5
Axtan n řgens di Jiljal
1 Umi marra ijeǧiden n Imuriyyen i iǧan x tma n řɣarb n L’Urdun d marra ijeǧiden n ayt n Kenɛan i iǧan ɣar řebḥar, sřan, aqa SIDI issiẓeɣ aman n L’Urdun zzat i wudem n ayt n Israil, ařami neẓwa ɣar ujemmaḍin, xenni ifsiy wuř nsen u war daysen iqqim ca arruḥ zzat i wudem n ayt n Israil.
2 Di řweqt nni issiweř SIDI ak-d Yacuwa: “Egg i yixef nnec ifarricen n weẓru uca xten i ayt n Israil i twařa wiss tnayen!”
3 Xenni igga Yacuwa ifarricen n weẓru i yixef nnes uca ixten i ayt n Israil ɣar Jibɛa-Haɛralut, aqa d ‘Tawrirt n Řeɛdařeyyat n Wextan’.
4 Man aya d řesbab i zi ixten i-ten Yacuwa: marra řgens i tuɣa dd-iffɣen zi Miṣra, marra iwetman, ixs ad yini marra iɛeskariyyen mmuten deg webrid di řexřa awarni i wuffuɣ nsen zi Miṣra.
5 Minzi marra řgens nni dd-iffɣen, tuɣa-t ittwaxten, maca marra řgens nni dd-ittwaxeřqen deg webrid di řexřa awarni i uffuɣ nsen zi Miṣra, nitni war ttwaxetnen ca.
6 Minzi arebɛin n iseggʷusa gguren ayt n Israil di řexřa ařami ittwahellek řgens marra, marra iɛeskariyyen i tuɣa dd-iffɣen zi Miṣra, inni tuɣa war isřin ɣar tmijja n SIDI d inni tuɣa ijjuǧ asen SIDI, war ten ittejji ca ad ẓaren tammurt nni x tuɣa ijjuǧ SIDI i řejdud nsen ad asen tt iwc, ict n temmurt ifeyyḍen s uɣi d tamment.
7 Iḥenjiren nsen inni issnekkar Netta deg wemcan nsen, d ina d inni tuɣa ixten Yacuwa, minzi nitni ɣarsen ɛad řeɛdařyet minzi war d asen xetnen deg webrid.
8 Umi kemmřen ad xten marra řgens, imsar belli qqimen deg wemcan nsen di řmargeḥ n řɛeskar ařami ggenfan.
9 Inna SIDI i Yacuwa: “Ass-a aqa kkseɣ xawem řefḍiḥet n Miṣra.” X uyenni qqaren as i wemcan nni Jiljal, ař ass-a.
Taɣarṣt n Useɛdu - ‘Manna’, aɣrum n ujenna, ibedd
10 Wtin ayt n Israil iqiḍan nsen di Jiljal uca sswejden Taɣarṣt n Useɛdu deg wass arbeɛṭac n uyur nni, di ǧiřet, di řewḍat n Ariḥa.
11 Nitni ccin aɣrum břa antun d teɣwawin icennfen zi řɣiǧet n temmurt, zi tiwecca awarni i Taɣarṣt n Useɛdu, deg wass nni simant nnes.
12 Tiwecca nnes, awarni řami ccin zi řɣiǧet n temmurt, inneqḍeɛ manna. Ssenni war iqqim ɛad ‘manna’ i ayt n Israil. Deg useggʷas nni ccin zi řɣiǧet n temmurt n Kenɛan.
Yacuwa iẓra Ameqqran n řɛeskar n SIDI
13 Umi tuɣa iǧa Yacuwa zzat i Ariḥa, issgeɛɛed tiṭṭawin nnes, uca xzar, tuɣa ijj n weryaz ibedd zzates, ɣares ssif nnes deg ufus nnes. Yacuwa iruḥ ɣares inna as: “Cek ma zzayneɣ niɣ zeg iɣrimen nneɣ?”
14 Netta yarra-dd: “Lla, minzi necc d akumandar n řɛeskar n SIDI. Necc řexxu i dd-usiɣ!” Uca iwḍa Yacuwa x uɣembub nnes ɣar temmurt, yuḍar, uca inna as: “Min ixs ad yini Sidi inu i umsexxar nnes?”
15 Xenni inna akumandar n řɛeskar n SIDI i Yacuwa: “Kkes tisiřa nnec zeg iḍaren nnec, minzi amcan i xef tbedded d amqeddas i iǧa.” Uca amenni i igga Yacuwa.