13
Amedya n wartu i war itticcen řɣiǧet
1 Di řweqt nni usin-dd ɣares ca n iwdan, xebbaren t x Ijaliliyyen inni ixeǧeḍ Pilaṭus idammen nsen ak-d tɣarṣin nsen.
2 Yarra-dd Yasuɛ, inna asen: “Ma ittɣiř awem belli Ijaliliyyen-a d imednab ktar zeg Ijaliliyyen nneɣni umi d asen imsar uweddeb-a?
3 Ad awem iniɣ, lla! Maca kenniw ad tᵉttwahellkem marra am nitni, mařa war tᵉttubem.
4 U zi jjihet n tmenṭac n iwdan i xef dd-tewḍa ṣṣumɛet di Siluwam uca mmuten zzayes, ma ittɣiř awem aqa aten d imednab ktar zeg iwdan nneɣni i izeddɣen di Urcalim?
5 Ad awem iniɣ, lla! Maca kenniw ad tᵉttwahellkem marra am nitni, mařa war tᵉttubem!”
6 Inna asen amedya-ya: “Tuɣa ɣar ijj n weryaz ijj n wartu i ittwaẓẓun deg umarjeɛ nnes n uḍiř, uca netta yusa-dd, yarezzu dayes tazart, maca war tt yufi.
7 Inna i bab n umarjeɛ n uḍiř: ‘Aqa třata n iseggʷusa ttaseɣ-dd, arezzuɣ tazart deg wartu-ya, war tt ufiɣ. Qess i-tt xenni, mayemmi tessaḥař ɛad tammurt?’
8 Yarra-dd xas ufeǧaḥ: ‘A sidi, ejj i-tt ad tbedd ɛad aseggʷas-a. Ad tt ɣziɣ, u ad as ggeɣ řeɣbar.
9 Ad taɣ ad tarr řɣiǧet, mařa lla, xenni qess i-tt deg useggʷas i dd ɣa yasen.’ ”
Asgenfi n ict n temɣart deg wass n ssebt
10 Řami tuɣa isseřmad Yasuɛ deg icten zi temzidawin di ssebt,
11 tuɣa din ict n temɣart i iḍɛef buḥbeř nnes řmijař n tmenṭac n iseggʷusa. Tuɣa teqwes, war tzemmar ad tseggem aɛrur.
12 Umi tt iẓra Yasuɛ, iřaɣa-dd xas ɣares, inna as: “A tamɣart, aqa cem tenfekked zi tuḍɛeft nnem!”
13 Issars xas afus nnes uca nettat tedweř tseggem řexdenni, tebda tessemɣara di AREBBI!
14 Maca ameqqran n temzida, umi ixeyyeq, minzi Yasuɛ issgenfa ijjen di ssebt, iṭṭef deg wawař, inna i řɣaci: “Aqa di setta n wussan ittxeṣṣa řxedmet, asem-dd deg wussan nni maḥend ad tᵉttwassgenfam, war iǧi deg wass n ssebt!”
15 Maca yarra-dd Yasuɛ, inna as: “A cek, amnafeq! Ma war ifessi kuř ijjen zzaywem di ssebt i ufunas nnes niɣ i weɣyuř nnes zi řmedwed, xenni ad t indeh maḥend ad t iward?
16 Maca tamɣart-a aqa-tt d yeǧis n Ibrahim, tenni icedd ibřis, xzar, ɛad řmijař n tmenṭac n iseggʷusa, ma war d as dd-yusi ad tᵉttwafekk zeg uceddi-ya deg wass n ssebt?”
17 Am inna man aya, seḍḥan marra inni tuɣa akides ittemɛařan, maca marra řɣaci ifarḥ zi lmuɛjizat nni tuɣa ittwaggen s ufus nnes.
Imedya n tḥebbuct n zzariɛet n uxerdel u n wentun
18 Yasuɛ inna: “Min di tarwes Tgeldit n AREBBI uca min zi tt ɣa ssemquddeɣ?
19 Aqa-tt am yict n tḥebbuct n zzariɛet n uxerdel iksi tt ijj n weryaz, inḍar i-tt di teḥwict nnes, uca teɣmi-dd, tedweř d tacejjart temɣar uca ggin ijḍaḍ n ujenna řeɛwacc nsen di řefruɛ nnes.”
20 Yasuɛ inna ɛawed: “S min zi ɣa ssemquddeɣ Tageldit n AREBBI?
21 Aqa-tt am wentun, teysi t temɣart, teffar i-t di třata n řemdud n waren, ařami issmemm marra!”
Tawwart iḥsaren
22 Iẓwa tineddam d dcurat, am tuɣa isseřmad, iggur ɣar Urcalim.
23 Ijjen isseqsa i-t, ma aqa din drus n yinni i ɣa ṭṭfen Tudart.
24 Yarra-dd Yasuɛ, inna asen: “Ggem jjehd nwem, ḥima ad tadfem zi tewwart iḥṣaren, aqa Necc ad awem iniɣ, aṭṭas ad arzun ad dd-adfen, maca war zemmaren.
25 Zeg wami i ɣa ikkar Bab n taddart maḥend ad ibelleɛ tawwart, xenni ad tbeddem di barra, ad tessqareqbem, ad tebdam ad tinim: ‘A Siditneɣ, a Siditneɣ, arzem aneɣ!’ Maca Netta ad dd-yarr, ad yini: ‘Necc war kenniw ssineɣ, manis kenniw?’
26 Ad tebdam ad tinim: ‘Neccin aḥeqqa tuɣa necca neswa qibač nnec, uca Cek tuɣa tesseřmaded deg imesraq nneɣ!’
27 Maca Netta ad yini: ‘War kenniw ssineɣ, war ssineɣ manis kenniw! Aggʷejem xafi, kenniw inni itteggen řmuɛṣiyyet!’
28 Ad din tiři tɣuyyit d uɣezzi n teɣmas, xmi ɣa tẓarem Ibrahim d Isḥaq d Yaɛqub d marra inabiyyen di Tgeldit n AREBBI, maca kenniw ad temmenḍarem barra.
29 Ad dd-asen zi manis d tneqqar tfuct u zi mani tɣeǧi tfuct uřa zi ccamal uřa zi ljanub, ad qqimen ɣar ṭṭabřa di Tgeldit n AREBBI.
30 Xzar, aqa din ineggura inni i ɣa yiřin d imezwura, u aqa din imezwura inni i ɣa yiřin d ineggura.”
Awařen ineggura n Yasuɛ x Urcalim
31 Deg wass nni qarrben-dd ca n Ifarisiyyen, nnan as: “Ffeɣ, ruḥ ssa, minzi Hirudus ixs ad Cek ineɣ!”
32 Yasuɛ inna asen: “Ruḥem, inim as i wecɛeb-a: ‘Xẓar, aqa Necc ssuffuɣeɣ ccwaṭen, ssgenfiɣ ass-a d tiwecca, uca deg wass wiss třata ad iwḍeɣ ɣar řekmaret.”
33 Maca ittxeṣṣa ayi ad xedmeɣ ass-a d tiwecca, uca deg wass awarni as ad raḥeɣ, minzi war izemmar ad ittwaneɣ ijj n unabi barra i Urcalim.
34 A Urcalim, a Urcalim, tenni ineqqen inabiyyen d tenni yarejjmen inni i ɣarem dd-ittwassekken, mecḥař n twařawin tuɣa xseɣ ad ssmuneɣ tarwa nnem am mammec tessmuna tyaẓiḍt ifiǧusen nnes sadu wafriwen nnes, maca kenniw war texsem.
35 Xzar, taddart nwem ad awem teqqim d řxarbet. Maɣar Necc ad awem iniɣ, aqa war d ayi tẓarrem ař dd ɣa tas řweqt i di i ɣa tinim: ‘Lbaraka i Wenni dd ɣa yasen s Yisem n SIDI’.”