9
Aḍhar wiss tnayen n SIDI i Suliman
1 Awarni řami ikemmeř Suliman řebni n Taddart n SIDI u řebni n taddart n ujeǧid, wah, marra min tuɣa immeẓri u tuɣa ixs ad t igg,
2 iban-dd SIDI i Suliman i twařa wiss tnayen, am mammec i d as dd-iban di Jibɛun.
3 Inna as SIDI: “Necc sřiɣ i tẓaǧit nnec u i uḥeccem nnec i zi tḥeccmed zzat i wudem inu. Taddart i tebnid, ssqeddseɣ tt, ḥima ad ssmetneɣ din Isem inu i řebda uca tiṭṭawin inu d wuř inu ad din iřin i řebda!
4 Mařa cek tuyured zzat i wudem inu am mammec tuɣa iggur babac Dawud s wuř imun u s řeṣfayet, ad tegged am mammec marra i d ac umureɣ u ad teḥḍid tiweṣṣa inu d lfarayiḍ inu,
5 xenni ad ssmetneɣ řɛarc n tgelda nnec x Israil i řebda, am mammec ssiwřeɣ ɣar babac Dawud, nniɣ: ‘War zzayek ittwaqessi ca n weryaz zi řɛarc n Israil!’
6 Maca mařa kenniw, cek d iḥenjiren nwem, ad tḥeyydem zi ḍeffar inu u kenniw war tḥeṭṭam ɛad řumurat inu d tweṣṣa inu nni wciɣ zzat i wudem nwem, u kenniw ad tuyurem ad tsexxarem i irebbiten nneɣni, ad asen tbendqem,
7 xenni ad qḍiɣ Israil zi temmurt nni d asen wciɣ uca Taddart-a i ssqeddseɣ i Yisem inu ad tt mmenḍareɣ zeg wudem inu u Israil ad idweř d ijj n umedya d ict n řqecɛet n ustehzi jar marra řegnus.
8 U x Taddart-a tenni yuɛřan qaɛ, marra wi xas i ɣa ikken, ad itebhet ad iṣeffar. Nitni ad inin: ‘Mayemmi igga SIDI ammu di temmurt-a u di Taddart-a?’
9 Ad inin: ‘Minzi nitni semḥen di SIDI, AREBBI nsen, wenni dd-issuffɣen řejdud nsen zi temmurt n Miṣra, u minzi nitni cebbaren di irebbiten nneɣni, uyuren ad asen bendqen u ad asen ɛebden, x uya issiweḍ SIDI marra řɣar-a xasen.’ ”
Řebniyat n Suliman
10 Awarni ɛicrin n iseggʷusa i di ibna Suliman tnayen n tudrin, Taddart n SIDI u taddart n ujeǧid, imsar
11 - am iwca Ḥiram, ajeǧid n Ṣur, i Suliman ɛlaḥsab meẓri nnes akeccuḍ n tcejjart n tengelt d ukeccuḍ n tcejjart n umerzi d wureɣ - aqa Suliman iwca i Ḥiram ɛicrin n tneddam di temmurt n Ljalil.
12 Ḥiram iffeɣ-dd zi Ṣur, ḥima ad ixzar tineddam nni d as iwca Suliman, maca tuɣa atent war cnant di tiṭṭawin nnes.
13 Netta inna: “Mana tineddam-a i d ayi tewcid, awma?” U netta iřaɣa asent: ‘Tammurt n Kabul’. Nitenti ttwařaɣant ammu ař ass-a.
14 Ḥiram tuɣa issekk i ujeǧid mya u-ɛicrin talint n wureɣ.
15 D wa d awař x ljizya i tuɣa issgeɛɛed ujeǧid Suliman, maḥend ad ibna Taddart n SIDI d taddart nnes d lqelɛa d řḥiḍ n Urcalim d Ḥaṣur d Majiddu d Jazar.
16 Firɛun, ajeǧid n Miṣra, tuɣa igeɛɛed, iṭṭef Jazar, iqedd as timessi. Inɣa ayt n Kenɛan i tuɣa izeddɣen di tendint uca iwca i-tt d tarzeft n tesřit i yeǧis, tamɣart n Suliman.
17 Suliman ibna xenni Jazar d Bayt-Ḥurun n wadday
18 d Baɛlat di temmurt nni d Tadmar di řexřa
19 d marra tineddam n řexzen nni ɣares ɣar Suliman uřa d tineddam n ikarruten d tineddam n imnayen, u marra min tuɣa immeẓri Suliman ad t ibna di Urcalim, x idurar n Lubnan u di marra tammurt i x iḥkem.
20 Marra řgens i iqqimen n Imuriyyen, Iḥittiyyen, Ifiriziyyen, Iḥiwiyyen d Iyabusiyyen, inni war iǧin ca zeg ayt n Israil,
21 tarwa nsen nni iqqimen awarni asen di temmurt, inni war zemmaren ayt n Israil ad ten ḥarrmen i uteḥḥi, igga xasen Suliman ljizya n tesmuɣi ař ass-a.
22 Zeg ayt n Israil war iggi Suliman uřa d ijj d ismeɣ, minzi nitni tuɣa aten d iɛeskariyyen d imsexxaren nnes d řḥukkam nnes d ineɣrafen nnes n řɛeskar d imeqqranen n ikarruten nnes d imnayen nnes.
23 Ina d imeḥḍayen imeqqranen nni tuɣa ittwařeqqmen x řxedmet di ṭṭweɛ n Suliman, xemsa-mya u-xemsin n yeryazen nni tuɣa iḍebbaren x řgens nni tuɣa itteṭṭfen di řxedmet.
24 Maca yeǧis n firɛun tgeɛɛed zi tendint n Dawud ɣar taddart i tuɣa i d as ibna. Řexdenni ibna lqelɛa.
25 Třata n twařawin deg useggʷas issgeɛɛed Suliman tiɣarṣa n wecmaḍ d tewhibin n řehna x uɛalṭar i tuɣa ibna i SIDI. Ɛawed issbexxar x uɛalṭar n řebxur nni iǧan zzat i wudem n SIDI, uca ammu i isellem netta Taddart am tekmeř i SIDI.
26 Ajeǧid Suliman ibna uřa d ijj n wagraw n iɣarruba di Ɛiṣyun-Jabar i iǧan ɣar Ilat, ɣar tma n Řebḥar n Telga, di temmurt Idum.
27 Ḥiram issekk imsexxaren nnes s wagraw n iɣarruba nni, ibeḥriyyen inni issnen řebḥar, jmiɛ ak-d imsexxaren n Suliman.
28 Nitni iwḍen ɣar Ufir u ksin ssenni arebɛa-mya u-ɛicrin talint n wureɣ u iwyen t ɣar ujeǧid Suliman.