14
Yarubɛam d unabi Ahiya
1 Di řweqt nni idweř Abiya, mmis n Yarubɛam, ihřec.
2 Inna Yarubɛam i temɣart nnes: “Kkar, beddeř arruḍ nnem, maḥend war iɛeqqeř uřa d ijj aqa cem d tamɣart n Yarubɛam, ad tuyured ɣar Cilu. Aqa dinni anabi Axiya wenni xafi innan aqa necc ad dewřeɣ d ajeǧid x řgens-a.
3 Ksi akidem ɛecra n iɣrumen d tefḍiřin d ijj n uqdiḥ n tamment uca uyur ɣares! Netta ad am ini min ɣa imsaren ak-d uḥenjir.”
4 Uca ammu i tegga temɣart n Yarubɛam. Nettat tekkar, tuyur ɣar Cilu, tiweḍ ɣar taddart n Axiya. Axiya tuɣa war itwiři maɣar tiṭṭawin nnes tuɣa dewřent ṭṭemmsent di tewsar nnes.
5 Maca SIDI inna i Axiya: “Xzar, ad dd-tas temɣart n Yarubɛam, ḥima ad cek tesseqsa x mmis, minzi wanita ihřec. Ta d ta i d as ɣa tinid. Xmi i dd ɣa tas, ad imsar, nettat ad tessniɛmiř ixef nnes d icten nneɣnit.”
6 Umi isřa Axiya řḥess n iṣuraf nnes ɣar tewwart, imsar, aqa netta inna: “Adef-dd ɣar daxeř, a tamɣart n Yarubɛam! Mayemmi tessniɛmiřed ixef nnem amecnaw cem d icten nneɣnit? Necc ttwassekkeɣ-dd ɣarem s ict n tebrat iqesḥen.
7 Uyur, ini i Yarubɛam: ‘Ammu i iqqar SIDI, AREBBI n Israil: Minzi Necc ssgeɛɛdeɣ cek zi jar řwesṭ n řgens u ggiɣ cek d řḥakem x řgens inu Israil,
8 uca carrgeɣ tageldit zi taddart n Dawud uca wciɣ ac tt, maca cek war teǧid ca am umsexxar inu Dawud, wenni iḥḍan řumurat inu d wenni dd ayi iḍfaren, ḥima ad yegg mɣir min iǧan nican di tiṭṭawin inu,
9 u minzi teggid tt d taɛeffant mahu x min ggin marra inni iǧan qbeř i cek, uca cek tuyured teggid irebbiten nneɣni d řexyařat nneɣni ifesyen, ḥima ad ayi tesɛared, uca tenḍared ayi awarni i weɛrur nnec,
10 s uya, xzar, ad awyeɣ tuɛeffna x taddart n Yarubɛam u ad teḥḥiɣ zi Yarubɛam marra wi t itteggen x řḥiḍ, am wenni ittwaṭṭfen, am wenni umi jjin di Israil, u Necc ad mḥiɣ min iqqimen n taddart n Yarubɛam, am mammec farḍen řeɣbar ař ɣa iqḍa.
11 Man wen zi taddart n Yarubɛam i ɣa immten di tendint, ad t ccen yiṭan u wi ɣa immten deg iyyar, ad t ccen ijḍaḍ n ujenna, maɣar SIDI d wenni tt innan.”
12 “U cem, kkar, uyur ɣar taddart nnem! Mařa iḍaren nnem ad awyen ɣar tendint, ad immet uḥenjir.
13 Marra Israil ad xas wten agejdur u nitni ad t neḍřen, maɣar netta waha zi taddart n Yarubɛam ad iṭṭef anḍeř, maɣar di taddart n Yarubɛam ittwaf dayes netta waha min icnan i SIDI, AREBBI n Israil.
14 SIDI ad dd-issekkar i Yixef nnes ijj n ujeǧid x Israil nni i ɣa iteḥḥan taddart n Yarubɛam, ass aqa d wa. Min din? Wah, ɛad řexxu!
15 SIDI ad iwwet Israil, ad t issenhezz ssa d ssa am uɣanim deg waman, u Netta ad iqřeɛ Israil zi temmurt-a iṣebḥen i iwca i řejdud nsen u Netta ad ten yareyyec x ujemmaḍ n iɣzar n Lfuraṭ, minzi nitni ggin i yixef nsen tirebbin n cwarti u sɛaren zzaysent SIDI.
16 Netta ad isellem Israil di ssibbet n ddnub i igga Yarubɛam, i zi yarra Israil ad ixḍa.”
17 Uca tekkar temɣart n Yarubɛam, tᵉṭṭef abrid uca tiweḍ ɣar Tirṣa. Umi dd-tusa ɣar tnebdat n taddart, immut uḥenjir.
18 Nitni neḍřen t u marra Israil iwta xas agejdur, ɛlaḥsab awař n SIDI i issiweř s ufus n umsexxar nnes, anabi Axiya.
19 Imezruyen iqqimen n Yarubɛam, mammec immneɣ d mammec iḥkem, xzar, ma man aya marra war ittwazemmem ca deg wedlis n imezruyen n ijeǧiden n Israil.
20 Ussan i iḥkem Yarubɛam tuɣa tnayen u-ɛicrin n iseggʷusa. Netta igga ad yareyyeḥ jar řejdud nnes u mmis Nadab idweř d ajeǧid deg wemcan nnes.
Řmewt n Raḥubɛam, mmis n Suliman
21 Raḥabɛam, mmis n Suliman, tuɣa d ajeǧid di Yahuda. Tuɣa ɣares waḥit u-rebɛin n iseggʷusa umi idweř netta d ajeǧid. Netta iḥkem sbeɛṭac n iseggʷusa di Urcalim, di tendint i ixḍar SIDI zi jar marra tiqebbař n Israil, ḥima ad din issemten Isem nnes. Yemmas qqaren as Niɛma, nettat zi temmurt n Ɛammun.
22 Yahuda igga min iǧan d aɛeffan di tiṭṭawin n SIDI u nitni sɛaren t mahu x marra min tuɣa ggin řejdud nsen s ddnub nsen i zi xḍan.
23 Maɣar uřa d nitni bnan řegɛudi i yixef nsen d imayḍuten iqeddsen d tirebbin n cwarti, di marra tiwririn yuɛřan u sadu kuř tacejjart tazizit.
24 Tuɣa din uřa d imetleyyen di temmurt. Nitni ggin marra jjɛayef n řegnus i tuɣa issuffeɣ SIDI zi řwart zzat i wudem n ayt n Israil.
25 Deg useggʷas wiss xemsa n ujeǧid Raḥabɛam, imsar, aqa igeɛɛed Cicak, ajeǧid n Miṣra, ḍidd i Urcalim.
26 Netta ikkes řeknuz zi Taddart n SIDI u řeknuz zi taddart n ujeǧid, iwa, netta yiwi marra. Yiwi uřa d marra tiseddariyin n uɛeskari n wureɣ nni igga Suliman.
27 Deg wemcan nsent igga ujeǧid Raḥabɛam tiseddariyin n uɛeskari ittwaggen zi nnḥas. Igga i-tent deg ifassen n imeqqranen x ireqqasen n tazřa nni tuɣa ttɛessan ɣar wadaf n taddart n ujeǧid.
28 Meřmi ma i ɣa yadef ujeǧid ɣar Taddart n SIDI, imsar, aqa ireqqasen n tazřa arebbun tent u iwyen tent xenni ɛawed ɣar wexxam n ireqqasen n tazřa.
29 Imezruyen iqqimen n Raḥabɛam d marra min igga, ma man aya marra war ittwazemmem ca deg wedlis n imezruyen n ijeǧiden n Yahuda?
30 Tuɣa iǧa umenɣi jar Raḥabɛam d Yarubɛam marra ussan nsen.
31 Raḥabɛam igga ad yareyyeḥ jar řejdud nnes. Netta ittwanḍeř jar řejdud nnes di tendint n Dawud. Yemmas qqaren as Niɛma, ict n temɣart Taɛammunit. Mmis Abiyam idweř d ajeǧid deg wemcan nnes.