12
Yuwac, ajeǧid n Yahuda
1 Tuɣa ɣar Yuwac sebɛa n iseggʷusa umi idweř d ajeǧid.
2 Deg useggʷas wiss sebɛa n Yahu idweř Yuwac d ajeǧid. Netta iḥkem arebɛin n iseggʷusa di Urcalim. Yemmas qqaren as Ḍibya zi Bi’r-Sebɛa.
3 Yuwac igga min iǧan nican di tiṭṭawin n SIDI, marra ussan min ikka ukehhan Yahuyadaɛ isseřmed i-t.
4 War ttwakksent mɣir řegɛudi. Uca řgens tuɣa ittqeddem ɛad tiɣarṣa d tewhibin n řebxur x řegɛudi nni.
5 Yuwac inna i ikehhanen: “Marra nnuqart n tewhibin iqeddsen nni i ɣa yiwyen di Taddart n SIDI, řa nnuqart i kuř řeɛmar i iɛeddun ɣar inni ittwaḥesben, řa nnuqart n kuř řeɛmar ɛlaḥsab aqeddar nnes uca uřa marra nnuqart i x dd-yusa deg wuř n ijj n weryaz ḥima ad tt yawi ɣar Taddart n SIDI,
6 ad tt ksin ikehhanen i yixef nsen, kuř aryaz zeg inni issen. Uca nitni ad zzayes areqqɛen řeḥyuḍ ihruran n Taddart, marra min din ittwafen n řeḥyuḍ ihruran.”
7 Deg useggʷas wiss třata u-ɛicrin n ujeǧid Yuwac war ɛeddřen ikehhanen ɛad řeḥyuḍ ihruran n Taddart.
8 Xenni iřaɣa ujeǧid Yuwac i ukehhan Yahuyadaɛ u i ikehhanen inneɣni, inna asen: “Mayemmi war tɛeddřem řeḥyuḍ icarrgen n Taddart? Xenni řexxu, war tkessim ɛad nnuqart i dd-ittasen zeg inni tessnem, mɣir ḥima ad tt tessiwḍem i weɛdař n min icarrgen di řeḥyuḍ di Taddart.”
9 Qebřen ikehhanen, maḥend war kessin ɛad nnuqart zi řgens u maḥend war ḥdijen ca ɛad ad ɛedřen řeḥyuḍ iqeṭṭsen n Taddart.
10 Akehhan Yahuyadaɛ iksi ict n tsenduqt, igga ijj n unuqqib di tqebbart nnes uca issars i-tt zzat i uɛalṭar ɣar yefus n kuř ijj n wenni ittadfen Taddart n SIDI, uca ikehhanen, inni iḥḍan x wadaf ɣar Taddart, ggin dayes marra nnuqart i dd-ittwawyen di Taddart n SIDI.
11 Umi ẓrin aqa din aṭṭas n nnuqart di tsenduqt, imsar aqa igeɛɛed umarir n ujeǧid ak-d arrays n ikehhanen. Nitni ssmunen tt di txuncay uca weznen nnuqart nni ittwafen di Taddart n SIDI.
12 Nitni wcin řqedd iweznen n nnuqart deg ufus n yinni iggin řxedmet, i imeḥḍayen n Taddart n SIDI. U nitni wcin tt ɛawed i ineqqacen n ukeccuḍ u i ibennayen nni tuɣa ixeddmen di Taddart n SIDI,
13 u i imaṣṣuten d isuydayen, u i tmesɣiwt n ukeccuḍ d tṣuḍar yuydan itteḥwajan i wareqqeɛ n min iqeṭṭsen zi řeḥyuḍ di Taddart n SIDI, u i marra min seyyaren i wareqqeɛ n taddart.
14 Mɣir war ttwaggen ṭṭbaṣi n nnuqart řa tjeqqaḍin, řa ṭṭawyat i urucci d řebwaq, uřa d řeqcuɛ n wureɣ d nnuqart, zi nnuqart i dd-iwyen iwdan di Taddart n SIDI.
15 maɣar nitni wcin tt marra i yinni iggin řxedmet uca nitni areqqɛen zzayes Taddart n SIDI.
16 War mmseḥsiben ca ak-d yeryazen nni umi wcin nnuqart deg ufus nsen, ḥima ad tt wcen i yinni iggin řxedmet, minzi nitni tuɣa tteggen s utiqqi.
17 Nnuqart n tɣarṣt n umarwas d nnuqart n tɣarṣa n ddenb war tt ssidfen ɣar Taddart n SIDI. Tuɣa-tt i ikehhanen.
18 Xenni igeɛɛed Ḥazayil, ajeǧid n Aram, immneɣ ak-d Jat, iṭṭef i-t. Awarni man aya iɛewweř Ḥazayil tamuɣři nnes ɣar Urcalim, ḥima ad igeɛɛed ḍidd nnes.
19 Maca Yuwac iksi marra řeqcuɛ iqeddsen nni tuɣa issqeddes i-tent Yahucafaṭ, Yahuram d Axazya, řejdud nnes, ijeǧiden n Yahuda, uřa d řeqcuɛ iqeddsen nnes d marra wureɣ nni tuɣa iǧan deg ixxamen n txubay n Taddart n SIDI u n taddart n ujeǧid, uca issekk aya ɣar Ḥazayil, ajeǧid n Aram. Xas uca iggʷej netta x Urcalim.
20 Imezruyen iqqimen n Yuwac d marra min igga, ma man aya marra war ittwazemmem ca deg wedlis n imezruyen n ijeǧiden n Yahuda?
21 Imsexxaren nnes ɣewwɣen xas, ggin xas ict n tmeɛmuč uca nɣin Yuwac di taddart n lqelɛa manis hekkwan ɣar Silla.
22 Aqa Yuzakar, mmis n Cimɛat, d Yahuzabad, mmis n Cumir, imsexxaren nnes, wtin t ařami immut. Nitni neḍřen t jar řejdud nnes di tendint n Dawud. Amaṣya, mmis, idweř d ajeǧid deg wemcan nnes.