3
Řḥukkam d inabiyyen n Israil ttfecřen
1 “Xenni nniɣ necc:
‘Sřem, a kenniw, izeǧifen n Yaɛqub,
u kenniw, řḥukkam n taddart n Israil!
Ma war ittxeṣṣi i kenniw
ad tessnem tasɣart?
2 Nitni carrhen min icnan
u ttexsen min iǧan d aɛeffan!
Nitni kksen asen tiřmect
uřa d aysum x iɣsan nsen.
3 Wah, aqa aten d yinni ittetten
aysum n řgens inu
uca kksen asen tiřmect
uca ttareẓẓan iɣsan nsen.
Nitni ttbezzaɛen ten am di marmita,
am weysum deg uṭenjir.”
4 “Řexdenni ad sɣuyen ɣar SIDI,
maca war xasen dd-ittarri.
Ad xasen iffar udem nnes di řweqt nni,
zi ssibbet n řɣar i iggin.”
5 “Ammu i iqqar SIDI i inabiyyen
inni ittɣarran řgens inu,
inni umi ɣarsen ɛad min di
i ɣa izeɛfen s teɣmas nsen,
ad řaɣan ‘Řehna!’,
maca ḍidd n wenni war d asen ittegg
walu deg uqemmum nsen,
ad xas qeddsen ijj n umenɣi.
6 S uya ad xawem dd-tewḍa ǧiřet,
břa řewḥiy,
u ad xawem dd-iwḍa taǧest
břa tagezzant.
Ad teɣři tfuct x inabiyyen
u ad ibbarcen wass tiwa nsen.
7 Imwařawen ad seḍḥan,
u igezzanen ad dewřen
zewɣwen s řeḥya,
u nitni marra ad řeḥḥfen acřaɣem
ɣar uyencic,
minzi twarrit n AREBBI
war dd-tᵉttis ca.
8 Maca necc ccureɣ s jjehd
n Arruḥ n SIDI,
u s řḥeqq d teryast,
ḥima ad barrḥeɣ i Yaɛqub
x uxeṭṭu nnes
u i Israil x ddenb nnes.”
9 “Sřem xenni ɣar man aya,
a izeǧifen n taddart n Yaɛqub
u kenniw imeqqranen
n taddart n Israil,
inni icarrhen řḥeqq,
u ssfarraɣen marra min iǧan iseggem,
10 inni ibennan Ṣihyun s idammen,
u Urcalim s řɣecc.
11 Izeǧifen nnes ttḍebbaran
ddɛawi i arrecwet,
ikehhanen nnes sseřmaden s řmunet,
u ikehhanen nnes
ttgezzanen s tmenyat.
Aqa nitni ttcařen x SIDI xmi qqaren:
‘Ma war iǧi SIDI di řwest nneɣ?
War d aneɣ iřeqqef řɣar.’
12 S uya, aqa-tt zzaywem,
aqa ad carzen Ṣihyun am yijj n yeyyar,
ad tedweř tendint n Urcalim
d ict n řxarbet,
u adrar n Taddart d řegɛudi n wezɣar.”