9
Yasuɛ issekk tenɛac n rrusul nnes
1 Yasuɛ iřaɣa-dd ɣares tenɛac n rrusul nnes, iwca asen jjehd d ṣṣulṭa x marra ccwaṭen u x marra řehřacat, ḥima ad ssgenfan iwdan.
2 Issekk i-ten ḥima ad barrḥen s Tgeldit n AREBBI u ḥima ad ssgenfan imehřac.
3 Inna asen: “War kessim walu deg webrid niɣ taɣɣarct niɣ ttesṭim niɣ aɣrum uřa d nnuqart, uca war kessim uřa d tnayen n tcamirat.
4 Man taddart i ɣa tadfem, qqimem dinni uca ffɣem ssenni.
5 Mařa teffɣem zi tendint, zerzem xenni taɛejjajt zeg iḍaren nwem qibač i yinni war kenniw iqebbřen, d cchadet xasen.”
6 Xas uca ffɣen rrusul, tuɣa ttcuqan di dcurat d tneddam. Nitni ttbarrḥen s Řexbar Aṣebḥan, ssgenfan imehřac di kuř amcan.
Hirudus yarjef umi isřa x marra min igga Yasuɛ
7 Hirudus, řḥakem x ijj n arbeɛ n temmurt isřa x marra min ittwaggen zzayes uca yarjef, minzi ca n iwdan nnan, aqa Yuḥanna ikkar-dd zi taddart n imettinen.
8 Ca nneɣni nnan aqa Iliya iḍhar-dd u ca nneɣni ɛawed aqa ijjen zeg inabiyyen n wecḥař uya ikkar-dd.
9 Inna Hirudus: “Aqa d necc i iqessen azeǧif n Yuḥanna, maca manis Wa i xef sřiɣ marra man aya?” Uca tuɣa yarezzu ad t iẓar.
Lmuɛjiza n usecci amezwaru
10 Umi dd-ɛeqben rrusul, ɛawden i Yasuɛ marra min ggin. Xenni yiwyi ten akides ɣar ijj n wemcan ixřa ɣar Bayt-Ṣayda, ḥima ad iřin weḥḥedsen akides.
11 Umi yargeb řɣaci x man aya, iḍfar i-t. Netta tuɣa yareḥḥeb zzaysen, issiweř akidsen x Tgeldit n AREBBI u inni ḥdajen ad ttwassgenfan, issgenfa i-ten.
12 Řami ibda řḥař issutum, qarrben-dd ɣares imeḥḍaren nnes, nnan as: “Sekk řɣaci, ḥima ad raḥen ɣar ředcur d iyyaren i d asen dd-innḍen, ad dinni afen mani ɣa ssensen d min ɣa ccen, minzi aqa aneɣ da deg ijj n wemcan ixřan.”
13 Maca Yasuɛ inna asen: “Wcem asen kenniw ḥima ad ccen.” Nnan as: “War ɣarneɣ mɣir xemsa n tecnifin d tnayen n iseřman, niɣ ittxeṣṣa ad nraḥ ad nseɣ macca i marra iwdan-a!”
14 Minzi tuɣa aten di ca n xemsařaf n yeryazen. Maca Yasuɛ inna asen: “Sɣimem ten di tɛurricin n xemsin.”
15 Uca ggin imeḥḍaren amenni uca ssɣimen ten marra.
16 Iksi Yasuɛ ticnifin s xemsa uřa d tnayen n iseřman nni, issgeɛɛed tamuɣři nnes ɣar ujenna, uca ibark i-tent, yarẓa uca iwca zi tecnifin nni i imeḥḍaren nnes, ḥima ad wcen i řɣaci.
17 Ccin, jjiwnen marra. Ařami d jarwen min iqqimen zeg iřeqqwaz, tuɣa dinni tenɛac n tsuǧatin.
Cchadet n Cimɛun Buṭrus
18 Am tuɣa Yasuɛ ittẓaǧa weḥḥdes, am tuɣa imeḥḍaren akides, isseqsa ten, inna: “Min iqqar řɣaci min ɛniɣ?”
19 Arrin-dd, nnan as: “ ‘Yuḥanna Amseɣḍaṣ!’, u inneɣni: ‘Iliya!’, u ca inneɣni: ‘Aqa ikkar-dd ijj n unabi, ijjen zeg inabiyyen n wecḥař uya’.”
20 Inna asen: “I kenniw, min teqqarem min ɛniɣ?” Yarra-dd Cimɛun, inna: “Lmasiḥ n AREBBI.”
21 Xenni iɛřem asen s jjehd uca iweṣṣa ten, war t qqaren i ḥed.
Yasuɛ issawař x řmewt d tnukra nnes i twařa tamezwarut
22 Inna asen: “Ittxeṣṣa i Mmis n bnadem ad iweddeb aṭṭas uca ad immenḍar zeg imɣaren n řgens d imeqqranen n ikehhanen d imseřmaden n idlisen, ad ittwaneɣ uca deg wass wiss třata ad dd-ikkar.”
23 Xas uca inna i marra: “Mařa ixs ḥed ad dd-yas awarni ayi, ittxeṣṣa as ad inkar ixef nnes, ad iksi ṣṣalib nnes kuř ass uca ad ayi dd-iḍfar.
24 Minzi wi ixsen ad issenjem tudart nnes, ad tt iweddar. Maca wi ixsen ad iweddar tudart nnes di ṭṭweɛ inu, ad tt issenjem.
25 Minzi man řefḍeř i bnadem mařa yarbeḥ ddunect marra, maca ad yareddeǧ řeɛmar nnes niɣ ad t iweddar?
26 Minzi wenni i ɣa iseḍḥan zzayi u zeg wawařen inu, ad zzayes iseḍḥa ɛawed Mmis n bnadem xmi dd ɣa yas deg uɛuǧi nnes u deg uɛuǧi n Babas ak-d lmalakat nnes iqeddsen.
27 S tidett, Necc ad awem iniɣ, aqa ca zeg inni da iḥḍaren, war ttqisin ca řmewt ař ɣa ẓaren Tageldit n AREBBI.”
Asɛuǧi n Yasuɛ x wedrar
28 Ɛřaḥař tmenya n wussan awarni řami inna awařen-a, iwyi-dd Yasuɛ akides Cimɛun d Yaɛqub d Yuḥanna uca igeɛɛed ɣar wedrar, ḥima ad iẓẓaǧ.
29 Am tuɣa ittẓaǧa, ibeddeř wudem n uɣembub nnes u arruḍ nnes idweř d acemřař ittissiqen.
30 Xzar, tnayen n yeryazen ssiwřen akides, tuɣa aten d Musa d Iliya,
31 inni dd-iḍharen s uɛuǧi, tuɣa ssawařen x wuffuɣ nnes i tuɣa i ɣa ittwakemmeř di Urcalim.
32 Cimɛun d yinni akides, tuɣa ikka xasen yiḍeṣ, ařami ɛřayen war zemmaren ad qqimen faqen. Nitni ẓrin aɛuǧi nnes d tnayen n yeryazen bedden akides.
33 Ařami xas farqen ina, inna Cimɛun i Yasuɛ: “A Amseřmad inu, aqa mliḥ umi i da neǧa. Ejj aneɣ ad newwet třata n iɛuccuten n tseṭṭa, ijjen i Cek, ijjen i Musa u ijjen i Iliya.” Netta maca war issin min inna.
34 Awarni řami inna man aya, ikka-dd xasen ijj n useynu, issduriy i-ten uca nitni dewřen ggʷeden umi ẓrin Musa d Iliya udfen ɣar useynu.
35 Tusa-dd ict n tmijja zeg ujenna, teqqar: “D wa d Mmi Iɛizzen, sřem ɣares!”
36 Ařami dd-tusa tmijja, ufin Yasuɛ weḥḥdes. Nitni ssqaren uca war xebbaren ḥed deg wussan nni s min ẓrin.
Asgenfi n ijj n uḥenjir dayes řaryaḥ d amengus
37 Tiwecca nnes, ařami tuɣa dd-hekkwan zeg wedrar, iřqa ten-i-dd ijj n řɣaci d ameqqran.
38 U xzar, ijj n weryaz zi řɣaci isɣuy, inna: “A Amseɣɣar, ttzawgeɣ Cek, ḥinn xafi, aqa-t d ayenni n mmis i ɣari.
39 Xzar, itteṭṭef i-t ijj n řaryaḥ, xenni isɣuyyu deɣya, ittɣeẓẓa tiɣmas u ittekk as-dd kuffu zeg uqemmum, ɛřaḥar war d as yarexxu am t iyezzem ammu.
40 Ttareɣ zeg imeḥḍaren nnec ad t ssuffɣen, maca war zemmaren.”
41 Yarra-dd Yasuɛ, inna: “A jjiř i war yuminen imɛewwjen, mecḥař ɣarwem i ɣa kkeɣ ad kenniw ksiɣ? Awi-dd mmic da!”
42 Ařami ɣares t-i-dd-issqarreb, inḍar i-t cciṭan di temmurt, imezzeq i-t. Maca Yasuɛ iwebbex řaryaḥ amengus, issgenfa aḥenjir uca yarra i-t i babas.
Yasuɛ issawař x řmewt d tnukra nnes i twařa wiss tnayen
43 Marra tuɣa ttɛejjben di řemɣaret n AREBBI. Uca umi tbehten marra nitni di marra min igga Yasuɛ, inna i imeḥḍaren nnes:
44 “Ggem awařen-a deg imezzuɣen nwem, minzi Mmis n bnadem ad immewc deg ifassen n iwdan.”
45 Maca nitni war fhimen i wawař-a, tuɣa ittwassnuffar xasen maḥend war t fehhmen. Uca nitni ggʷeden ad t sseqsan x wawař-a.
Man wen iǧan d ameqqran?
46 Yudef i-ten ijj n umcubbec x man wen zzaysen i ɣa yiřin d ameqqran qaɛ.
47 Maca issen Yasuɛ axarreṣ n wuřawen nsen uca iksi ijj n uḥenjir issbedd i-t ɣares.
48 Inna asen: “Wi ɣa iqebřen aḥenjir-a s Yisem inu, iqbeř ayi Necc, u wi d ayi ɣa iqebřen, iqbeř wenni d ayi dd-issekken. Minzi wenni d ameẓyan qaɛ jar awem, netta ad yiři d ameqqran.”
Wi war iǧin ḍidd nwem, netta aqa-t akidwem
49 Iṭṭef Yuḥanna deg wawař, inna: “A Amseřmad nneɣ, neẓra ijjen issuffuɣ ccwaṭen s Yisem nnec uca nessbedd i-t, minzi netta war Cek iḍeffar jmiɛ akidneɣ.”
50 Inna as Yasuɛ: “War t sbeddam, minzi wi war iǧin ḍidd nwem, aqa-t akidwem.”
Yasuɛ deg ijj n dcar n Isamiriyyen
51 Umi dd-iwḍen ad kemmřen wussan n tmeksit nnes nnes ɣar ujenna, yarra aɣembub nnes ɣar Urcalim.
52 Issekk zzates ireqqasen, uca ina udfen ɣar ijj n dcar n Isamariyyen, ḥima ad as wejden din.
53 Nitni maca war t qbiřen, minzi yarra aɣembub nnes, ḥima ad iraḥ ɣar Urcalim.
54 Umi ẓrin Yaɛqub d Yuḥanna, imeḥḍaren nnes, man aya, nnan: “A Siditneɣ, ma texsed ad numur, ḥima ad dd-tehwa tmessi zeg ujenna, maḥend ad ten tecc am mammec igga ɛawed Iliya?”
55 Maca am dd-inneqřeb, iwebbex i-ten, inna: “War tessinem ca man arruḥ i zi teǧam kenniw!
56 Minzi Mmis n bnadem war dd-yusi ca ḥima ad isshellek řeɛmur n iwdan, maca ḥima ad iwc Tudart!” Xenni ruḥen ɣar dcurat nneɣni.
Aḍfar n Yasuɛ
57 Am gguren nitni deg webrid, inna as ijj n weryaz: “A Sidi inu, ad Cek ḍfareɣ mani ma i ɣa traḥed.”
58 Inna as Yasuɛ: “Iceɛbawen ɣarsen ifran d ijḍaḍ n ujenna ɣarsen řeɛwacc, maca Mmis n bnadem war ɣares uřa mani ɣa isenned azeǧif nnes.”
59 Inna i wenneɣni: “Ḍfar ayi-dd!” Maca wanita inna: “A Sidi inu, ejj ayi amezwar ad areggʷeḥeɣ ad neḍřeɣ baba!”
60 Maca inna as Yasuɛ: “Ejj imettinen ad neḍřen imettinen nsen, maca cek ruḥ, tbarrḥed s Tgeldit n AREBBI.”
61 Inna as wenneɣni: “Ad Cek ḍfareɣ, a Sidi, maca ejj ayi amezwar ad ggeɣ allah ihennik x yinni ɣari di taddart inu, xenni ad dd-aseɣ.”
62 Inna as Yasuɛ: “Uřa d ijj, mařa issrusa afus nnes x usɣar, xenni ad ixzar ɣar ḍeffar, ad iṣřeḥ i Tgeldit n AREBBI.”