5
ABARREḤ X WEDRAR
1 Řami iẓra Yasuɛ řɣaci, yuři ɣar wedrar, uca awarni řami din iqqim, usin-dd ɣares imeḥḍaren nnes.
2 Uca yarzem aqemmum nnes, isseřmed i-ten, inna:
3 Sseɛd n yinni arruḥ nsen izřeḍ,
minzi Tageldit n ijenwan aqa-tt i nitni.
4 Sseɛd n yinni ittecḍinen,
minzi nitni ad ttwaɛezzan.
5 Sseɛd n imwaḍɛen,
minzi nitni ad warten tammurt.
6 Sseɛd n yinni ittřaẓan
d yinni ittfaden ɣar tsegda,
minzi nitni ad jjiwnen.
7 Sseɛd n yinni yareḥḥmen,
minzi ad ɣarsen tiři arreḥmet.
8 Sseɛd n yinni i ɣar iǧa uř izdig,
minzi nitni ad ẓaren AREBBI.
9 Sseɛd n yinni itteggen řehna,
minzi nitni ad ttwasemman arrawen n AREBBI.
10 Sseɛd n yinni inneḥṣaren x ssibbet n tsegda,
minzi Tageldit n ijenwan ad ɣarsen tiři.
11 Sseɛd i kenniw mařa ttɛayaren
u ttdarracen xawem
uca ad xawem inin
ɛřam kuř awařen iɛeffanen x ssibbet inu,
waxxa ssxarriqen.
12 Farḥem, sřiweřwem,
minzi řmunet nwem d tameqqrant deg ijenwan,
minzi ammu i tuɣa ttdarracen inabiyyen,
inni qbeř nwem.”
13 “Kenniw d tameǧaḥt n temmurt. Maca mařa tameǧaḥt ixsar uředdi nnes, mammec ɣa negg ad tt narr d tameǧaḥt? War tneffeɛ ɛad i walu, ḥaca ad temmenḍar ɣar barra, ad xas ɛefsen iwdan.”
14 “Kenniw d tafawt n ddunect. Tandint i ittwabnan x wedrar, war tzemmar ad tᵉnnuffar.
15 War ssreqqin řefnar uca ad t ssarsen sadu řmud, maca ad t ssarsen x řmerfeɛ, maḥend ad yarɣ i marra inni iǧan di taddart.
16 Jjem tafawt nwem ad tarɣ i iwdan, ḥima ad ẓaren řexdayem nwem icnan, ad ssuɛřan Babatwem i iǧan deg ijenwan.”
17 “Aqa ad awem ittɣiř aqa usiɣ-dd ḥima ad ssbeṭṭřeɣ Ccariɛa niɣ Inabiyyen. Necc war dd-usiɣ ca ḥima ad ssbeṭṭřeɣ, maca ḥima ad kemmřeɣ.
18 S tidett, Necc ad awem iniɣ: Ař i ɣa iɛdu ujenna d temmurt, war ibeṭṭeř uřa d ijjen řḥarf niɣ d icten taneqqiṭ zi Ccariɛa ař ɣa yiři kuřci.
19 S uya wenni i ɣa issbeṭṭřen zi tweṣṣa-ya icten, waxxa d tameẓyant, uca isseřmad iwdan ammu, ad ittwasemma d ameẓyan di Tgeldit n ijenwan, maca wenni zzaysent iggin u isseřmad i-tent, netta ad ittwasemma d ameqqran di Tgeldit n ijenwan.
20 Minzi Necc ad awem iniɣ: Mařa tasegda nwem war tmeqqar ca x tenni n imseřmaden n idlisen d tenni n Ifarisiyyen, s tidett war tᵉttidfem ca ɣar Tgeldit n ijenwan!”
21 “Aqa tesřim belli ittwanna i řejdud: ‘War neqq!’, u: ‘Wenni ineqqen, ad ittwaḥaseb!’
22 Maca Necc ad awem iniɣ: Marra wenni ittxeyyaqen x umas břa ssibbet, nhřa ma ad xas ittwaḥakem, u marra wenni iqqaren i umas: ‘Ad xak ssusfeɣ!’, ad ittwaḥkem xas zzat i Jmaɛet Tameqqrant, u wenni iqqaren: ‘A abuhaři!’ ad ittwaḥakem, ad yadef ɣar tmessi n jᵉhennama.
23 Mařa tqeddmed tawhibt nnec x uɛalṭar min xef ssarsen tiɣarṣa d tewhibin, uca dinni tɛeqřed belli umac aqa-t ca xak,
24 ejj tawhibt nnec din zzat i uɛalṭar, ruḥ amezwaru, tṣeřḥed ak-d umac, xenni dweř-dd, uca ewc tawhibt nnec.
25 Iři twejded i weṣřaḥ ak-d weɣrim nnec umi cek ɛad akides deg webrid, ḥima aɣrim nnec war cek ittiwi ɣar řqaḍi, xenni řqaḍi ad cek yawi ɣar umxazni uca ad temmenḍared di řeḥbes.
26 S tidett, Necc ad ac iniɣ: War dd-teffɣed ssenni, ař ɣa txeǧṣed aṣuldi aneggaru.”
27 Aqa tesřim belli ittwanna: ‘War zenni ca!’,
28 maca Necc ad awem iniɣ, marra wenni i ɣa ixzaren ɣar temɣart s nnecwet, aqa izna deɣya akides deg wuř nnes.
29 Mařa tessenqarḍ cek tiṭṭ nnec tafusect, qess i-tt, nḍar i-tt xak. Iḥřa ac mařa iweddar ijj n ṭṭarf n arrimet nnec x uweṭṭu n arrimet nnec marra di jᵉhennama.
30 Mařa tessenqarḍ cek afus nnec afusi, qess i-t, nḍar i-t xak, minzi iḥřa ac mařa iweddar ijj n ṭṭarf n arrimet nnec waha x uweṭṭu n arrimet nnec marra di jᵉhennama.”
31 “Aqa ittwanna ɛawed: ‘Wenni i ɣa iǧfen i temɣart nnes, ad as iwc tabrat n waǧaf!’
32 Maca Necc ad awem iniɣ: Marra wenni i ɣa iǧfen i temɣart nnes, war iǧi zi ssibbet n farq-ccɣeř, ittarra i-tt ad tezna, uca wenni i ɣa imeřcen tenni umi iǧfen, aqa netta izna.”
33 “Aqa tesřim ɛawed belli ittwanna i řejdud: ‘War tejjaǧid ẓur, maca egg min tejjuǧed i SIDI!’
34 Maca Necc ad awem iniɣ: War tejjaǧam ɛemmarṣ, uřa ɣar ujenna minzi netta d řɛarc n AREBBI,
35 uřa ɣar temmurt, minzi nettat d tanebdat sadu iḍaren nnes, uřa ɣar tendint n Urcalim, minzi nettat d tandint n Ujeǧid d ameqqran,
36 uca war tejjaǧam uřa ɣar uzeǧif nnec, minzi war tzemmared ad tarred uřa d ijj n uẓeṭṭu n ucuwwaf d acemřař niɣ d abarcan.
37 Ad iqqim wawař nwem ‘Wah!’ d ‘Wah!’, ‘Lla!’ d ‘Lla!’. Mana ktar zi man aya, aqa netta zeg umɛeffan.”
38 “Aqa tesřim belli ittwanna: ‘Tiṭṭ s tiṭṭ d tiɣmest s teɣmest!’,
39 Maca Necc ad awem iniɣ, war tᵉttemɛařam ca ak-d ijj n uɛeffan, maca wenni i ɣa isseqqřen ameggiz nnec afusi, seřqa yas uřa d ameggiz nneɣni.
40 Mařa din ḥed ixs ad kik igg ccreɛ uca netta ad xak ikkes tcamir nnec, ejj i-t ad iksi uřa d ajeǧab.
41 Wenni xak iggin bezzez ḥima ad kides tuyured ijj n kilumitr, uyur akides tnayen.
42 Man wen d ac i ɣa ittaren ca n řḥajjet, ewc as tt, u wenni yarezzun ad xak yarḍeř, war d t ttarra amenni.”
43 “Aqa tesřim belli ittwanna: ‘Ad texsed jjar nnec, ad tcarhed řeɛdu nnec!’
44 Maca Necc ad awem iniɣ: Xsem řɛedyan nwem u barkem inni kenniw ineɛɛřen, ggem tcuni i yinni kenniw icarrhen, ẓaǧem i yinni kenniw ittawyen d imeḥbas d yinni xawem ittdarracen,
45 ḥima ad tiřim d tarwa n Babatwem i iǧan deg ijenwan, minzi Netta issneqqar tafuct nnes x iṣebḥanen d iɛeffanen, uca Netta yarexxu-dd i wenẓar, ḥima ad iwwet x imseggaden u x yinni war iseggden.
46 Minzi mařa texsem inni kenniw ittexsen, man arbeḥ i ɣarwem? Ma war tteggen ayt n ḍḍariba uřa ammu?
47 Mařa tseǧmem x wawmaten nwem waha, min i tᵉtteggem ktar x wenneɣni? Ma war tteggen ayt n ḍḍariba uřa ammu?
48 S uya iřim nican qaɛ am mammec uřa d Babatwem i iǧan deg ijenwan iǧa nican qaɛ.”