23
Ařeqqeḥ s ufus n Yuciya
1 Xenni issekk ujeǧid ireqqasen uca marra imɣaren n Yahuda d Urcalim munen ɣares.
2 Ajeǧid igeɛɛed ɣar Taddart n SIDI ak-d marra iryazen n Yahuda d marra imezdaɣ n Urcalim, uřa d ikehhanen d inabiyyen d marra řgens, zeg umeẓyan ař umeqqran, u netta iɣra xasen deg imezzuɣen nsen marra awařen n wedlis n Řɛahd nni tuɣa ufin di Taddart n SIDI.
3 Ajeǧid tuɣa ibedd ɣar ijj n upilar uca netta iqqen Řɛahd zzat i SIDI, ḥima ad iḍfar SIDI, ad iḥḍa řumurat nnes d cchadat nnes d tweṣṣa nnes s marra uř nnes u s marra řeɛmar nnes, maḥend ad issemten awařen n Řɛahd-a nni yurin deg wedlis-a. Uca yudef řgens marra di Řɛahd.
4 Ajeǧid yumur i Ḥilqiya, arrays n ikehhanen, u i ikehhanen n usettef wiss tnayen u i iɛessasen n tewwart, aqa nitni ad ssuffɣen marra řeqcuɛ nni tuɣa ittwaggen i Baɛal u i trebbit n cwarti uřa i marra řɛeskar n ujenna zi Zzawect Tameqqrant n SIDI ɣar barra, u issecmeḍ man aya marra barra i Urcalim deg iyyaren n Qidrun u ijja ad arbun iɣɣeḍ nnes ɣar Bayt-Il.
5 Netta ikkes ɛawed ikehhanen n l’aṣnam nni tuɣa řeqqmen ijeǧiden n Yahuda, ḥima ad qeddmen tiwhibin n řebxur di řegɛudi, di tneddam n Yahuda u di jjwayeh i dd innḍen i Urcalim, uřa d yinni i iqeddmen tiwhibin n řebxur i Baɛal, d tfuct, d tziri, d temmura n ujenna u i marra řɛeskar n ujenna.
6 Issuffeɣ uřa d tarebbit n cwarti zi Taddart n SIDI, igga i-tt barra i Urcalim ɣar teɣzart n Qidrun. Netta issecmeḍ i-tt ɣar teɣzart n Qidrun u iddez i-tt d taɛejjajt u yareyyec i-tt x imeḍřan n ayt n řgens.
7 Netta ihdem ixxamen n imetleyyin nni tuɣa ɣar Taddart n SIDI, mani ttxeyyaḍent temɣarin iqiḍan nni ggint am tizzayiwin i trebbit n cwarti.
8 Netta ijja ad ssuffɣen marra ikehhanen zi tneddam n Yahuda uca issexmej řegɛudi mani qeddmen ikehhanen tiwhibin n řebxur, zi Jabɛa ař Bi’r-Sebɛa. Netta ihdem řegɛudi ɣar tewwura n tendint, uřa d tinni iǧan ɣar wadaf n Tewwart n Yacuwa, azeǧif ameqqran n tendint, ɣar uzeřmaḍ n wenni i tuɣa ittadef Tawwart n Tendint.
9 Maca ikehhanen n řegɛudi war zemmaren ad geɛɛden ɣar uɛalṭar n SIDI di Urcalim, maca nitni ccin aɣrum břa antun di řwest n aytmatsen.
10 Netta issexmej uřa d Tufat nni iǧan di teɣzurt n ayt n Hinnum, ḥima uřa d ijj war issɛeddu mmis niɣ yeǧis x tmessi i Mulak.
11 Netta ikkes iysan i tuɣa ggin ijeǧiden n Yahuda i řewqar n tfuct ɣar wadaf n Taddart n SIDI, ɣar texxamt n Natan-Malak, amsexxar acenneɛ, wenni iǧan di řebniyyat barra i Zzawect Tameqqrant. Netta iqedd i ikarruten n tfuct s tmessi.
12 Uřa d iɛalṭaren nni tuɣa ibedden x tzeqqa n tɣurfet n Aḥaz nni ggin ijeǧiden n Yahuda, uřa d iɛalṭaren i igga Manassa di tnayen n řemraḥat n Taddart n SIDI, ihdem i-ten ujeǧid. Netta iřbez i-ten, issiggʷej i-ten ssenni uca inḍar taɛejjajt nsen di teɣzart n Qidrun.
13 Uca issexmej ujeǧid řegɛudi nni din iǧan zzat i Urcalim, ɣar yefus n wedrar n Uḍeyyeɛ, řegɛudi i ibna Suliman, ajeǧid n Israil, i Acturit, nnɛi n l’aṣnam n ayt n Ṣidun, u i Kamuc, nnɛi n l’aṣnam n ayt n Mu’ab, u i Milkum, jjɛifect n l’aṣnam n ayt n Ɛammun.
14 Netta yarẓa imayḍuten iqeddsen d iwetwiten uca ihdem tirebbin n cwarti uca iccur amcan nsen s yeɣsan n yewdan.
15 Uřa d aɛalṭar nni iǧan di Bayt-Il, řgeɛɛdet i iggin Yarubɛam, mmis n Nabaṭ, d wenni yarrin Israil ad ixḍa, aqa aɛalṭar nni d řgeɛɛdet nni, ihdem i-ten s tnayen idsen. Netta issecmeḍ řgeɛɛdet, iddez i-tt ařami tedweř d taɛejjajt uca issecmeḍ tarebbit n cwarti.
16 Umi dd-inneqřeb Yuciya, iẓra imeḍřan i tuɣa dinni x wedrar, uca issekk din ca n yeryazen, iksi-dd iɣsan zeg imeḍřan uca issecmeḍ i-ten x uɛalṭar. Ammu i issexmej i-t ɛlaḥsab awař n SIDI i zi ibarreḥ weryaz n AREBBI wenni ibarrḥen awařen-a.
17 Yarni inna: “Mana weẓru nni i war ẓriɣ ɛemmars i din twařiɣ?” Nnan as yeryazen n tendint: “Wa d anḍeř n weryaz n AREBBI wenni tuɣa dd-yusin zi Yahuda, d wenni ibarrḥen s tmesřayin-a nni teggid ak-d uɛalṭar-a n Bayt-Il.”
18 Netta inna: “Jjem t din! Uřa d ijjen war ittḥidi iɣsan nnes!” Ammu i jjin nitni iɣsan nnes jmiɛ ak-d yeɣsan n unabi wenni dd-yusin zi Samarya.
19 Ikkes Yuciya marra tudrin n tzawiyyin n řegɛudi nni iǧan di tneddam n Samarya i tuɣa ssbedden ijeǧiden n Israil, maḥend ad sɛaren SIDI. Netta igga zzaysen am mammec igga di Bayt-Il.
20 Marra ikehhanen n řegɛudi inni tuɣa iǧan din, iɣarṣ asen x iɛalṭaren uca issecmeḍ iɣsan n iwdan. Awarni as iɛqeb ɣar Urcalim.
Řɛid n Tɣarṣt n Useɛdu
21 Ajeǧid yumur i marra řgens: “Swejdem Řɛid n Tɣarṣt n Useɛdu i SIDI, AREBBI nwem, am mammec ittwari deg wedlis-a n Řɛahd.”
22 Ict n Řɛid n Tɣarṣt n Useɛdu am wa war ittwagg ɛemmarṣ zeg wussan n řquḍat nni tuɣa iḥekkmen Israil, uřa di marra ussan n ijeǧiden n Israil d ijeǧiden n Yahuda.
23 Maca deg useggʷas wiss tmenṭac n ujeǧid Yuciya sswejden nitni Řɛid n Tɣarṣt n Useɛdu wanita i SIDI di Urcalim.
24 Yuciya ikkes uřa d yinni issawařen ak-d imettan, d igezzanen, d řexyařat timeẓyanin n l’aṣnam, d imeyḍa n l’aṣnam, d marra nnɛawat n l’aṣnam i ittwařan di temmurt n Yahuda u di Urcalim, ḥima ad igg awařen n Ccariɛa i ittwarin deg wedlis ittwannḍen i tuɣa yufa ukehhan Ḥilqiya di Taddart n SIDI.
25 Qbeř nnes war din tuɣi uřa d ijj n ujeǧid am netta, idweř-dd ɣar SIDI s marra uř nnes u s marra řeɛmar nnes d s marra jjehd nnes, ɛlaḥsab Ccariɛa n Musa, u awarni as war din tuɣi uřa d ijjen am netta.
26 Maca SIDI war ijji zi řḥaduq n weɣḍab nnes ameqqran i zi tuɣa yarɣa weɣḍab nnes x Yahuda zi ssibbet n marra asɛar i d as igga Manassa.
27 SIDI inna: “Ad ssiggʷjeɣ uřa d Yahuda x wudem inu, am mammec ssiggʷejeɣ Necc Israil, u Necc ad nḍareɣ tandint-a Urcalim i farzeɣ, uřa d Taddart i xef nniɣ: ‘Ad yiři Isem inu diha!’ ”
28 Imezruyen iqqimen n Yuciya d marra min igga, ma man aya marra war ittwazemmem ca deg wedlis n imezruyen n ijeǧiden n Yahuda?
29 Deg wussan nnes igeɛɛed firɛun Nixu, ajeǧid n Miṣra, ḍidd i ujeǧid n Accur ɣar yeɣzar n Lfuraṭ. Ajeǧid Yuciya iffeɣ, maḥend ad t iřqa, maca firɛun Nixu inɣa i-t ɣar Majiddu řami t yeẓra.
30 Imsexxaren nnes iwyen t d amettin x ijj n ukarru zi Majiddu ɣar Urcalim, ssiwḍen t ɣar Urcalim uca neḍřen t deg wenḍeř nnes. Řgens n temmurt iksi Yahuyaḥaz, mmis n Yuciya, uca dehnen t, ggin t d ajeǧid deg wemcan n babas.
Yahuyaḥaz, ajeǧid n Yahuda
31 Yahuyaḥaz tuɣa ɣares třata u-ɛicrin n iseggʷusa umi idweř d ajeǧid. Netta iḥkem třata n iyuren di Urcalim. Yemmas qqaren as Ḥamutal, yeǧis n Irmiya zi Libna.
32 Netta igga min iǧan d aɛeffan di tiṭṭawin n SIDI, nican am mammec t ggin řejdud nnes.
33 Firɛun Nixu ijja ad t ibelleɛ di Ribla di temmurt n Ḥamat, ḥima war iḥekkem ɛad di Urcalim. Netta igga i temmurt ijj n multa n mya talint n nnuqart d ict n talint n wureɣ.
34 Xenni igga firɛun Alyaqim, mmis n Yuciya d ajeǧid deg wemcan n babas uca ibeddeř isem nnes ɣar Yahuyaqim. Maca Yahuyaḥaz yiwyi i-t uca yusa-dd ɣar Miṣra uca immut dinni.
Yahuyaqim, ajeǧid n Yahuda
35 Yahuyaqim iwca nnuqart d wureɣ i firɛun, maca netta tuɣa iqeddar tammurt, ḥima izemmar ad isellem nnuqart nni ɛlaḥsab řumur n firɛun. Iqeddar kuř ijj n weryaz ɛlaḥsab řeqdar nnes, ammu i ittar nnuqart d wureɣ n řgens n temmurt, ḥima ad t iwc i firɛun Nixu.
36 Yahuyaqim tuɣa ɣares xemsa u-ɛicrin n iseggʷusa umi idweř d ajeǧid. Netta iḥkem ḥiṭac n iseggʷusa di Urcalim. Yemmas qqaren as Zabida, yeǧis n Fidaya zi Rumat.
37 Netta igga min iǧan d aɛeffan di tiṭṭawin n SIDI, nican am mammec t ggin řejdud nnes.