11
Yasuɛ d Yuḥanna Amseɣḍaṣ
1 Awarni řami ikemmeř Yasuɛ řumur nnes i tenɛac n imeḥḍaren nnes, yuyur ssenni ḥima ad isseřmed u ad ibarreḥ di tneddam nsen.
2 Řami tuɣa Yuḥanna ittesřa di řeḥbes x řexdayem n Lmasiḥ, issekk ca zeg imeḥḍaren nnes.
3 Inna as: “Ma d Cek d wenni dd ɣa yasen niɣ ittxeṣṣa ad nraja ijjen nneɣni?”
4 Yarra-dd Yasuɛ, inna asen: “Ruḥem, tɛawdem i Yuḥanna min tesřam d min teẓrim!
5 Aqa idarɣařen ttwařan, ineɛḍaben gguren d yinni di iǧa řbarṣ ttwassizdigen, idehcar dewřen ttesřan, imettinen ttwassnekkaren-dd u Řexbar Aṣebḥan ittwabarraḥ i imezřaḍ.
6 Sseɛd n wenni war dayi ittendrifen.”
7 Řami uyuren ina, ibda Yasuɛ issawař ak-d řɣaci x Yuḥanna, inna: “Min ɣar dd-teffɣem ɣar řexřa maḥend ad t tẓarem? Ma ɣar ijj n uɣanim issenhezza t usemmiḍ?
8 Mařa lla, min ɣar dd-teffɣem ad t tẓarem? Ma ɣar ijj n bnadem s warruḍ yarḍeb? Xzar, inni yarrḍen arruḍ iɣřan yarḍeb, aqa aten di tudrin n ujeǧid.
9 Min ɣar dd-teffɣem xenni maḥend ad t tẓarem? Ijj n unabi? Wah, Necc ad awem iniɣ, aqa d ameqqran ɛad x unabi.
10 Maɣar aqa d wa d wenni i xef ittwari wawař-a: ‘Xẓar, ad dd-ssekkeɣ lmalak inu zzat i wudem nnec, wenni i ɣa isswejden abrid nnec zzatek.’
11 S tidett, Necc ad awem iniɣ, jar inni dd-ittwaxeřqen zi temɣarin, war dd-iffiɣ uřa d ijj d ameqqran x Yuḥanna Amseɣḍaṣ. Waxxa amenni ameẓyan di Tgeldit n ijenwan d ameqqran xas.
12 Zeg wussan n Yuḥanna Amseɣḍaṣ ař iḍa temmars Tgeldit n ijenwan i lɛunf, uca ayt n bu-řexcunet arezzun ttᵉṭṭfen tt.
13 Minzi marra inabiyyen d Ccariɛa tuɣa ttnabban ař dd-yas Yuḥanna.
14 Mařa texsem, qebřem aqa wanita d Iliya wenni tuɣa igga ad dd-yas.
15 Wenni ɣar iǧa imezzuɣen i useǧi ad iseř.”
16 “Wi ak-d i ɣa ssemquddeɣ jjiř-a? Aqa-t amecnaw iḥenjiren iqqimen di řeswaq ttřaɣan x imeddukkař nsen,
17 qqaren: ‘Aqa nɣennej i kenniw, kenniw war tecḍiḥem. Aqa newta awem agejdur, war tecḍinem.’
18 Maɣar yusa-dd Yuḥanna, war ittett, war isess, uca qqaren nitni: ‘Dayes ijj n cciṭan!’
19 Aqa Mmis n bnadem yusa-dd, ittᵉtt, isess, uca nitni qqaren: ‘Aqa din bnadem iřhef x macca d binu, Netta d ameddukkeř n ayt n ḍḍariba d imednab!’ Maca tiɣit tᵉttwasegged s řexdayem nnes.”
Řḥukm x tneddam i war yuminen
20 Řexdenni ibda ittwebbex tineddam i di igga aṭṭas n řeɛjayeb nnes, minzi nitenti war tubent ca.
21 “Uct xam, a Xurazin, uct xam, a Bayt-Ṣayda! Mři tuɣa ttwaggent di Ṣur d Ṣaydun řeɛjayeb ijehden tinni ittwaggen daykent, iři aqa tubent aṭṭas zeg wami s txancet n wecḍan d yiɣɣeḍ x izeǧifen nsent.
22 Maca Necc ad awem iniɣ: Ad yiři řḥař i tendint n Ṣur d Ṣaydun ihwen zi řḥař nwem deg wass n lḥisab.
23 I cem, a tandint n Kafarnaḥum, tenni ittwassgeɛɛden ař ajenna? Ɣar řaxart i ɣar dd ɣa tehwid. Minzi mařa ttwaggent di Sadum řeɛjayeb ijehden i dayem ittwaggen, iři aqa teqqim ař ass n yiḍa.
24 Maca Necc ad am iniɣ, ad yiři řḥař i temmurt n Sadum ihwen zi řḥař nnem deg wass n lḥisab.”
Taẓaǧit n Yasuɛ
25 Di řweqt nni ibda Yasuɛ ad yini: “Ḥemdeɣ Cek a Baba, Sidi n ujenna d temmurt, minzi tessnuffared aya x imiɣisen d imusnawen, maca tessaregbed aya i iḥenjiren.
26 Wah, a Baba, minzi d wa d arḍa i Cek.
27 Marra min iǧan immewc ayi-dd zi Baba, uca uřa d ijj war issin Mmis mɣir Babas, uca uřa d ijj war issin Babas mɣir Mmis u wi umi ixs Mmis ad t issargeb.”
28 “Asem-dd ɣari marra kenniw, inni yuḥřen d yinni yarbun ddqeř, uca Necc ad awem wceɣ arraḥet,
29 ksim-dd azayřu inu xawem, řemdem zzayi, minzi Necc d amhin d amwaḍeɛ n wuř uca ad tafem arraḥet i řeɛmur nwem.
30 Minzi azayřu d řeḥmeř inu fsusen.”