5
Tařaɣit n Yasuɛ x imeḥḍaren imezwura
1 Ařami xas imun řɣaci ḥima ad sřen i Wawař n AREBBI, am tuɣa Netta ibedd x tma n řebḥar n Jinnisaret,
2 iẓra tnayen n tɣarruba beddent x tma n řebḥar. Ineymaren n iseřman ffɣen-dd zzayes, tuɣa ssirden tiracciwin.
3 Icten zi tɣarruba nni tuɣa n Cimɛun Buṭrus. Inya Yasuɛ di tɣarrabut, isseqsa ten ad aggʷejen cwayt x tma n řbař ɣar řebḥar. Xenni iqqim, isseřmad řɣaci zi tɣarrabut.
4 Umi ikemmeř awař, inna i Cimɛun: “Ruḥem ɣar řaǧaɣ, nḍarem tiracciwin nwem i tneymart.”
5 Yarra-dd Cimɛun, inna as: “A Amseřmad inu, aqa nuḥeř ǧiřet tekmeř, war neymar walu, maca x wawař nnec ad nḍareɣ tracca.”
6 Umi ggin man aya, ṭṭfen aṭṭas n iseřman ařami dewřent tracciwin nsen ttcarragent.
7 Aqa ciyyaren ɣar imeddukkař nsen inni tuɣa di tɣarrabut nneɣni, ḥima ad dd-asen ad ten ɛawnen. Nitni usin-dd, uca ccuren tnayen n tɣarruba ařami ɛřayen ad ɣarqent.
8 Ařami iẓra Cimɛun Buṭrus man aya, iwḍa ɣar iḍaren n Yasuɛ, inna as: “Ttzawgeɣ Cek, a Sidi, aggʷej xafi, aqa necc d bnadem d amednub.”
9 Itebhet netta d marra inni iǧan akides x tneymart n iseřman i ṭṭfen,
10 uřa d Yaɛqub d Yuḥanna, tarwa n Zabdi, inni tuɣa d icricen n Cimɛun. Maca Yasuɛ inna i Cimɛun: “War tteggʷed ca, zi ssa d tsawent ad tafed tyemmared iwdan i usenjem.”
11 Nitni iwyen-dd tiɣarruba ɣar řbarr, jjin kuřci uca ḍfaren t.
Asgenfi n ijj n weryaz i di iǧa řbarṣ
12 Umi tuɣa Yasuɛ deg icten zi tneddam nni, yusa-dd ɣares ijj n weryaz iřqef i-t marra řbarṣ. Umi iẓra netta Yasuɛ, iwḍa x uɣembub nnes uca izaweg i-t, inna: “A Sidi inu, mařa texsed, tzemmared ad ayi tessizdeged!”
13 Isswiẓẓeḍ Yasuɛ s ufus nnes ɣares, iḥada t, inna: “Necc xseɣ, iři tizdiged!” Řexdenni iruḥ xas řbarṣ.
14 Yumur i-t: “War teqqar i ḥed, maca ruḥ, scen ixef nnec i ukehhan, ewc tawhibt x usizdeg nnec, am mammec t yumur Musa, d cchadet i nitni.”
15 Ccenɛet nnes tuyur mani ma ktar ɛad uca inneyru řɣaci aṭṭas, ḥima ad as sřen u ḥima ad zzayes ttwassgenfan zi řehřacat nsen.
16 Maca Netta iffeɣ-dd ɣar řexřa, ittẓaǧa din.
Asgenfi n ijj n weryaz d aneɛḍab
17 Deg ijj n wass zeg wussan nni am tuɣa Yasuɛ isseřmad, qqimen din Ifarisiyyen d imseřmaden n Ccariɛa inni dd-yusin zi marra dcurat n Ljalil d Yahudiyya u zi Urcalim. Tuɣa din jjehd n SIDI maḥend ad ten iggenfa.
18 Xenni iwyen-dd ijj n uneɛḍab x tassut tuɣa arezzun ad t ssidfen ɣar daxeř, maḥend ad t ssarsen zzates.
19 Umi war ufin manis t i ɣa ssidfen zi ssibbet n řɣaci, geɛɛden x tzeqqa uca seyyben t zeg uqarmud ɣar wadday ak-d tassut nican ɣar řwesṭ, zzat i Yasuɛ.
20 Umi iẓra Yasuɛ l’iman nsen, inna i uneɛḍab nni: “A bnadem, ddnub nnec ttwaɣfaren ac.”
21 Bdan imseřmaden n idlisen d Ifarisiyyen ttxarraṣen, nnan: “Min iɛna Wa, řami Netta ittceqqaf ammu. Wi izemmaren ad iɣfar ddnub mɣir AREBBI weḥḥdes?”
22 Maca yargeb Yasuɛ x ixarriṣen nsen, uca Netta iṭṭef deg wawař, inna asen: “Min tᵉttxarraṣem deg wuřawen nwem?
23 Min ihewnen ad iniɣ: ‘Ttwaɣfaren ddnub nnec!’ niɣ ad iniɣ: ‘Kkar, uyur’?
24 Maca ḥima ad tessnem belli Mmis n bnadem ɣares ṣṣulṭa x temmurt, ḥima ad iɣfar ddnub - inna i uneɛḍab - I cek umi ɣa iniɣ, kkar, ksi tassut nnec uca ruḥ ɣar taddart nnec!”
25 Řexdenni ikkar zzat i tiṭṭawin nsen, iksi tassut nnes uca iruḥ ɣar taddart nnes, issemɣara di AREBBI.
26 Atebhet ihwa-dd x marra iwdan, ssemɣaran di AREBBI uca tudef i-ten tiggʷudi, nnan: “Aqa ass-a neẓra řeɛjayeb!”
Tařaɣit n Yasuɛ x Matta Lawi
27 Awarni man aya iffeɣ Yasuɛ, iẓra ijj n bu-ḍḍariba, qqaren as Lawi, iqqim deg wemcan n ḍḍariba, inna as: “Ḍfar ayi-dd!”
28 Ijja kuřci, ikkar uca iḍfar i-t-i-dd.
29 Issnewji as Lawi ijj n usnewji d ameqqran di taddart nnes, uca inni akides iqqimen ɣar ṭṭabřa tuɣa aten deg waṭṭas n řɣaci zeg ayt n ḍḍariba d inneɣni.
30 Maca imseřmaden n idlisen d Ifarisiyyen cetcan, nnan i imeḥḍaren nnes: “Mayemmi tᵉttettem, tessessem ak-d ayt n ḍḍariba d imednab?”
31 Yarra-dd Yasuɛ, inna asen: “Inni iṣeḥḥen war ḥdijen ca aḍbib, maca imehřac wah.
32 War dd-usiɣ ad řaɣiɣ x imseggaden, maca x imednab ɣar ttubet.”
Aseqsi x uẓummi
33 Nnan as: “Mayemmi tẓumman u ttẓaǧan imeḥḍaren n Yuḥanna aṭṭas, uřa d yinni n Ifarisiyyen, maca inni nnec ttᵉtten, sessen?”
34 Inna asen: “Ma texsem ad tejjem ayt n umuřay ad ẓummen mařa Amuřay aqa-t ɛad akidsen!
35 Maca ad dd-awḍen wussan xmi xasen ɣa ittwammeksi Umuřay, řexdenni ad ẓummen deg wussan nni.”
36 Inna asen ɛawed ijj n umedya: “War din ḥed icarreg taneqqič zeg warruḍ n jdid, uca ittegg i-tt x warruḍ abuřay, ḥima war tᵉttarri tneqqič n jdid ad tcarreg abuřay, minzi taneqqič n jdid war tᵉttřiqi abuřay.
37 Uca war iǧi ḥed ittegg binu n jdid di txuncay tiqdimin n yiřem, ḥima binu n jdid war ittcarrig ca tixuncay uca ad izeǧeɛ binu, ad ḍeyyɛent txuncay.
38 Maca tteggen binu n jdid di txuncay n jdid uca ad xemmřen s tyuya.
39 Uřa d ijj, mařa iswa aqdim, war ittexs ɛad řexdenni jdid, minzi netta ad yini: ‘Aqdim ittfuḥ!’ ”