7
Řeqṣar n Suliman
Di taddart nnes ibna Suliman třeṭṭac n iseggʷusa, uca ikemmeř marra taddart nnes. Netta ibna Taddart n Wezɣar n Lubnan. Tuɣa-tt di mya n iɣaǧen n tuzzeggart u xemsin n iɣaǧen n tiru u třatin n iɣaǧen n řuɛřa, tᵉttwagg x arebɛa n iseddiyyen n ipilaren n ukeccuḍ n tcejjart n tengelt u ttwassarsent tḥenya n ukeccuḍ n tcejjart n tengelt tiwa i ipilaren. Tuɣa s ict n tzeqqa zeg ukeccuḍ n tcejjart n tengelt tiwa i tḥenya n uɛarreḍ nni iǧan x xemsa u-rebɛin n ipilaren nni, aqa xemmesṭac n tḥenya x ijj n useddi n ipilaren. Tuɣa tiwwura n řekwazi di třata n iseddiyyen, ict n tburjet ajemmaḍ i tburjet nneɣni, třata n twařawin. Marra tiwwura d řeḍruf nsent ɣar iɣezdisen tuɣa aten d akwadrun, uca arzam n ict n tewwart tuɣa-tt ajemmaḍ n warzam n ict n tewwart nneɣni, třata n twařawin. Asqif igga i-t s ipilaren ɣar zzat n taddart, xemsin n iɣaǧen n tuzzeggart u třatin n iɣaǧen n tiru. Ɣar wudem n ipilaren nni tuɣa ict n tesqift nneɣni ak-d ipilaren, uca ɛawed uřa d ijj n useqqef ɣar wudem n ipilaren nni. Netta igga ɛawed axxam i řɛarc mani tuɣa icarreɛ, axxam n taddart n ccraɛ, uca issduriy i-t zi tisi swadday ař tisi nneɣni sennej s ukeccuḍ n tcejjart n tengelt. Taddart nnes, mani tuɣa izeddeɣ, di řemraḥ nneɣni nni iǧan ktar ɣar daxeř zeg wexxam n taddart n ccraɛ, aqa tᵉttwagg amenni. Netta igga ɛawed ict n taddart i yeǧis n firɛun, tenni yiwi Suliman d tamɣart, am wexxam-a wanita.   *
 
Man aya marra tuɣa-t zi tṣuḍar iɣřan, ttwassuydant ɛlaḥsab řeqyas, zi daxeř u zi barra ttwancaren s řmencar, u man aya zi dsas ař iẓra n sennej qaɛ u zi barra ař řemraḥ ameqqran. 10 Dsas ittwagg s tṣuḍar iɣřan, iẓra imeqqranen, iẓra n ɛecra n iɣaǧen u iẓra n tmenya n iɣaǧen, 11 u tiwa nsen tiṣuḍar iɣřan, ttwassuydant ɛlaḥsab řeqyas, uřa d akeccuḍ n tcejjart n tengelt. 12 Řemraḥ ameqqran i d as dd-innḍen tuɣa-t ɛawed zi třata n iseddiyyen n tṣuḍar ittwassuydan d ijj n useddi n ukeccuḍ n tcejjart n tengelt, am mammec i řemraḥ n daxeř i Taddart n SIDI am i wesqif n wadaf n Taddart.
 
Řxedmet n Ḥiram i Zzawect Tameqqrant
13 Ajeǧid Suliman issekk ɣar Ḥiram zi Ṣur, ḥima ad dd-yas. 14 Wanita tuɣa d mmis n ict n tajjač zi teqbič n Naftali u babas tuɣa-t d ijj n weryaz zi Ṣur, ijj n wemziř n nnḥas. Netta tuɣa iccur s řefhamet d řeɛqeř d tussna ḥima ad issuffeɣ qaɛ řxedmet n nnḥas. Netta yusa-dd ɣar ujeǧid Suliman u marra min igga, igga i-t n nnḥas.
15 Netta igga tnayen n ipilaren n nnḥas. Řuɛřa n ijj n upilar tuɣa-tt tmenṭac n iɣaǧen uca s yijj n ufiřu n tenɛac n iɣaǧen izemmar ad inneḍ i upilar nneɣni. 16 Netta igga tnayen n ttijan n nnḥas ifesyen ḥima ad ten ssarsen x izeǧifen n ipilaren. Řuɛřa n ijj n ttaj tuɣa-t xemsa n iɣaǧen u řuɛřa n ttaj nneɣni tuɣa-t uřa d xemsa n iɣaǧen. 17 Uřa d tijeṭṭayin ttwaggent s ict n řxedmet n umudi, am ifiřan ggin tent s ssnaseř i ttijan i iǧan x izeǧifen n ipilaren. Sebɛa i yijj n ttaj u sebɛa i ttaj nneɣni. 18 Igga ipilaren d tnayen n iseddiyyen n iremmamen i d as dd-innḍen i dd-yusin ak-d řxedmet n umudi i ittwaggen maḥend ad zzayes issduriy ttijan i iǧan tiwa i iseddiyyen n iremmamen. Ammu i igga uřa i ttaj nneɣni. 19 Ttijan x uzeǧif n ipilaren nni iǧan ɣar wesqif n wadaf ttwaggen am tlillicin, s ijj n řuɛřa n arebɛa n iɣaǧen. 20 Ttijan i iǧan x tnayen n ipilaren dewřen sennej ak-d wudem n uqurar nni tuɣa i-dd-ittasen ak-d řxedmet imuden. Uca mitayen n iremmamen quwwaren asen-dd s tnayen n iseddiyyen, uřa x ttaj nneɣni. 21 Xenni issbedd netta ipilaren ɣar wesqif n wadaf n Zzawect Tameqqrant. Issbedd apilar afusi, igga as Yaxin, uca issbedd uřa d apilar azeřmaḍ, igga as Buɛaz. 22 X uzeǧif n ipilaren tuɣa din ict n řxedmet izewwqen di furma n ijj n řkas am ict n tlillect. Ammu tᵉttwakemmeř řxedmet n ipilaren.
23 Netta igga tarimant ifesyen i waman. Tuɣa-t řeɛbar nnes zi ṭṭarf ař ṭṭarf nnes nneɣni ɛecra n iɣaǧen, d aqurar qaɛ, uca tiddi nnes tuɣa-t di xemsa n iɣaǧen u tzemmared ad as tennḍed s ict n ufiřu n řeɛbar n třatin n iɣaǧen.    24 Swadday i tma nnes i d as dd-innḍen qaɛ, tuɣa din tiɛebbuzin ak-d nnuwwarat yarezmen. Ɛecra di kuř ijj n uɣiř nnḍent i trimant. Tnayen n iseddiyyen nni n tɛebbuzin ak-d nnuwwarat yarezmen tuɣa ttwafesyen akides. 25 Tarimant tbedd x tenɛac n ifunasen. Třata zzaysen arrin s wudem nsen ɣar ccamal, třata zzaysen arrin s wudem nsen ɣar řɣarb, třata zzaysen arrin s wudem nsen ɣar ljanub u třata zzaysen arrin s wudem nsen ɣar ccarq. Tarimant tarsa xasen u marra zzɛenquqat nsen tuɣa dewřent xezzarent ɣar daxeř. 26 Tegdar n trimant d ijj cbar n ufus u tma nnes tuɣa am řxedmet izewwqen n tma n ijj n ufenjař, am tnewwact n tlillect. Twawit nnes tuɣa ařfayen ibatuten.
27 Netta igga ɛecra n tkarrutin n nnḥas. Tuɣa tuzzeggart n ict n tkarrut arebɛa n iɣaǧen u tiru nnes arebɛa n iɣaǧen u řuɛřa nnes třata n iɣaǧen. 28 Ammu i ttwaggent tkarrutin. Nitenti tuɣa ɣarsent tiřwiḥin ɛarrḍent u teřwiḥin ɛarrḍent tuɣa atent jar ccafud. 29 X teřwiḥin ɛarrḍent jar ccafud, tuɣa din arcamen n weyraden, ifunasen d ikiruben. Ɣar sennej x ccafud tuɣa din ijj n usennad. Sadu weyraden d ifunasen ttwaggent tiseddiyin n tefray nni yuyřen ɣar wadday . 30 Ict n tkarrut tuɣa ɣares arebɛa n tjarrarin n nnḥas d řeḥzamat n nnḥas. Arebɛa n iḍaren tuɣa ɣarsen tiɣarḍin. Tiɣarḍin ifesyen nni tuɣa atent sadu i tbanyut i usird, zzat i kuř taɣarḍt tuɣa din tiseddiyin n tefray. 31 Aqemmum nnes tuɣa-t ɣar daxeř n ttaj n tkarrut, ijj n uɣiř ɣar sennej. Aqemmum nnes tuɣa-t d aqurar, ijj n uɣiř d wezyen, ammu i ittwagg. X uqemmum tuɣa din ɛawed tinqacin, u tiřwiḥin nsen ɛarrḍent tuɣa atent s arebɛa n tɣemmura, war ǧint d tiqurarin. 32 Arebɛa n tjarrarin tuɣa atent sadu teřwiḥin ɛarrḍent u řeḥzamat n tjarrarin tuɣa atent ceddnent ɣar tkarrut. Řuɛřa n ict n tjarrart tuɣa-t ijj n uɣiř d wezyen. 33 Tijarrarin ttwaggent am ttwaggent tjarrarin n ijj n ukarru. Řeḥzamat nsent, yantat nsent, arradyawat nsent d iɣuřaf n řeḥzamat nsent ttwafesyent marra. 34 Tuɣa din arebɛa n tɣarḍin ɣar arebɛa n tɣemmura n ict n tkarrut. Tiɣarḍin nnes ffɣent zi tkarrut. 35 Sennej i tkarrut tuɣa din ijj n ṭṭarf n wezyen n uɣiř ibedd iquwwar as-dd zi marra iɣezdisen nnes. Sennej i tkarrut tuɣa din ɛawed ifassen ɣar teřwiḥin nnes. 36 X teřwiḥin ak-d ifassen nsent u x teřwiḥin tiqebbarin nsent inqec ikiruben, iyraden d tcejjura n tini, x kuř ijj n wemcan ixřa, uřa d tiseddiyin n tefray ɣar marra iɣezdisen. 37 Ammu i igga netta ɛecra n tkarrutin, marra s yijj n webrid n ufesyi, s yijj n řeqyas, s yijj n waddud.
38 Igga ɛawed ɛecra n tbanyutin n nnḥas. Ict n tbanyut iksi arebɛin ibatuten. Ict n tbanyut tuɣa-tt dayes arebɛa n iɣaǧen. X qaɛ ict zi ɛecra n tkarrutin nni tuɣa tekkar as-dd ict n tbanyut.    39 Igga xemsa n tkarrutin ɣar uɣezdis n zzat afusi n Taddart u xemsa ɣar uɣezdis n zzat azeřmaḍ n Taddart, maca tarimant tameqqrant i waman igga i-t ɣar uɣezdis n zzat afusi n Taddart, ɣar uɣezdis n ccarq, ɣar ljanub nnes. 40 Igga Ḥiram ɛawed tibanyutin i usird, iɣenjayen d ṭṭawyat i urucci. Ikemmeř Ḥiram marra řxedmet nni igga i ujeǧid Suliman i Taddart n SIDI:
41 tnayen n ipilaren d tnayen n iquraren n ttijan nni iǧan x izeǧifen n tnayen n ipilaren nni, uřa d tnayen n řexdayem n umuddi i d asent-i-dd-innḍen i tnayen n iquraren n ttijan inni iǧan x izeǧifen n tnayen n ipilaren, 42 arebɛa-mya n iremmamen i tnayen n řexdayem n umuddi ttwammsebḍan x tnayen n iseddiyyen n iremmamen i kuř řxedmet n umuddi i zi dřin nitni tnayen n iquraren n ttijan inni x wudem sennej n ipilaren, 43 d ɛecra n tkarrutin d ɛecra n tbanyutin nni iǧan x tkarrutin nni, 44 d tarimant d tenɛac n ifunasen sadu i trimant, 45 d teydurin d iɣenjajen d ṭṭawyat i urucci.
 
Marra řeqcuɛ-a i igga Ḥiram i ujeǧid Suliman i Taddart n SIDI, tuɣa aten zi nnḥas ittwassuydan. 46 Ajeǧid ikebb i-ten deg udewwar n L’Urdun di třaxt igdaren jar Sukkut d Ṣartan. 47 Suliman issɛizz x wewzan n marra řeqcuɛ-a di ssibbet n řqedd nsen d ameqqran aṭṭas. War beqqcen di řewzen n nnḥas.
 
48 Suliman igga marra řeqcuɛ i Taddart n SIDI:
aɛalṭar n wureɣ, tazewḍa n wureɣ min xef ittwassars weɣrum n wescan, 49 řa d řeqnadeř, xemsa ɣar yefus d xemsa ɣar uzeřmaḍ, zzat i Wexxam n Daxeř n Zzawect zeg wureɣ izedgen, řa d nnuwarat yarezmen d řefnarat d tjeqqaḍin n teftič n wureɣ, 50 uřa d ṭṭawyat d tjeqqaḍin d ṭṭawyat i urucci d tɣenjayin d tmejmarin n wureɣ izedgen. Xenni igga ɛawed řemfaseř i tewwura n Taddart n daxeř, i Weqdas x Uqeddas, uřa řemfaseř i tewwura n Wexxam n Zzawect Tameqqrant n Taddart zeg wureɣ.
 
51 Ammu i tᵉttwakemmeř marra řxedmet i igga ujeǧid Suliman i Taddart n SIDI. Uca Suliman issidef tiwhibin iqeddsen n babas. Issars nnuqart d wureɣ d řeqcuɛ deg ixxamen n txubay n Taddart n SIDI.   
 
 
7:1 1 Ij. 9:10 7:2 azɣar - niɣ ‘řɣabet’ niɣ ‘tazgant’. řuɛřa - niɣ ‘tiddi’. 7:8 1 Ij. 3:1 7:13 [2 Im. 3:15-17; 2 Im. 4; 2 Im. 5:1] — 2 Im. 2:12 7:14 Uf. 31:3 7:15 2 Ij. 25:16, 17; Irm. 52:21 7:19 tilillicin - ict n marka n nnuwarat daysen aẓri aṭṭas. 7:23 tarimant - s Tɛibranit ‘řebḥar’ niɣ ‘il’. 7:23 2 Im. 4:2; Irm. 52:20 7:24 2 Im. 4:3 7:26 abatu - ijj n ‘ubatu’ ɛraḥař 20 niɣ 40 litru. 7:38 abatu - ijj n ‘ubatu’ ɛraḥař 20 niɣ 40 litru. 7:38 2 Im. 4:6 7:46 Yac. 3:16 7:48 Uf. 25:23; 30:1 7:51 tiwhibin iqeddsen - s Tɛibranit ‘timesřayin iqeddsen’. 7:51 2 Ṣm. 8:7, 11; 2 Im. 5:1