22
1 Issiweř SIDI ak-d Musa, inna:
2 “Siweř ak-d Harun u ak-d warraw nnes, maḥend, mařa ittxeṣṣa, war ttakkwaḍen ɣar tewhibin iqeddsen n ayt n Israil tinni d ayi ssqeddsen, ḥima war ssexsaran Isem amqeddas inu. Necc d SIDI!
3 Ini asen: ‘Marra aryaz zi zzariɛet nwem di marra jjiřat nwem, wenni dd ɣa iqarrben ɣar tewhibin iqeddsen, tinni ssqeddsen ayt n Israil i SIDI, am ixmej netta, aqa ad ittwaqess řeɛmar nni zi zzat i wudem inu. Necc d SIDI.
4 Uřa d ijjen zi zzariɛet n Harun nni di iǧa řbarṣ niɣ wenni ɣar iǧa useyyeř, war ittett zi tewhibin iqeddsen ař ɣa yiři izdig. Wenni iḥadan ca zi min ittwassxemjen s ijj n umettin niɣ s ijj n weryaz nni tuɣa s useyyeř n waǧu,
5 niɣ s ijj n weryaz nni iḥadan ca min ittbuɛen i zi idweř ixmej, niɣ iḥada ijj n bnadem i zi idweř ixmej s mammec ma tegga texmuji nnes,
6 řeɛmar nni iḥadan tmesřact niɣ bnadem nni ad yiři ixmej ař tameddit, war ittett zi tewhibin iqeddsen, mɣir awarni i ɣa issird arrimet nnes s waman.
7 Xmi dd ɣa teɣři tfuct, ad yiři izdig. Awarni aya ad yecc zi tewhibin iqeddsen, minzi aqa atent d macca nnes.
8 War ittett zeg ict n řxecbet niɣ zeg ijj n umuddar imezzqen, minzi zzayes i ɣa issexmej ixef nnes, Necc d SIDI!
9 Ad ḥḍan min xef ten weṣṣiɣ, ḥima war ssarebbun x yixef nsen ddenb u xenni ad zzayes mmten, xmi ɣa ssɛiǧten aya. Necc d SIDI wenni ten issqeddsen.
10 Uřa d ijj n ubarrani war ittett zi tewhibt iqeddsen. Amɛezzeb i izeddɣen jar ikehhanen uřa d acewwař war ttᵉtten zi tewhibt iqeddsen.
11 Maca mařa akehhan isɣa ijj n bnadem s nnuqart nnes, aqa iɛeddeř i wa maḥend ad yecc zi macca n tewhibt nnes, uřa i yinni dd-ittwaxeřqen di taddart nnes.
12 Mařa yeǧis n ukehhan tedweř d tamɣart n ijj n ubarrani, war tᵉttett ca zi tewhibt i dd-ittwassgeɛɛden zi tewhibin iqeddsen.
13 Maca mařa yeǧis n ukehhan aqa-tt d tajjač niɣ tᵉttwaǧef zeg weryaz nnes uca war ɣares aḥenjir uca tedweř-dd ɣar taddart n babas, am di temẓi nnes, xenni ad tecc zi macca n tewhibt n babas, maca uřa d ijj n ubarrani ad zzayes yecc.
14 Mařa ca n yijjen icca zi tewhibt iqeddsen s uweddar, xenni ad ɣares yarni tasɣart n texmusect uca ad yarr tawhibt iqeddsen ɣar ukehhan.
15 War iɛeddeř ad ssexsaren tiwhibin iqeddsen n ayt n Israil, tinni ssgeɛɛden nitni ɣar SIDI,
16 ařami i ɣa ssarbun amarwas n řmuɛṣiyyet x ayt n Israyil, umi ɣa ccen nitni zi tewhibin nsen iqeddsen i d yawyen nitni s yixef nsen, minzi Necc d SIDI, wenni ten issqeddsen.’ ”
Tiɣarṣa i iṭṭewɛen ayt n Israil
17 Issiweř SIDI ak-d Musa inna:
18 “Siweř ak-d Harun d warraw nnes u ak-d marra ayt n Israil uca ini asen: ‘D man aya iggur i kuř ijjen zi taddart n Israil u i ibarraniyyen di Israil, wenni i ɣa yiwyen tawhibt nnes tenni dd-yusin ak-d marra řewɛud nsen d marra tiwhibin nsen nni wcin s řxaḍar, tenni qeddmen nitni d taɣarṣt n wecmaḍ i SIDI.
19 Maḥend ad kenniw yarr ad tiřim tᵉttwaqebbřem ittxeṣṣa ad tiři tewhibt d ijj n wewtem icnan qaɛ zeg ifunasen niɣ zeg izmaren niɣ zeg icarriyyen.
20 War iɛeddeř ad tqeddmem ca n řmař dayes aneɛḍab, minzi aya war kenniw dd-ittarri ad daywem ittwaf arḍa.
21 Mařa ijj n weryaz iqeddem ict n tɣarṣt n řehna ɣar SIDI, maḥend ad ikemmeř ijj n lwaɛd niɣ am yict n tewhibt s řxaḍar, xenni ad tiři taɣarṣt d ijj n umuddar icnan qaɛ zi řebhayem niɣ zeg wuǧi, ḥima ad dayes ittwaf arḍa. War iɛeddeř ad dayes yiři uřa d ijj n řɛib.
22 Min iǧan d adarɣař niɣ min ittwarẓen niɣ min di iǧan ijj n uyezzim yarezmen niɣ min di ǧant tfiḍřiwin niɣ jdam niɣ ccamet texsar war t-i-dd-tessqarrabem ca ɣar SIDI uca war zzayes ttiwyem tawhibt n tmessi i SIDI x uɛalṭar.
23 Maca ijj n ufunas niɣ ijjen zeg wuǧi i iqebḥen zi ssibbet n tuzzeggart niɣ tuquḍeḍt aṭṭas, iɛeddeř ad t-i-dd-tesswejded am yict n tewhibt s řxaḍar, maca war dayes ittwaf arḍa i yijj n lwaɛd.
24 Min idgeddgen, min iřebzen, min imezzqen, min ittwaqessen war t ttiwyem ɣar SIDI, war tteggem aya di temmurt nwem.
25 Zeg ufus n mmis n ubarrani war ttqeddamem ca zi marra man aya uřa d ict n tewhibt d macca i AREBBI, minzi dayes řɣecc nsen uřa d nneqṣan nnes, man aya war ittwaqebbiř ca di ṭṭweɛ nwem.’ ”
26 Issiweř SIDI ak-d Musa, inna:
27 “Xmi dd-ixeǧeq ufunas niɣ izmar niɣ iɣayḍ, xenni ad yiři sadu ḥeṭṭu n yemmas sebɛa n wussan. Zeg wass wiss tmenya u awarni as ad iṣřeḥ i yarḍa am tewhibt n tmessi i SIDI.
28 War iɛeddeř ad tɣarṣed i ufunas niɣ i yijjen zeg wuǧi ak-d mmis deg wass d ijj.
29 X minni texsem ad tqeddmem tawhibt n uqadi i SIDI, qeddem xenni min iṣeřḥen i yarḍa nwem.
30 Ad tᵉttwacc deg wass nni nnit. War zzayes ttejjim ca ař ṣṣbeḥ. Necc d SIDI!
31 Ad teḥḍam tiweṣṣa inu uca ad zzaysent teggem. Necc d SIDI!
32 War ssexsaram Isem inu iqeddsen, ḥima Necc ad ttwaqeddseɣ di řwest n ayt n Israil. Necc d SIDI, wenni kenniw issqeddsen,
33 d wenni kenniw dd-issuffɣen zi temmurt n Miṣra, ḥima ad iřiɣ d AREBBI i kenniw. Necc d SIDI!’ ”