5
Naḥamya iwca afus i imeẓřaḍ
1 Ikkar ijj n uɣuyyi imɣar n řgens u n temɣarin nsen, cetcan nitni x aytmatsent, Udayen.
2 Aqa din inni innan: “Iḥenjiren nneɣ d tḥenjirin nneɣ d neccin d aṭṭas. Ittxeṣṣa ad nseɣ imendi ḥima ad necc ad neddar.”
3 Inneɣni nnan: “Neccin narhen iyyaren nneɣ d imarjaɛen nneɣ n uḍiř d tudrin nneɣ d aḍman, ḥima ad nawi řḥebb n yirden deg wussan n řaẓ.”
4 Inneɣni nnan: “Neccin narḍeř nnuqart i ljizya i ujeǧid x iyyaren nneɣ u x imarjaɛen nneɣ n uḍiř.”
5 “Xenni řexxu, aysum nneɣ d aysum n aytmatneɣ, iḥenjiren nneɣ am iḥenjiren nsen, u xzar, iḥenjiren nneɣ d tḥenjirin nneɣ ittxeṣṣa aneɣ ad ten narr d isemɣan. Aqa din zi yessitneɣ tinni idewřen am tseɣmin, uca afus nneɣ war izemmar ad igg ca u iyyaren nneɣ d imarjaɛen nneɣ n uḍiř aqa deg ufus n inneɣni.”
6 Umi sřiɣ iɣuyyan nsen d wawařen-a, dewřeɣ xeyyqeɣ aṭṭas.
7 Necc xarrṣeɣ deg wuř inu u xenni cetciɣ x tarwa n taṣiřet u x imḍebbaren, nniɣ asen: “Kuř ijj zzaywem dayes řɛib umi igga amarwas deg umas.” Necc ggiɣ ijj n wegraw d ameqqran ḍidd nsen.
8 Necc nniɣ asen: “Neccin nesɣa aytmatneɣ, Udayen, inni tuɣa ittwazzenzen i řegnus, ɛlaḥsab tizemmar nneɣ. Ma texsem ad tezzenzem ɛawed tawmatwem u ttwammesɣen nitni zzayneɣ ɛawed?” Uca sseɣden war ufin min ɣa inin.
9 Xas uca nniɣ: “Min tᵉtteggem kenniw, war iǧi nican. Ma war ittxeṣṣi ad tuyurem zzat i AREBBI nneɣ s uweqqar zi ssibbet n useḥqar n řegnus, řɛedyan nneɣ?
10 Uřa d necc, aytma d imsexxaren inu, aqa narḍer asen nnuqart d imendi. Jjem aneɣ ad nesmeḥ maca deg umarwas-a.
11 Arrem asen ass-a iyyaren nsen, imarjaɛen nsen n uḍiř, řeɛraṣit nsen n zzitun d tudrin nsen uca semḥen asen di tasɣart wiss mya n nnuqart d imendi d binu n jdid d zzect nni i zzaysen tᵉttᵉttarem ɛad.”
12 Xas uca nnan: “Ad asen t narr marra u war zzaysen t nᵉttettar ɛad. Neccin ad negg, am mammec tennid cek.” Uca řaɣiɣ i ikehhanen u jjiɣ ten ad jjaǧen, aqa nitni ad ggen ɛlaḥsab awař-a.
13 Xenni zzerzeɣ weḥsin n warruḍ inu, nniɣ: “Ammu i ɣa izzerz AREBBI kuř aryaz nni war iṭṭifen deg wawař-a, zi taddart nnes u zeg wagřa nnes, wah, iři ad t zzerzen ařami i ɣa ixwa.” Agraw n řgens marra inna: “Amin!” Nitni ssemɣaren SIDI d řgens i iggin ɛlaḥsab awař-a.
Amedya n Naḥamya
14 Uřa d necc d yaytma war necci ca macca n ijj n lwali zeg wass nni di i d ayi igga d lwali nsen di temmurt n Yahuda, zeg useggʷas wiss ɛicrin ař aseggʷas wiss tnayen u-třatin n ujeǧid Artaḥcasta, teqqar tenɛac n iseggʷusa.
15 Lwulat nni din iǧan qbeř i necc, tuɣa ggin ddqeř x řgens u tuɣa ksin zzayes aɣrum d binu u ɛawed arebɛin ciqlu n nnuqart. Uřa d imsexxaren nsen seǧḍen x řgens. Necc maca war ggiɣ aya zi tiggʷudi n AREBBI.
16 Aqa wciɣ jjehd inu i řxedmet ɣar řḥiḍ u neccin war nesɣi ca aḥwic u marra imsexxaren munen din x řxedmet.
17 Ɣar ṭṭabřa inu qqimen mya u-xemsin n yeryazen zeg Wudayen u zeg imḍebbaren uřa d inni i ɣarneɣ dd-yusin zi řegnus i d aneɣ dd-innḍen.
18 Min ittwasswejden ayi i yijj n wass, aqa d ijj n ufunas, setta n texsiwin ittwafarzen zeg wuǧi uřa d ijḍaḍ, u di kuř ɛecra n wussan ɛřam kuř binu s ufeyyeḍ. S marra aya war ttareɣ macca n lwali, maɣar tasexxart tessedqeř aṭṭas x řgens-a.
19 Idar ayi s řxar, a AREBBI inu, s marra min ggiɣ i řgens-a.