18
Iliya d inabiyyen n Baɛal x wedrar n Karmil
1 Awarni waṭṭas n wussan, imsar, aqa yusa-dd wawař n SIDI ɣar Iliya deg useggʷas wiss třata, inna: “Uyur, scen ixef nnec i Axab, maɣar Necc ad wceɣ anẓar di temmurt.”
2 Uca yuyur Iliya ḥima ad isscen ixef nnes i Axab. Tuɣa řaẓ imɣar di Samarya.
3 Axab tuɣa iřaɣa i Ɛubadya wenni iǧan x taddart n ujeǧid. Ɛubadya tuɣa itteggʷed SIDI aṭṭas.
4 Umi Izabal iqḍa inabiyyen n SIDI, imsar, aqa Ɛubadya yiwi mya n inabiyyen, issnuffar i-ten, xemsin xemsin deg ijj n yefri, u iɛteq i-ten s weɣrum d waman.
5 Axab inna i Ɛubadya: “Uyur di temmurt ɣar marra tařawin n waman u ɣar marra tiɣezratin. Ad taɣ ad naf aheddu u zemmaren iysan d isardan ad qqimen ddaren u ad taf nhřa ma nenɣa řmař.”
6 Nitni bḍan tammurt jar asen ḥima ad tt cuqen. Axab yuyur x ijj n webrid, netta weḥḥdes, u Ɛubadya yuyur x ijj webrid nneɣni, uřa d netta weḥḥdes.
7 Umi tuɣa Ɛubadya deg webrid, xzar, aqa immeřqa akides Iliya. Ɛubadya iɛqeř i-t, iwḍa zzates s uɣembub nnes ɣar temmurt, inna: “Ma d cek, sidi inu Iliya?”
8 Inna as wanita: “D necc. Uyur, inna i sidi nnec: ‘Xẓar, Iliya aqa-t danita!’ ”
9 Maca netta inna: “Man ddenb i ggiɣ, aqa cek ad ayi tsellmed deg ifassen n Axab, ḥima ad ayi ineɣ?
10 S tidett am iddar SIDI, AREBBI nnec, war din uřa d ijj n řgens niɣ ict n tgeldit mani sidi inu war ijji ad xak yarzu! Mařa nnan nitni: ‘Netta war da iǧi!’, xenni ijja řgens nni ad ijjaǧ belli war zemmaren ad cek afen.
11 U řexxu cek tennid: ‘Uyur, ini i sidi nnec: Xzar Iliya aqa-t danita!’
12 Ad taɣ ad imsar, xmi i xak ɣa uyureɣ, aqa Arruḥ n SIDI ad cek iksi, war ssineɣ mani. Mařa xenni necc ad dd-aseɣ, ḥima ad t iniɣ i Axab u netta war cek ittif, netta ad ayi ineɣ, waxxa amsexxar nnec itteggʷed SIDI zi temẓi inu.
13 Ma war d ac ɛiwden ca i sidi inu, min ggiɣ necc, umi Izabal inɣa inabiyyen n SIDI? Aqa necc ssnuffareɣ mya n yeryazen zeg inabiyyen, kuř xemsin deg ijj n yefri? Uřa aqa necc ɛetqeɣ ten s weɣrum d waman?
14 U řexxu teqqared ‘Uyur, ini i sidi nnec: Xzar, Iliya aqa-t da!’ Netta ad ayi ineɣ.”
15 Inna Iliya: “S tidett am iddar SIDI n řɛeskarat zzat i wudem nnes umi beddeɣ, aqa nican necc ad seccneɣ ixef inu ass-a!”
16 Xenni yuyur Ɛubadya ɣar umsagar ak-d Axab, ixebbar as t. Uca Axab yuyur, maḥend ad imsagar ak-d Iliya.
17 Umi iẓra Axab Iliya, imsar, aqa Axab inna as: “Ma cek d aḍeyyeɛ n Israil?”
18 Netta inna: “Necc war ḍiyyɛeɣ ca Israil, maca cek d taddart n babac umi kenniw tejjim řumurat n SIDI ɣar uɣezdis u cek tuyured awarni i ‘Ibaɛlen’.
19 Xenni řexxu, smun marra Israil ɣari ɣar wedrar n Karmil uřa d arebɛa-mya u-xemsin n inabiyyen n Baɛl d arebɛa-mya n inabiyyen n trebbit n cwarti nni ittetten zi ṭṭabřa n Izabal.”
20 Axab issekk ijj n ureqqas ɣar marra ayt n Israil u issmun inabiyyen ɣar wedrar n Karmil.
21 Iliya iqarreb-dd ɣar marra řgens, inna: “Mecḥař ɛad i ɣa tekkem ɛad ttneqřabem kenniw ɣar tnayen n iɣezdisen? Mařa SIDI d AREBBI, ḍfarem as-dd, u mařa d Baɛl, xenni ḍfarem wanita!” Maca řgens war xas dd-yarri uřa s yijj n wawař.
22 Xenni inna Iliya i řgens: “Necc waha i iqqimen d anabi n SIDI uca inabiyyen n Baɛl aqa aten s arebɛa-mya u xemsin n yeryazen.
23 Ejj ad aneɣ wcen tnayen n ifunasen. Ejj i-ten xenni ad farzen afunas ameẓyan amezwaru i yixef nsen, ad t bḍan u ad t ssarsen x ukeccuḍ, maca war tteggen timessi sadu nnes. Necc ad sswejdeɣ afunas ameẓyan nneɣni, ad t ssarseɣ x ukeccuḍ u war tteggeɣ timessi sadu nnes.
24 Xenni ad třaɣam isem n arebbi nwem u necc ad řaɣiɣ Isem n SIDI, uca AREBBI wenni i dd ɣa yarren s tmessi, d Netta ad yiři d AREBBI.” Uca iřaɣa marra řgens, nnan: “Awař-a d lemliḥ!”
25 Inna Iliya i inabiyyen n Baɛl: “Xḍarem i yixef nwem afunas ameẓyan amezwaru u sswejdem as t d amezwaru, maɣar kenniw s waṭṭas. Řaɣam xenni isem n arebbi nwem, maca war srusam ca timessi sadu nnes.”
26 Nitni ksin afunas ameẓyan i d asen iwca netta u sswejden t. Xenni řaɣan i yisem n Baɛl, zi tuffut ař azal, nnan: “A Baɛl, arr aneɣ-dd!” Maca walu n řḥess uca uřa d ijj war dd-yarri ca. Nitni negzen x uɛalṭar i din ittwaggen.
27 Ɣar wazal ibda Iliya ittqessar xasen, inna: “Řaɣam s tmijja ijehden, aqa-t d arebbi. Nican netta ittxemmam, niɣ iɛezzeř cwayt, niɣ netta ɛad deg webrid. Ad taɣ itteṭṭeṣ uca ittxeṣṣa as ad ifaq ɛad.”
28 Nitni sɣuyen s tmijja ijehden u qessen ixef nsen s řesyuf d iḥricen am tnamit nsen, ařami uzzřen idammen nsen xasen.
29 Umi iɛdu azal, imsar, aqa nitni ttnebban ař dd ɣa yawyen tawhibt n řɣiǧet. Maca war din uřa d ict n tmijja uca uřa d ijj war dd-yarri u war din bu listijaba walu.
30 Xenni inna Iliya i řgens: “Qarrbem-dd ɣari!” Marra řgens iqarreb-dd ɣares u netta iɛdeř aɛalṭar n SIDI i tuɣa ittwahdem.
31 Iliya iksi tenɛac n yeẓra, x řqedd n tqebbař n iḥenjiren n Yaɛqub i umi dd-yusa wawař n SIDI i tuɣa inna: “Israil ad yiři d isem nnec.”
32 S yeẓra nni ibna netta aɛalṭar deg Yisem n SIDI. Iqewwar i uɛalṭar ict n tarya s řqedd n tnayen n řeqyas n zzariɛet.
33 Isettef akeccuḍ uca ibḍa afunas ameẓyan d iceǧiqen, issars i-t x ukeccuḍ.
34 Inna: “Ɛemmarem arebɛa n ibuqařen s waman uca zeǧɛem ten tiwa i tɣarṣt n wecmaḍ u x ukeccuḍ!” Uca yarni inna: “Ggem t twařa nneɣnit!” U nitni ggin t twařa nneɣnit. Xenni inna: “Ggem t wiss třata n twařawin!” U nitni ggin t wiss třata n twařawin.
35 Ttazzřen waman, nnḍen i uɛalṭar. U netta iɛemmar uřa d tarya s waman.
36 Umi qeddmen tawhibt n řɣiǧet, imsar, aqa anabi Iliya iqarreb-dd, inna: “SIDI, AREBBI n Ibrahim d Isḥaq d Israil, ejj ad ittwassen ass-a aqa Cek d AREBBI di Israil u aqa necc d amsexxar nnec i ǧiɣ u belli necc ggiɣ marra man aya ɛlaḥsab awař nnec.
37 Arr ayi-dd, a SIDI, arr ayi-dd, ḥima řgens-a ad issen, aqa Cek, a SIDI, d AREBBI i teǧid u aqa Cek tarrid-dd uř nsen ɣarek.”
38 Uca tehwa-dd tmessi n SIDI zeg ujenna, tecca taɣarṣt n wecmaḍ d ukeccuḍ d yeẓra d tɛejjajt, uca teřseḥ uřa d aman i iǧan di tarya.
39 Marra řgens iẓra i-t. Nitni wḍan s uɣembub nsen ɣar temmurt, nnan: “SIDI aqa-t d AREBBI, SIDI aqa-t d AREBBI!”
40 Iliya inna asen: “Ṭṭfem inabiyyen n Baɛl, war ttejjim uřa d ijj zzaysen ad yarweř.” Ṭṭfen ten, uca Iliya ijja i-ten ad ssehwan ɣar teɣzart n Qicun, inɣa i-ten dinni.
41 Xenni inna Iliya i Axab: “Geɛɛed, ecc, teswed, maɣar necc aqa ttesřiɣ řḥess n ijj n ucarcar n wenẓar aṭṭas.”
42 Axab igeɛɛed, ḥima ad icc ad isu uca igeɛɛed Iliya ɣar tqiccat n Karmil. Iqqunjeř x temmurt uca igga udem nnes jar ifadden nnes.
43 Xenni inna i umsexxar nnes: “Geɛɛed uca xzar ɣar řebḥar!” Wanita igeɛɛed, ixzar ɣar řaggʷaj, inna: “War ttwiřiɣ walu!” Iliya inna: “Dweř-dd twařa nneɣnit!”, uca ammu sebɛa n twařawin!
44 Ɣar twařa wiss sebɛa, imsar, aqa inna: “Xzar, ict n tseynut tameẓyant, am ufus n ijj n weryaz, igeɛɛed-dd zi řebḥar.” Xenni inna: “Uyur, ini i Axab: ‘Ḥezzem iysan, hwa-dd, maḥend anẓar war cek ittᵉṭṭef.”
45 Jar u jar ibbarcen ujenna s iseynuten u s usemmiḍ uca ibda wenẓar ad iwwet aṭṭas. Xenni inya Axab deg ukarru, iffeɣ, yuyur ɣar Yazraɛil.
46 Tuɣa afus n SIDI x Iliya. Netta ibyes taɛjinna nnes uca izwar ittazzeř zzat i wudem n Axab ařami dd-yiweḍ ɣar Yazraɛil.