi SIDI issiweř x Israil s řxir.”
30 Netta inna as: “Necc war ttriḥeɣ, maɣar ad uyureɣ ɣar temmurt inu u ɣar řaǧ inu.”
31 Uca netta inna as: “Ttzawgeɣ cek, war d aneɣ ttejji, minzi cek tessned mammec icuwwar ad newwet iqiḍan nneɣ. Cek aqa tdewřed aneɣ - am mammec neqqar - am tiṭṭawin.
32 Xmi ɣa traḥed akidneɣ uca ad aneɣ dd-yas řxir i dayneɣ ɣa igg SIDI, aqa neccin ad ac negg tcuni ɛawed.”
33 Uca fesyen iqiḍan nsen, uyuren zeg wedrar n SIDI ticři n třata n wussan. Ttabut n Řɛahd tuyur zzat i wudem nsen ticři n třata n wussan, ḥima ad yarzu x ijj n wemcan i arraḥet.
34 Deg uziř tuɣa aseynu n SIDI sennej nsen umi kksen iqiḍan nsen zi řmargeḥ n řɛeskar.
35 Řami tᵉttwassmuṭṭi Ttabut, temsar řebda belli Musa inna: “Kkar, a SIDI, ejj řeɛdyan nnec ad mmzeǧaɛen u inni kenniw icarrhen ad arewřen zeg wudem nnec!”
36 Ɣar ubeddi n Ttabut, inna: “Dweř-dd, a SIDI, ɣar ɛecra n řuřuf n řuřuf n Israil!”