7
L’iman n řqebṭan arumani
1 Awarni řami ikemmeř marra awařen nnes am d as sřan iwdan, yudef Yasuɛ ɣar Kafarnaḥum.
2 Amsexxar n ijj n řqebṭan x mya, wenni tuɣa issɛizz aṭṭas, tuɣa ihřec, war d as iqqim ca ad immet.
3 Umi isřa x Yasuɛ, issekk ɣares ca n imɣaren n Wudayen, ittar as maḥend ad dd-yas uca ad issenjem amsexxar nnes.
4 Řami dd-iwḍen ɣar Yasuɛ, ḥeccmen t aṭṭas, nnan: “Aqa isdaheǧ ad as tegged aya,
5 minzi netta ittexs řgens nneɣ u ibna aneɣ tamzida.”
6 Xas uca iruḥ Yasuɛ akidsen. Ařami tuɣa war iggʷij ɛad x taddart, issekk řqebṭan x mya ca n imeddukkař ɣares, uca netta inna as: “A Sidi, war ssiḥiř ixef nnec, minzi necc war sdiheǧeɣ ad tadfed sadu tazeqqa inu.
7 S uyenni necc war ḥesbeɣ ixef inu sdaheǧeɣ ḥima ad ɣarek dd-aseɣ, maca ini awař waha uca ad iggenfa umsexxar ameẓyan inu.
8 Minzi uřa d necc ɛawed d ijj n bnadem sadu ifassen i ǧiɣ u ɣari ɛawed iɛeskariyyen swadday i ufus inu. Qqareɣ i wa: ‘Ruḥ!’, xenni ittraḥ, i wenneɣni: ‘As-dd!’, xenni ittas-dd uca i umsexxar inu: ‘Egg aya!’, xenni ittegg i-t.”
9 Umi isřa Yasuɛ aya, ittebhet dayes. Inneqřeb uca inna i řɣaci wenni tuɣa i-t-i-dd-iḍeffaren: “Necc ad awem iniɣ, war ufiɣ uřa di marra Israil l’iman ameqqran am řqedd n wa.”
10 Ařami ɛeqben inni ittwassekken ɣar taddart, ufin amsexxar amehřuc iggenfa.
Mmis n tajjač zi Nayin
11 Tiwecca nnes iruḥ ɣar ict n tendint qqaren as Nayin. Tuɣa din akides imeḥḍaren nnes d ijj n řɣaci d ameqqran.
12 Ařami dd-iqarreb ɣar tewwart n tendint, xzar, ksin-dd ijj n umettin x řmeḥmeř ɣar barra. Netta d ayenni n mmis nni tuɣa ɣar yemmas. Yemmas tuɣa-tt d tajjač u tuɣa akides aṭṭas n řɣaci zi tendint.
13 Umi tt iẓra Yasuɛ, tezziǧez as, inna as: “War ttru!”
14 Xenni iqarreb-dd, iḥada řmeḥmeř, uca bedden yinni t yarbun, inna: “A abřiɣ, i cek umi ɣa iniɣ, kkar-dd!”
15 Iqqim umettin, ibda issawař, xenni yarra as t-i-dd i yemmas.
16 Tudef tiggʷudi di marra uca ssemɣaren AREBBI, nnan: “Aqa ikkar-dd dayneɣ unabi imɣar!”, uca: “Aqa issijj-dd AREBBI x řgens nnes.”
17 Iffeɣ řexbar-a xas ɣar marra Yahudiyya u ɣar marra jjwayeh i d asen dd-innḍen.
Aseqsi n Yuḥanna Amseɣḍaṣ
18 Imeḥḍaren n Yuḥanna ɛawden as man aya marra.
19 Iřaɣa Yuḥanna i tnayen zeg imeḥḍaren nnes uca issekk i-ten ɣar Yasuɛ, iqqar s uqemmum nsen: “Ma d Cek d wenni dd ɣa yasen, niɣ ad nraja wenneɣni?”
20 Umi ruḥen yeryazen ɣar Yasuɛ, nnan as: “Yuḥanna Amseɣḍaṣ aqa issekk aneɣ-dd ɣarek, inna: ‘Ma d Cek d wenni i dd ɣa yasen niɣ ad nraja wenneɣni?’ ”
21 Di tsaɛɛet nni tuɣa issgenfa aṭṭas n iwdan zi řehřacat d uweddeb nsen u zi řaryaḥ iɛeffanen, uca yarra aṭṭas n idarɣařen ttwařan.
22 Yarra-dd Yasuɛ, inna asen: “Ruḥem, ɛawdem i Yuḥanna min teẓrim d min tesřim. Aqa idarɣařen ttwařan u ineɛḍaben gguren u yinni di iǧa řbarṣ ttwassizdegen u idehcar ttesřan u imettinen ttekkaren uca ittᵉttwabarreḥ s Řexbar Aṣebḥan i imezřaḍ.
23 Sseɛd n wenni war d ayi ittendrifen.”
24 Umi ffɣen imeḥḍaren n Yuḥanna, ibda Yasuɛ iqqar i řɣaci x Yuḥanna: “Min ɣar i ɣa dd-teffɣem ɣar řexřa ad tẓarem? Ma ijj n uɣanim issenhezza t usemmiḍ?
25 Mařa lla, min ɣar tuɣa dd-teffɣem ad tẓarem? Ma ijj n bnadem yarḍ arruḍ yarḍeb? Xzar inni yarḍen arruḍ iɣřan yarḍeb u ddaren deg ufuhart, aqa aten di řeqṣur n ijeǧiden.
26 Maca min ɣar tuɣa dd-teffɣem ad tẓarem? Ma ijj n unabi? Wah, ad awem iniɣ d ameqqran ktar zeg unabi.
27 Aqa d wa i xef ittwari: ‘Aqa Necc ad ssekkeɣ lmalak inu zzat i uɣembub nnec, wenni i ɣa isswejden abrid nnec ɣar zzat nnec.’
28 Necc ad awem iniɣ, jar inni dd-ittwaxeřqen zi temɣarin uřa d ijj war iǧi d anabi ameqqran x Yuḥanna Amseɣḍaṣ, maca waxxa amenni d ameẓyan qaɛ di Tgeldit n AREBBI imɣar xas.”
29 Marra iwdan nni d as isřin, uřa d ayt n ḍḍariba cehden i tsegda n AREBBI, minzi nitni ttwassɣeḍṣen s useɣḍeṣ n Yuḥanna.
30 Maca Ifarisiyyen d imseřmaden n idlisen ugin x ccwar n AREBBI i yixef nsen, minzi ugin ad zzayes ttwassɣeḍṣen.
31 Inna Netta: “Min zi ɣa cebbheɣ iwdan n jjiř-a? Wi di yarwesen?
32 Nitni amecnaw iḥenjiren i iqqimen di ssuq, ttřaɣan ijjen wenneɣni, qqaren: ‘Neccin newta awem di temja, kenniw war tecḍiḥem, u neccin nɣennej ijj n weẓri n wecḍan i kenniw, maca kenniw war trum ca.’
33 Minzi yusa-dd Yuḥanna Amseɣḍaṣ, war ittett aɣrum, war isess binu uca tennam: ‘Aqa dayes cciṭan!’
34 Yusa-dd Mmis n bnadem ittett, isess, tennam: ‘Xzar, bnadem-a iřhef x macca d binu, aqa-t d ameddukkeř n ayt n ḍḍariba d imednab.’
35 Maca tiɣit tᵉttwasegged zi marra tarwa nnes.”
Adhan n iḍaren n Yasuɛ
36 Iɛarḍ i-t ijj n Ufarisi ḥima ad kis icc. Yudef Netta ɣar taddart n Ufarisi uca iqqim ɣar ṭṭabřa.
37 Tuɣa tzeddeɣ ict n temɣart tamednubt di tendint nni. Umi tessen aqa iqqim ɣar ṭṭabřa di taddart n Ufarisi, tusa-dd s ijj n uɣarraf n alabaster dayes zzect i wedhan,
38 uca umi tbedd ɣar iḍaren nnes ɣar ḍeffar nnes, tru uca tebda tessuffa iḍaren nnes s imeṭṭawen nnes uca tebda tessaẓaɣ i-ten s ucuwwaf n uzeǧif nnes, tessudem as iḍaren uca temseḥ i-ten s ict n zzect n wedhan.
39 Umi iẓra Ufarisi wenni i-t-i-dd-iɛarḍen man aya, ixarreṣ deg yixef nnec, inna: “Mařa Wa d anabi s tidett, iři aqa issen min teɛna tanita u mammec tᵉttwassen nettat, minzi tenni t iḥadan, aqa-tt d tamednubt.”
40 Yarra-dd Yasuɛ, inna as: “A Cimɛun, ɣari ict n řḥajjet ad ac tt iniɣ.” Inna as: “Ini tt, a Amseřmad inu!”
41 Inna as Yasuɛ: “Ijj n bab n umarwas tuɣa ɣares tnayen ttursen as. Ijjen tuɣa itturs as xemsa-mya dinar u wenneɣni xemsin.
42 Am war tuɣi ɣarsen min zi ɣa arren amarwas, isamḥ asen amarwas s tnayen idsen. Ini ayi, wi zzaysen t ɣa ixsen ktar?”
43 Yarra-dd Cimɛun, inna: “Ittɣiř ayi wenni umi isamḥ ktar.” Inna as: “Cek tḥekmed s ṣṣaḥ.”
44 Xas uca inneqřeb Yasuɛ ɣar temɣart nni, inna i Cimɛun: “Ma tᵉttwařid tamɣart-a? Aqa udfeɣ ɣar taddart nnec. Aman i iḍaren inu war d ayi ten tewcid. Maca nettat tessuff iḍaren inu s imeṭṭawen nnes uca tessiẓeɣ i-ten s ucuwwaf n uzeǧif nnes.
45 Cek war d ayi tessudmed, maca nettat, zeg wami dd-udfeɣ, war tbedd zeg usudem n iḍaren inu.
46 S zzect war tmesḥed ca azeǧif inu, maca nettat temseḥ iḍaren inu s zzect n wedhan.
47 S uyenni ad ac iniɣ: Aqa ittwaɣfar as aṭṭas n ddnub nnes, minzi texs aṭṭas. Wenni umi ittwaɣfar drus, ad ɣares yiři drus n tayri.”
48 Xenni inna as: “A tameṭṭut, aqa ttwaɣfaren ddnub nnem.”
49 Inni akides iqqimen ɣar ṭṭabřa bdan qqaren deg ixef nsen: “Min iɛna Wanita maḥend ad iɣfar uřa i ddnub.”
50 Inna as Yasuɛ i tmeṭṭut nni: “L’iman nnem aqa iwca am Tudart. Ruḥ di řehna.”