16
Amedya n wewkiř d aɛeffan
1 Inna ɛawed i imeḥḍaren nnes: “Tuɣa din ijj n bnadem, aqa-t d bab n wagřa, ɣares ijj n wewkiř nni zi cetcan iwdan, aqa zeɛma tuɣa ittzuzzar agřa n sides.
2 Iřaɣa as, inna as: ‘Man aya i xak ttesřiɣ? Ewc řeḥsab i uwekkeř nnec, minzi war izemmar ad tiřid ɛad d awkiř!’
3 Inna wewkiř ak-d ixef nnes: ‘Min ɣa ggeɣ umi sidi inu ad xafi ikkes awekkeř-a? War zemmareɣ i uqqaz n temmurt u ttseḍḥiɣ tutra!
4 Aqa ssneɣ min ɣa ggeɣ ḥima, xmi ɣa ttwaḥuzeɣ x uwekkeř, ad ayi qebřen di tudrin nsen.’
5 Uca iřaɣa-dd i kuř ijjen zeg aytbab n umarwas n sides. Inna as i umezwar: ‘Mecḥař d ac itturs sidi?’
6 Yarra-dd xas netta: ‘Mya n ibidawen n zzect!’ Inna as: ‘Ksi řciɣed n umarwas nnec, qqim deɣya, tarid: Xemsin n ibidawen.’
7 Xenni inna i wenneɣni: ‘I cek, mecḥař d ac itturs sidi?’ Yarra-dd xas: ‘Mya n txuncay timeqqranin n yirden.’ Inna as: ‘Ksi řciɣed n umarwas nnec, tarid: Tmanyin.’
8 Siditneɣ igga řfaǧ deg wewkiř iɣecc, aqa tuɣa ittegg s tiɣit, minzi tarwa n ddunect-a d imiɣisen di jjiř nsen wanita x tarwa n Tfawt.
9 Ɛawed Necc ad awem iniɣ: ‘Ggem imeddukkař i yixef nwem s wagřa-ya n řɣecc, ḥima, xmi ɣa iqḍa, ad kenniw qebřen deg iqiḍan nsen n řebda.’ ”
Tasexxart i AREBBI d tewkiřt n tenɛacin
10 “Wenni iǧan d amtiqqi di drus, aqa-t d amtiqqi uřa deg waṭṭas, u wenni iɣeccen di drus, aqa iɣecc uřa deg waṭṭas.
11 Mařa war teǧim d imtiqqan zi jjihet n wagřa n řɣecc, wi kenniw i ɣa iwekkřen x min iǧan nican?
12 Mařa war teǧim d imtiqqan di min iǧan n wenneɣni, wi d awem i ɣa iwcin min iǧan nwem?
13 Uřa d ijj n umsexxar war izemmar ad ixdem tnayen n isiditen, minzi niɣ ad icarh ijjen uca ad issɛizz wenneɣni, niɣ ad icebbar deg ijjen uca ad isseḥqar wenneɣni. War tzemmarem ad tsexxarem i AREBBI d wagřa.
Ccariɛa n Sidi Arebbi war ttbeṭṭiř ca
14 Řami sřin Ifarisiyyen marra man aya, sseḥqaren t, minzi nitni tuɣa ttexsen tmenyat.
15 Yasuɛ inna asen: “Kenniw d inni isseggden ixef nwem zzat i iwdan, maca AREBBI yargeb x wuřawen nwem, minzi min yuɛřan ɣar iwdan, aqa-t d nnɛi zzat i AREBBI.
16 Ccariɛa d Inabiyyen aqa aten ař Yuḥanna. Zi řweqt nni ittwabarreḥ s Tgeldit n AREBBI uca marra idsen ttemsedḥasen ɣares ḥima ad din adfen.
17 Maca tikkest n ujenna d temmurt tehwen x uweṭṭu n ict n tneqqiṭ zi Ccariɛa.”
18 “Marra wi ɣa iǧfen i temɣart nnes uca ad imřec ak-d tenneɣnit, aqa izna, u marra wi ɣa imeřcen tamɣart tenni umi iǧfen, aqa netta izna.”
Bab n wagřa d umeẓřuḍ Aliɛazar
19 “Tuɣa din ijj n bnadem, aqa-t d bab n wagřa, yarḍ řeqṭen acemřař azdad d řeḥrir d azeggʷaɣ. Ittɣebba zzhu kuř ass.
20 Tuɣa din ɛawed ijj n umezřuḍ qqaren as Aliɛazar. Tuɣa ssbuẓẓřen t ɣar tewwart n bab n wagřa, iccur s řḥebb.
21 Tuɣa dayes meẓri ad ijjiwen s iřeqqwaz i dd-iweṭṭan zi ṭṭabřa n bab n wagřa. Ttasen-dd yiṭan ɛawed, řessḥen ibuɛrusen nnes.
22 Immut umezřuḍ, ksint t lmalakat ɣar weḥsin n Ibrahim. Uřa d bab n wagřa immut, neḍřen t.
23 Am tuɣa ittɛeddab di řaxart, issgeɛɛed tamuɣři nnes, iẓra Ibrahim zi řaggʷaj u Aliɛazar tuɣa-t deg weḥsin nnes.
24 Iřaɣa s jjehd: ‘A baba Ibrahim, arḥem ayi. Sekk-dd Aliɛazar ḥima ad issuff ixef n uḍaḍ nnes s waman uca ad issesmeḍ iřes inu, minzi aqa ttɛeddabeɣ di tmessi-ya.’
25 Inna as Ibrahim: ‘A mmi, ɛqeř aqa tkemmřed marra řxar nnec di tudart nnec, uca ammu i ikemmeř Aliɛazar řɣar. Řexxu netta ittᵉttwafewwej u cek tᵉttwaɛeddabed.
26 Sennej i man aya marra, aqa jar aneɣ neccin d kenniw ijj n ttasiɛ imɣar, ařami inni ixsen ad ɣarwem dd-ẓwan ssa, war zemmaren uca uřa d inni din iǧan war zemmaren ad ɣarneɣ dd-ẓwan ssenni.’
27 Inna as: ‘Ttzawgeɣ cek xenni, a baba, ad t tessekked ɣar taddart n baba,
28 minzi ɣari xemsa n aytma. Ejj i-t ad asen iɛřem, ḥima war dd-ttisen uřa d nitni ɣar wemcan-a n uɛeddeb.’
29 Inna as Ibrahim: ‘Aqa ɣarsen Musa d inabiyyen. Ejj i-ten ad ɣarsen sřen!’
30 Maca netta inna as: ‘Lla, a baba Ibrahim, mařa iruḥ ɣarsen ijjen zeg imettinen, xenni ad tuben!’
31 Inna as Ibrahim: ‘Mařa nitni war sřin ɣar Musa d inabiyyen, xenni war zzayes ttwassqenɛen ɛawed, ɛad xmi dd ɣa ikkar ijjen jar imettinen!’ ”