5
Asgenfi n ijj n umeryaḥ
1 Uca yiweḍ Netta ɣar ujemmaḍin n řebḥar di temmurt n Gadarinis.
2 Umi dd-iffeɣ zi tɣarrabut, iřqa i-t ijj n bnadem zeg imeḍřan dayes ijj n řaryaḥ d amengus.
3 Tuɣa izeddeɣ deg imeḍřan uca war izemmar ḥed ad t icarf uřa s ssnaseř,
4 minzi waxxa tuɣa carfen t aṭṭas n twařawin s iceddiyyen ɣar iḍaren u s ssnaseř, aqa netta iqḍu ssnaseř nni, yarẓa iceddiyyen u war izemmar ḥed ad t iqemmeɛ.
5 Tuɣa-t řebda, ass d ǧiřet, deg idurar u deg imeḍřan, isɣuyyu, iyezzem ixef nnes s iẓra.
6 Umi iẓra netta Yasuɛ zi řaggʷaj, yuzzeř uca isjed as.
7 Isɣuy s jjehd uca inna as: “Min din jar ayi akidek, a Yasuɛ, mmis n AREBBI, Amɛuǧi x kuřci. Ttzawgeɣ Cek s AREBBI, war d ayi ttmarrat!”
8 Minzi aqa inna as: “Ffeɣ zi bnadem-a, a řaryaḥ amengus!”
9 Isseqsa t: “Mammec d ac qqaren?” Yarra-dd, inna: “Isem inu ‘Lixyun’, man aya ixs ad yini ‘Abarru’, minzi neccin deg waṭṭas.”
10 Izawg i-t aṭṭas ḥima war t issiggʷej barra i temmurt nni.
11 Tuɣa din ɣar wedrar ict n tḥimart temɣar n iřfan tᵉtthedda.
12 Zawgen t ccwaṭen nni, nnan: “Sekk aneɣ ɣar iřfan, ḥima nzemmar ad daysen nadef.”
13 Isamḥ asen Yasuɛ. Řexdenni ffɣen řaryaḥ imengas zeg weryaz nni, udfen deg iřfan, uca tuzzeř tḥimart nni ɣar ijj n jjarf yuɛřan uca tewḍa di řebḥar. Tuɣa-ten ɛřaḥař deg wařfayen zzaysen uca ɣarqen di řebḥar.
14 Maca imeksawen n iřfan arewřen, xebbaren man aya di tendint u x iyyaren. Iwdan ffɣen-dd ḥima ad ẓaren min imsaren.
15 Usin-dd ɣar Yasuɛ, ttwařan amaryaḥ i dayes tuɣa ccwaṭen, wenni di tuɣa izeddeɣ ‘Lixyun’, iqqim, yarḍ, s řbař nnes, uca ggʷeden.
16 Inni iẓrin man aya, xebbaren ten min imsaren i umaryaḥ i di tuɣa ccwaṭen, u ɛawed x yiřfan nni.
17 Uca bdan ttzawgen t maḥend ad iggʷej x temmurt nsen.
18 Řami inya Netta di tɣarrabut, izawg i-t umaryaḥ i dayes tuɣa ccwaṭen ḥima ad iqqim akides.
19 War t ijji, maca inna as: “Ruḥ ɣar taddart nnec d řaǧ nnec, xebbar i-ten marra min zzayek igga SIDI, mammec xak yarḥem.”
20 Uca iruḥ, ibda ittbarreḥ di Dikapulis marra min d as igga Yasuɛ, uca marra tbehten.
Yeǧis n Yayrus - Tamɣart tehřec řqedd n tenɛac n iseggʷusa
21 Awarni řami iẓwa Yasuɛ s tɣarrabut ɣar ujemmaḍ, imun-dd xas ɛawed aṭṭas n řɣaci am tuɣa-t x tma n řebḥar.
22 Yusa-dd ɛawed ijjen zeg imeqqranen n temzida, qqaren as Yayrus. Umi t iẓra, iwḍa as ɣar iḍaren.
23 Izawg i-t aṭṭas, inna as: “Iǧi tmaẓuẓt tḥeřc aṭṭas. Ttzawgeɣ Cek ad dd-tased, ad xas tessarsed ifassen nnec, ḥima ad teggenfa, ad teddar.”
24 Iruḥ akides uca iḍfar i-t-i-dd waṭṭas n řɣaci, uca nitni deḥḥsen t.
25 Maca tuɣa din ict n temɣart ttazzřen zzayes idammen tenɛac n iseggʷusa,
26 uca tekka xas tamara aṭṭas zeg iḍbiben umi tessuffeɣ marra min ɣares, maca war testenfiɛ s walu, uca yarni ɛad xas řḥař.
27 Aqa tesřa x Yasuɛ uca tusa-dd ɣares am tekka x ddḥas n řɣaci zi ḍeffar nnes uca tḥada arruḍ nnes,
28 minzi tenna: “Mařa ḥadiɣ mɣir arruḍ nnes, ad qqimeɣ ddareɣ.”
29 Řexdenni yuẓeɣ usizzeř n idammen, tuca ak-d arrimet nnes belli teggenfa zi řehřac nnes.
30 Řexdenni yuca Yasuɛ ak-d Yixef nnes belli iffeɣ zzayes jjehd uca inneqřeb ɣar řɣaci, inna: “Wi iḥadan arruḍ inu?”
31 Nnan as imeḥḍaren nnes: “Cek twařid řɣaci ideḥḥes i Cek u Cek tesseqsid: ‘Wi d ayi iḥadan?’ ”
32 Maca iqqim ixezzar ḥima ad iẓar wi yeggin man aya.
33 Tuɣa tameṭṭut teggʷed, tᵉttarjiji, am tessen min d as imsaren, uca tusa-dd, tewḍa as ɣar iḍaren uca tɛawed as tidett marra.
34 Xenni inna as: “A yeǧi, l’iman nnem aqa iwca am tudart, ruḥ s řehna ad tiřid teggenfid zi řehřac nnem!”
35 Am tuɣa ɛad issawař, usin-dd ca zi taddart n umeqqran n temzida, nnan as: “Iǧic temmut, mayemmi tṣeddaɛed ɛad Amseɣɣar?”
36 Maca Yasuɛ isřa awařen i innan uca inna i umeqqran n temzida: “War tteggʷed ca! Amen waha!”
37 War ismiḥ uřa i yijjen ad t yuyur akides, mɣir Cimɛun Buṭrus d Yaɛqub d Yuḥanna, umas n Yaɛqub.
38 Usin-dd ɣar taddart n umeqqran n temzida uca iẓra i-ten ccaten agejdur, ttrun uca sɣuyyun.
39 Umi dd-yudef, inna asen: “Mayemmi teccatem agejdur, tᵉttrum? Taḥenjirt war temmut ca, maca aqa tᵉṭṭeṣ.”
40 Nitni ḍeḥcen zzayes. Maca Netta issuffeɣ i-ten kuřci barra uca yiwi akides babas d yemmas n tḥenjirt d yinni tuɣa akides, xenni yudef-dd mani tuɣa tᵉttwassars tḥenjirt.
41 Iṭṭef deg ufus n tḥenjirt, inna as: “Kkar, a taḥenjirt!”
42 Řexdenni tekkar tḥenjirt uca tuyur, minzi tuɣa taḥenjirt ɣares tenɛac n iseggʷusa. Tbehten nitni s yijj n utebhet imɣar.
43 Uca Netta yumur i-ten s jjehd, ḥima uřa d ijjen ad ibarreḥ s man aya. Xenni iweṣṣa ad as wcen ḥima ad tecc.