20
Amedya n ixemmasen deg umarjuɛ n uḍiř
1 “Minzi Tageldit n ijenwan am yijj n bab n taddart, iffeɣ ɣar ṣṣbeḥ zic, ḥima ad icra ixemmasen i umarjeɛ nnes n uḍiř.
2 Řami ikkes awař ak-d icewwařen s yijjen dinar i yijjen wass, issekk i-ten ɣar umarjeɛ nnes n uḍiř.
3 Řami dd-iffeɣ netta ɛawed di jjwayeh n tsaɛɛet wiss třata, ixs ad yini ɣar tesɛa di ṣṣbeḥ, iẓra inneɣni bedden di řmewqef břa řxedmet.
4 Netta inna asen: ‘Ruḥem uřa d kenniw ɣar umarjeɛ inu n uḍiř, ad awem wceɣ min d awem dd-ikkaren!’, uca ruḥen.
5 Iffeɣ-dd ɛawed di jjwayeh n tsaɛɛet wiss setta d wiss tesɛa, uca igga amenni ɛawed.
6 Řami dd-iffeɣ di jjwayeh n tsaɛɛet wiss hiṭɛac, ixs ad yini ɣar xemsa n tmeddit, yufa din ɛawed inneɣni bedden din břa řxedmet, inna asen: ‘Mayemmi tbeddem da ass ikmeř břa řxedmet?’
7 Nnan as: ‘Minzi war d aneɣ icri ḥed.’ Inna asen: ‘Ruḥem uřa d kenniw ɣar umarjeɛ inu n uḍiř, ad tᵉṭṭfem min d awem dd-ikkaren.’
8 Řami dd-tiweḍ tmeddit, inna bab n umarjeɛ n uḍiř i uweqqaf nnes: ‘Řaɣa-dd x ixemmasen, xeǧeṣ asen řmunet, sizwar zeg inni dd-yusin d ineggura uca ammu ař imezwura.’
9 Uca usin-dd inni d icra di jjwayeh n tsaɛɛet wiss ḥiṭac, uca kuř ijjen zzaysen iṭṭef ijjen dinar.
10 Řami dd-usin inni tuɣa d imezwura, ittɣiř asen ad ṭṭfen ktar, maca uřa d nitni ṭṭfen i kuř ijjen zzaysen ijj n dinar.
11 Řami t ṭṭfen, aqa xeyyqen x bab n taddart,
12 nnan: ‘Aqa ina d inni d ineggura xedmen ict n tsaɛɛet u cek tessemquded i-ten akidneɣ, neccin inni yarebbun ddqeř n wass d řeḥmu.’
13 Maca netta yarra-dd x ijjen zzaysen, inna: ‘A ameddukkeř inu, necc war cek ḍřimeɣ, ma war kidi tekkised awař x ijj n dinar?
14 Ṭṭef min iǧan nnec uca uyur. Necc xseɣ ad wceɣ i ina d inni d ineggura anect min d ac wciɣ.
15 Niɣ ma war ɣari bu řḥeqq maḥend ad ggeɣ min xseɣ ak-d min iǧan inu? Niɣ tiṭṭ nnec d taɛeffant, minzi necc d aṣebḥan?’
16 Ammu i ɣa dewřen ineggura d imezwura, uca imezwura ad dewřen d ineggura, minzi aṭṭas inni ittwařaɣan, maca drus inni ittwafarzen.”
Yasuɛ issawař x řmewt d tnukra nnes i twařa wiss třata
17 Řami ikkar-dd Yasuɛ maḥend ad igeɛɛed ɣar Urcalim, yiwi tenɛac n imeḥḍaren nnes ɣar uɣezdis deg webrid, inna asen:
18 “Xzar, ad ngeɛɛed ɣar Urcalim, uca ad immewc Mmis n bnadem deg ifassen n imeqqranen n ikehhanen d imseřmaden n idlisen, u nitni ad xas ḥekmen s řmewt.
19 Ad t sellmen i řegnus maḥend ad zzayes stehzan, ad t hettken s urekkuḍ uca ad t ṣellben, maca deg wass wiss třata ad dd-ikkar.”
Tutra n yemmas n Yaɛqub d Yuḥanna
20 Řexdenni tusa-dd ɣares yemmas n tarwa n Zabdi ak-d iḥenjiren nnes, tesjed as, ḥima ad zzayes tᵉttar ca n řḥajjet.
21 Inna as Netta: “Min texsed?” Tenna as nettat: “Ini maḥend ad qqimen tnayen n iḥenjiren-a inu, ijjen ɣar ufusi nnec u wenneɣni ɣar uzeřmaḍ nnec, di Tgeldit nnec.”
22 Yasuɛ yarra-dd xasen, inna: “Kenniw war tessinem ca min tᵉttarem. Ma tzemmarem ad teswem řkas i ɣa sweɣ Necc, niɣ ad tᵉttwassɣeḍṣem s useɣḍeṣ i zi ɣa ttwassɣeḍṣeɣ Necc?” Nnan as: “Nzemmar!”
23 Netta inna asen: “Řkas inu ad t teswem u aseɣḍeṣ i zi ɣa ttwassɣeḍṣeɣ, ad zzayes tᵉttwassɣeḍṣem, maca aɣimi ɣar ufusi inu d uzeřmaḍ inu war iǧi i Necc, maḥend ad t wceɣ, maca ad yiři i yinni umi t issewjed Baba.”
24 Řami sřin ɛecra n imeḥḍaren nneɣni man aya, xeyyqen aṭṭas x tnayen n wawmaten.
25 Maca Yasuɛ iřaɣa-dd xasen ɣares, inna: “Kenniw aqa tessnem belli řḥukkam n řegnus ḥekkmen xasen uca uřa d imeqqranen nsen ttṣellaṭen xasen.
26 War ittiři ammu jar awem, maca s řmeqřub: wenni ixsen ad yiři d ameqqran jar awem, ad yiři d amsexxar nwem,
27 u wenni ixsen ad yiři d amezwaru jar awem, ad yiři d amsexxar nwem,
28 am mammec Mmis n bnadem war dd-yusi ḥima ad xas sexxaren, maca ḥima ad xasen isexxar uca ad iwc tudart nnes d aṣřaḥ i waṭṭas n yewdan.”
Yasuɛ issgenfa tnayen n idarɣařen
29 Řami dd-iffeɣ Yasuɛ zi Ariḥa, iḍfar i-t-i-dd aṭṭas n řɣaci.
30 Xzar, aqa din tnayen n idarɣařen qqimen x ṭṭarf n webrid, řami sřin belli Yasuɛ ad iɛdu, řaɣan, nnan: “A Sidi, Mmis n Dawud, arḥem aneɣ!”
31 Maca řɣaci iziyyar xasen, ḥima ad sqaren. Maca nitni sɣuyen s jjehd ktar, nnan: “Arḥem aneɣ, a Siditneɣ, Mmis n Dawud!”
32 Xenni ibedd Yasuɛ, iřaɣa-dd xasen, inna: “Min texsem ad awem ggeɣ?”
33 Nnan as nitni: “A Siditneɣ, mařa texsed ad ttwarezment tiṭṭawin nneɣ.”
34 Yasuɛ iḥinn xasen, xenni iḥada tiṭṭawin nsen. Řexdenni dewřent tiṭṭawin nsen ttwařant, uca nitni ḍfaren t-i-dd.