11
Adaf n Yasuɛ ɣar Urcalim am ujeǧid
1 Umi dd-qarrben ɣar Urcalim zeg uɣezdis n Bayt-Faji d Bayt-Ɛanya, zzat i wedrar n Zzitun, issekk tnayen n imeḥḍaren nnes,
2 inna asen: “Ruḥem ɣar dcar nni qibač nwem. Xmi ɣares i ɣa tadfem, řexdenni ad tafem ijj n wesnus iqqen, war xas inyi uřa d ijj n bnadem. Fesyem as-dd uca awyem t-i-dd ɣari.
3 Mařa inna awem ḥed: ‘Mayemmi i tᵉtteggem aya?’, xenni inim: ‘Aqa Siditneɣ iḥdaj i-t, uca řexdenni ad t-i-dd-issekk da ɛawed.’ ”
4 Nitni ruḥen, ufin asnus nni iqqen ɣar tewwart barra x webrid. Řami d as dd-arxun,
5 nnan asen ca n yinni tuɣa din ibedden: “Min tᵉtteggem, tfessyem i wesnus?”
6 Nnan asen am mammec ten iweṣṣa Yasuɛ, uca jjin ten.
7 Iwyen-dd asnus ɣar Yasuɛ, ssarsen xas arruḍ nsen uca inya xas Yasuɛ
8 Aṭṭas ssun arruḍ nsen x webrid, ca nneɣni qessen-dd řefruɛ ak-d wafriwen zi tcejjura uca ssun ten ɛawed x webrid.
9 Inni t izwaren d yinni t-i-dd-iḍfaren, tuɣa sɣuyyun s jjehd, qqaren: “Uṣanna! Lbaraka i Wenni dd-yusin s Yisem n SIDI!
10 Ad tᵉttwabarek Tgeldit tenni i dd ɣa yasen s ufus n babatneɣ Dawud. Uṣanna di řuɛřa x řuɛřa n ijenwan!”
11 Yusa-dd Yasuɛ ɣar Urcalim, yudef ɣar Zzawect Tameqqrant uca iẓra marra min din imsaren. Řami tuɣa issutem řḥař, iffeɣ ɣar Bayt-Ɛanya ak-d tenɛac.
Anɛař n wartu
12 Tiwecca nnes, řami dd-iffeɣ zi Bayt-Ɛanya, iṭṭef i-t-i-dd řaẓ.
13 Umi iẓra zi řaggʷaj ijj n wartu n tazart ɣares tifray, yuyur din ḥima ad yarzu ma ad taɣ ad dayes yaf ca. Umi ɣares dd-yiweḍ, war yufi walu mɣir tifray, minzi war tuɣi bu řweqt n tazart.
14 Iṭṭef deg wawař, inna as i wartu: “Zi řexxu d tsawent war zzayem ittett uřa d ijj ɛad řɣiǧet.” Tuɣa imeḥḍaren nnes ttesřan min iqqar.
Yasuɛ d isebbaben di Taddart Iqeddsen
15 Uca yudef Yasuɛ ɣar Zzawect Tameqqrant n AREBBI, ibda issuffuɣ imsewwaqen d isebbaben nni iǧan di Zzawect Tameqqrant, uca ibda issneqřab ṭṭwabeř n iṣarrafen n tmenyat d řekrasi n yinni tuɣa iznuzan idbiren,
16 uca war ijji ḥed ad iɛdu Zzawect Tameqqrant uřa s ict n řqecɛet.
17 Tuɣa isseřmad, inna asen:
“Ma war turi:
Taddart inu ad as řaɣan
‘Taddart n tẓaǧit i marra řegnus?’
Maca kenniw tarrim tt
d ifri n iceffaren.”
18 Imseřmaden n idlisen d imeqqranen n ikehhanen sřin man aya, kkaren uca arezzun mammec ɣa ggen ad t nɣen, minzi ggʷeden zzayes, minzi řɣaci marra tuɣa ittebhet s useřmed nnes.
19 Řami dd-tewḍa tmeddit, ffɣen ɣar barra n tendint.
Artu isřaw
20 Di ṣṣbeḥ zic, řami dinni ɛdun, ẓrin belli wartu nni isřaw zeg iẓewran.
21 Cimɛun iften, xenni inna as: “A Amseřmad inu, xzar, artu i tneɛřed, aqa isřaw.”
22 Yarra-dd Yasuɛ, inna asen: “Maɛlik ad daywem yiři l’iman n AREBBI,
23 maɣar s tidett, Necc ad awem iniɣ, mařa ḥed ad yini i wedrar-a: ‘Meksi, wḍa di řebḥar!’, war ittcekki deg wuř nnes maca ad yamen belli min inna ad iffeɣ, iwa aqa ad iffeɣ i netta am mammec inna netta.
24 S uyenni Necc ad awem iniɣ, marra min ɣa tᵉttarem am tᵉttẓaǧam, amnen belli ad t tkesbem, uca ad ɣarwem yiři.
25 U xmi ɣa tbeddem tᵉttẓẓaǧam, ɣfarem min ɣarwem x ca n ijjen, ḥima ad awem iɣfar ɛawed Babatwem i iǧan deg ijenwan ddnub nwem.
26 Mařa war tɣeffarem kenniw, war d awem iɣeffar uřa d Babatwem i iǧan deg ijenwan i ddnub nwem.”
Aseqsi x ttesriḥ n Yasuɛ
27 Usin-dd ɛawed ɣar Urcalim. Am tuɣa iggur di Zzawect Tameqqrant, qarrben-dd ɣares imeqqranen n ikehhanen d imseřmaden n idlisen d imɣaren n řgens.
28 Nnan as: “S man ttesriḥ i zi tᵉttegged timesřayin-a? Wi d ac iwcin ṣṣulṭa-ya ḥima ad tegged timesřayin-a?”
29 Yarra-dd Yasuɛ, inna asen: “Uřa d Necc ad kenniw sseqsiɣ ijj n useqsi, ḥima kenniw ad xafi tarrim, uca xenni uřa d Necc ad awem iniɣ s man ttesriḥ i zi tteggeɣ aya.
30 Aseɣḍaṣ n Yuḥanna, ma ikka-dd zeg ujenna niɣ zeg iwdan? Arrem-dd xafi!”
31 Mcawaren jar asen, nnan: “Mařa nenna: ‘Zeg ujenna!’, ad yini: ‘Mayemmi war zzayes tuminem?’
32 Maca mařa nenna: ‘Zeg iwdan!’, xenni ittxeṣṣa ad neggʷed zi řgens!”, minzi marra ḥesben Yuḥanna d anabi s tidett.
33 Arrin-dd, nnan i Yasuɛ: “War nessin!” Netta inna asen: “Xenni uřa d Necc war d awem qqareɣ zi man ttesriḥ i zi tteggeɣ timesřayin-a.”