8
Asgenfi n ijj n bu-řbarṣ
1 Řami dd-ihwa zeg wedrar, ḍfaren t-i-dd aṭṭas n řɣaci.
2 Xzar, yusa-dd ɣares ijjen i di iǧa řbarṣ, isjed as, inna: “A Sidi, mařa texsed, tzemmared ad ayi tessizdeged!”
3 Yasuɛ isswiẓẓeḍ afus nnes uca iḥada t, inna: “Necc xseɣ, zdeg!” Uca ittwassizdeg zi řbarṣ nnes řexdenni.
4 Xenni inna as Yasuɛ: “Xzar, war tteqqar i ḥed, maca ruḥ, scen ixef nnec i ukehhan uca ewc taɣarṣt i Arebbi ɛlaḥsab min zzayes iweṣṣa Musa, aqa-tt d cchadet i nitni.”
Amsexxar n řqebṭan arumani
5 Řami yudef Yasuɛ ɣar Kafarnaḥum, yusa-dd ɣares ijj n řqebṭan x mya, ittar zzayes ammu,
6 inna: “A Sidi, amsexxar ameẓyan inu izzeř di taddart d aneɛḍab, aqa dayes řeḥriq aṭṭas!”
7 Inna as Yasuɛ: “Necc ad dd-aseɣ, ad t ssgenfiɣ!”
8 Uca řqebṭan x mya yarra-dd, inna: “A Sidi, necc war sdiheǧeɣ ad tadfed swadday i tzeqqa inu, maca ini ijj n wawař waha, xenni ad iggenfa umsexxar ameẓyan inu.
9 Minzi uřa d necc ɛawed d bnadem sadu ifassen uca ɣari iɛeskariyyen sadu ufus inu, qqareɣ i wa: ‘Ruḥ!’, xenni ad iraḥ, u i wenneɣni: ‘As-dd!’, xenni ad dd-yas, u i umsexxar inu qqareɣ as: ‘Egg man aya!’, uca ad t igg.”
10 Řami isřa Yasuɛ man aya, ittebhet, inna i yinni akides iǧan: “S tidett Necc ad awem iniɣ, war ufiɣ uřa di Israil l’iman am wanita.
11 Necc ad awem iniɣ, belli aṭṭas i dd ɣa yasen zi ccarq u zi řɣarb, ad qqimen ɣar ṭṭabřa ak-d Ibrahim d Isḥaq d Yaɛqub di Tgeldit n ijenwan,
12 maca tarwa n Tgeldit ad mmenḍaren barra ɣar ṭṭarf aneggaru n taǧest. Dinni ad iřin imeṭṭawen d uɣezzi n teɣmas.”
13 Yasuɛ inna i řqebṭan x mya: “Ruḥ, ad imsar am mammec tumned.” Uca iggenfa uḥenjir nnes di tsaɛɛet nni.
Asgenfi n tḍekkwač n Buṭrus
14 Řexdenni yusa-dd Yasuɛ ɣar taddart n Cimɛun, iẓra taḍekkwač nnes tezzeř, dayes timessi.
15 Iḥada afus nnes uca truḥ as tmessi, řexdenni tekkar, tsexxar xas.
16 Ɣar uɛecci iwyen-dd ɣares aṭṭas n imaryaḥen i daysen ccwaṭen. Issuffeɣ ccwaṭen nsen s yijj n wawař waha, uca issgenfa marra imehřac,
17 ḥima ad ittwakemmeř min ittwannan zeg unabi Icaɛya: “Ad iksi řeḥriq nneɣ u ad yarbu řehřac nneɣ.”
Aḍfar n Yasuɛ
18 Řami iẓra Yasuɛ řɣaci ameqqran i d as dd-innḍen, yumur i-ten ad ẓwan ɣar ujemmaḍ.
19 Uca yusa-dd ɣares ijj n umseřmad n idlisen, inna as: “A Amseřmad inu, ad Cek ḍfareɣ mani ma i ɣa traḥed!”
20 Inna as Yasuɛ: “Iceɛban ɣarsen ifran u ijḍaḍ n ujenna ɣarsen řeɛwacc, maca Mmis n bnadem war yufi ca mani ɣa isenned azeǧif nnes.”
21 Inna as ijjen nneɣni zeg imeḥḍaren nnes: “A Sidi, ejj ayi d amezwar ad uyureɣ ad neḍřeɣ baba!”
22 Inna as Yasuɛ: “Ḍfar ayi-dd, ejj imettinen ad neḍřen imettinen nsen!”
Yasuɛ d tḥaryaḍt
23 Řami inya di tɣarrabut, nyin imeḥḍaren nnes akides.
24 Uca xzar, tekkar-dd ict n tḥaryaḍt di řebḥar ař mani dřint řemwaj aɣarrabu, maca Yasuɛ tuɣa iṭṭeṣ.
25 Usin-dd ɣares imeḥḍaren nnes uca ssfaqen t-i-d, nnan as: “A Siditneɣ, senjem aneɣ, aqa ad nettwahellek!”
26 Inna asen: “Mayemmi tᵉtteggʷedem, a kenniw i di iǧa drus n l’iman?” Xenni ikkar, iwebbex asemmiḍ d řebḥar, uca tusa-dd řhudnet tameqqrant.
27 Tbehten iwdan, nnan: “Min iɛna wa umi isemmiḍen d řebḥar ttᵉṭṭaɛen as?”
Asgenfi n tnayen n imeryaḥen
28 Řami yiweḍ ɣar ujemmaḍ ɣar temmurt n Gadarinis, řqan t-i-dd tnayen n imaryaḥen, ffɣen-dd zeg imeḍřan, tuɣa mmuzzaren aṭṭas ař mani uřa d ijj war izemmar ad yekk abrid nni.
29 Sɣuyyen, nnan: “Min din jar aneɣ d Cek, a Yasuɛ, Mmis n AREBBI? Ma tusid-dd danita ḥima ad aneɣ tɛeddbed qbeř řweqt?”
30 Tuɣa din ict n tḥimart n iřfan tameqqrant tiggʷej xasen, thedda din.
31 Uca ccwaṭen ttaren zzayes, nnan: “Mařa tessuffɣed aneɣ, ejj aneɣ ad nadef ɣar tḥimart n yeřfan!”
32 Inna asen: “Ruḥem!” Řexdenni ffɣen-dd, udfen deg iřfan. Uca xzar, taḥimart n iřfan amen tmun teḥduddar zi teysart, uca iřfan wḍan di řebḥar, mmuten deg waman.
33 Arewřen imeksawen uca řami iwḍen ɣar tendint, xebbaren x kuřci min imsaren, uřa x imaryaḥen.
34 Uca xzar, ffɣen-dd aytbab n tendint marra i umsagar ak-d Yasuɛ. Umi t ẓrin, ttaren zzayes maḥend ad iffeɣ zi temmurt nsen.