23
Awařen iqesḥen x Imseřmaden n Ccariɛa d Ifarisiyyen
1 Řexdenni issiweř Yasuɛ ak-d řɣaci u ak-d imeḥḍaren nnes,
2 inna: “Imseřmaden n idlisen d Ifarisiyyen ssɣimen simant nsen x řkursi n Musa.
3 S uya marra min d awem qqaren maḥend ad dayes tcebbarem, ggem t, maca war tteggem ɛlaḥsab řexdayem nsen, minzi nitni waxxa qqaren t, war t tteggen.
4 Ttceddan řeḥmeř iḍeqřen, ssrusan ten x tɣardin n iwdan, maca nitni s yixef nsen war xsen ad ten ssenhezzen uřa s yijj n uḍaḍ.
5 Marra řexdayem nsen i itteggen, tteggen tent ḥima ad ten ẓaren iwdan minzi nitni tteggen tiḥezzanin nsen n tẓaǧit d imiriwen uca ticrurin i iǧan ɣar ubeḥřuř n řkacni n tẓaǧit nsen, ggin tent d timeqqranin.
6 Nitni ttexsen imucan iṣebḥen ɣar řefruḥ u řekrasi iṣebḥen di temzidawin,
7 uřa d ssřam di řeswaq, uca iɛjeb asen ad asen řaɣan iwdan ‘A amseřmad inu!’
8 Maca kenniw war ttejjim ad awem řaɣan ‘A amseřmad inu!’, minzi Amseřmad nwem d Ijjen, maca kenniw marra d awmaten.
9 War ttejjim ad awem řaɣan di temmurt ‘A baba!’, minzi Babatwem i iǧan deg ijenwan d Ijjen.
10 War ttejjim ad awem řaɣan ‘imgewwaden’, minzi Ijjen d wenni d Amgewwad nwem, aqa-t d Lmasiḥ.
11 Maca ameqqran nwem ad yiři d amsexxar nwem.
12 Wenni i ɣa issuɛřan ixef nnes, ad ittwassemẓi, u wenni i ɣa issmeẓyen ixef nnes, ad ittwassuɛřa.”
13 “Uct xawem, a kenniw imseřmaden n idlisen d Ifarisiyyen, kenniw, a imnafqen, kenniw tᵉttettem tudrin n tijjař am tᵉttarem tiwhibin di ṭṭweɛ n tẓaǧatin nwem tizirarin. S uyenni ad teksim řḥukm d ameqqran.
14 Uct xawem, a kenniw imseřmaden n idlisen d Ifarisiyyen, kenniw, a imnafqen, kenniw tᵉttbellɛem Tageldit n ijenwan i iwdan, minzi kenniw simant nwem war tt tᵉttidfem, uca inni yarezzun ad dd-adfen, war ten tᵉttejjim ad dd-adfen.
15 Uct xawem, a kenniw imseřmaden n idlisen d Ifarisiyyen, kenniw, a imnafqen, kenniw tekkem x řbarr u x řebḥar, ḥima ad dd-tarrem ijjen d amɛacar n ddin n Wudayen, u xmi i kidwem ɣa yiři, tᵉttarram t d mmis n jᵉhennama d aɛeffan mahu x kenniw tnayen n tseqqar.
16 Uct xawem, a kenniw imgewwaden idarɣařen, inni iqqaren: ‘Wenni ijjuǧen ɣar Zzawect Tameqqrant, aqa tajaǧit nnes war tessekkwi walu, maca wenni i ɣa ijjuǧen s wureɣ i iǧan di Zzawect Tameqqrant, aqa netta iqqen ɣar iřes nnes.’
17 A ifɣař, a idarɣařen, min isekkwan ktar, ureɣ niɣ Zzawect Tameqqrant tenni tessqeddes ureɣ?
18 Uca ammu i teqqarem ɛawed: ‘Wenni ijjuǧen ɣar uɛalṭar, aqa tajaǧit nnes war tsekkwi walu, maca wenni i ɣa ijjuǧen s tmewci i xas immarsen, aqa netta iqqen ɣar iřes nnes.’
19 A ifɣař, a idarɣařen, min isekkwan ktar, tamewci niɣ aɛalṭar wenni issqeddes tamewci?
20 S uya wi ɣa ijjaǧen xenni ɣar uɛalṭar, aqa ijjuǧ ɣar uɛalṭar u ɣar marra min xas iǧan.
21 U wi ɣa ijjaǧen ɣar Zzawect Tameqqrant, ijjuǧ ɣares u ɣar Wenni dayes izeddɣen.
22 U wi ɣa ijjaǧen ɣar ujenna, aqa ijjuǧ ɣar řɛarc n AREBBI d Wenni xas iqqimen.
23 Uct xawem, a kenniw imseřmaden n idlisen d Ifarisiyyen, kenniw, a imnafqen, minzi kenniw tᵉtticem taɛcart n nneɛnaɛ d ssanuǧ d řcemmum, maca war d awem icqi min iǧan d ameqqran di Ccariɛa, aqa řḥukm d arreḥmet d l’iman. Ina i ittxeṣṣa ad teggem, war daysen tsemmḥem.
24 A imgewwaden idarɣařen inni ifarrnen tizit, maca tessɣeǧayem ařɣem.
25 Uct xawem, a kenniw imseřmaden n idlisen d Ifarisiyyen, kenniw, a imnafqen, minzi tessizdagem barra n řkas d ṭṭebṣi, maca ɣar daxeř aqa ccuren s tkeccaḍt d min war iseggden.
26 A Ifarisiyyen idarɣařen, sizdegem amezwar daxeř n řkas d ṭṭebṣi, maḥend ad yiři izdig uřa min iǧan ɣar barra nsen.
27 Uct xawem, a kenniw imseřmaden n idlisen d Ifarisiyyen, kenniw, a imnafqen, minzi teggim am yimeḍřan inni ittwajiyyaren, ttbanen d iṣebḥanen ɣar barra, maca ɣar daxeř aqa ccuren s iɣsan n řxecbat u s marra řexmej.
28 Amenni kenniw ɛawed, aqa teḍharem d imseggaden qibač i iwdan, maca ɣar daxeř aqa teccurem s řmuɛṣiyyet u s nnifaq.
29 Uct xawem, a kenniw imseřmaden n idlisen d Ifarisiyyen, kenniw, a imnafqen, minzi tbennam imeḍřan n inabiyyen u tzewwqem řqubbat n imeḍřan n imseggaden,
30 teqqarem: ‘Mři tuɣa neǧa deg wussan n řejdud nneɣ, ad yiři war ncarrec deg usizzeř n idammen n inabiyyen.’
31 S uya tcehhdem x yixef nwem belli kenniw d tarwa n yinni inɣin inabiyyen.
32 Iwa kemmřem kenniw xenni uřa řeqyas n min ggin řejdud nwem!
33 A iřefsawen, tarwa n ifiɣran, mammec ɣa teggem ad tᵉttwassnejmem zi řḥukm n tmessi n jᵉhennama?
34 S uyenni xzarem, Necc ad ɣarwem dd-ssekkeɣ inabiyyen d imiɣisen d imseřmaden n idlisen. Ca zzaysen ad ten tenɣem, ca zzaysen ad ten tṣellbem u ca zzaysen ad ten thettkem s urekkuḍ di temzidawin nwem uca ad xasen taẓẓřem zi tendint ɣar tendint nneɣni,
35 ařami ad xawem iřin marra idammen iseggden i issizzřen x temmurt, zeg idammen n Habil amseggad ař idammen n Zakariyya, mmis n Birixya, i tenɣim jar Zzawect Tameqqrant d uɛalṭar.
36 S tidett, Necc ad awem iniɣ: Marra timesřayin-a ad dd-asent x jjiř-a.”
37 “A Urcalim, a Urcalim, cem i ineqqen inabiyyen u yarejjmen inni d am dd-ittwassekken, mecḥař tuɣa xseɣ ad ssmuneɣ tarwa nnem am yict n tyaẓiḍt tegga ifiǧusen nnes sadu afriwen nnes, maca kenniw tuɣa war tᵉttexsem.
38 Xzar, Taddart nwem ad tᵉttwajj i cem d řxarbet,
39 minzi Necc ad awem iniɣ: Kenniw war d ayi tẓarrem ař ɣa tinim: ‘Lbaraka i Wenni dd-yusin s Yisem n SIDI.’ ” *