18
Tazeddiɣt d wagraw n řgens di Cilu
1 Marra tamesmunt n ayt n Israil tmun di Cilu uca dinni i wtin Aqiḍun n Umsagar, awarni umi sswaḍɛen tammurt i yixef nsen.
2 Tuɣa qqiment jar ayt n Israil sebɛa n tqebbař, tinni tuɣa war d asent immewcen ɛad d tasɣart nsent.
3 Inna Yacuwa i ayt n Israil: “Ař meřmi ttrajam ɛad ař ɣa tadfem ad tᵉṭṭfem tammurt i d awem iwca SIDI, AREBBI n řejdud nwem, d řwart?
4 Ksim i yixef nwem třata n yeryazen zi kuř taqbič, ḥima necc ad ten ssekkeɣ uca nitni ad kkaren ad kken x temmurt uca ad tt zemmen zi jjihet mammec ittxeṣṣa ad tiři tesɣart nsen, xenni ad ɣari dd-ɛeqben.
5 Ad tt bḍan x sebɛa n tseqqar. Yahuda ad iqqim x temmurt nnes di ljanub u taddart n Yusuf ad teqqim x temmurt nnes di ccamal.
6 Kenniw ad tzemmem tammurt x sebɛa n tseqqar uca izemmanen nni ad ayi ten dd-tawyem danita, xenni necc ad awem nḍareɣ taqedduḥt zzat i wudem n SIDI, AREBBI nneɣ.
7 Minzi Ilawiyyen war ɣarsen bu tasɣart di řwest nwem, minzi tukehhant n SIDI d tasɣart nsen. Jad d Rubin d wezyen n teqbič n Manassa ṭṭfen tasɣart nsen x ujemmaḍ n L’Urdun, ɣar ccarq, tasɣart nni i d asen iwca Musa, amsexxar n SIDI.
8 Kkaren iryazen uca ṭṭfen abrid. Yumur Yacuwa i yinni iṭṭfen abrid maḥend ad zemmen tammurt s tira, inna: “Uyurem, ttekkem x temmurt uca zemmemem tt. Xenni ɛeqbettiw-dd ɣari u necc ad awem da nḍareɣ taqedduḥt di Cilu zzat i wudem n SIDI.”
9 Iryazen ṭṭfen abrid, cuqen tammurt uca zemmen tt deg ijj n wedlis ittwannḍen, settfen tt ɛlaḥsab tineddam, ɛlaḥsab sebɛa n tseqqar, uca ɛeqben ɣar Yacuwa di řmargeḥ n řɛeskar di Cilu.
10 Xenni inḍar Yacuwa taqedduḥt zzat i wudem n SIDI. Din i d asen ibḍa Yacuwa tammurt jar ayt n Israil, ɛlaḥsab tirbiɛin nsen.
Tasɣart n Binyamin
11 Taqedduḥt n teqbič n Binyamin teḍhar-dd ɛlaḥsab řaǧat nsen, u tasɣart n tqedduḥt nsen tusa-dd jar ayt n Yahuda d ayt n Yusuf.
12 Itteffeɣ weymir nsen ɣar uɣezdis n ccamal zi L’Urdun uca ittgeɛɛad ɣar weɛrur n ccamal n Ariḥa, iɛeddu xenni ɣar řɣarb ittekk x idurar uca ṭṭrufa nnes ttakkwaḍen ař řexřa n Bayt-Awan.
13 Ssenni iẓekkwa weymir ɣar Luz x weɛrur n ljanub n Luz, wa d Bayt-Il, uca xenni ihekkwa-dd ɣar Ɛaṭarut x wedrar i iǧan ɣar ljanub n Bayt-Ḥurun n wadday.
14 Aymir iɛeddu uca ittmeyyeř jjihet n řɣarb, xenni ɣar ljanub zeg wedrar i iǧan arendad n Bayt-Ḥurun, xenni yarenni iggur ɣar ljanub uca ṭṭrufa nnes ttakkwaḍen ař Qaryat-Baɛla, ta d Qaryat-Yaɛarim, ict n tendint n ayt n Yahuda. Wa d aɣezdis n řɣarb.
15 Aɣezdis n ljanub itteffeɣ zi ṭṭarf aneggar n Qaryat-Yaɛarim. Ibedda weymir zi řɣarb u ittakkwaḍ ɣar tařa n waman n Naftuḥa.
16 Xenni ihekkwa-dd weymir ɣar ṭṭarf n wedrar i zi tᵉttwařid taɣzurt n mmis n Hinnum nni iǧan ɣar ṭṭarf n ccamal n teɣzurt n Irafawiyyen uca xenni ihekkwa-dd x teɣzurt n Hinnum ɣar uɣezdis n ljanub n wedrar n Iyabusiyyen uca ihekkwa-dd ɣar tařa n Rujil.
17 Uca ittekk x ccamal uca ittakkwaḍ ɣar Ɛayn-Camc uca iɛeddu ɣar Jalilut, nni iǧan arendad n webrid n uẓekkwu x idurar n Adummim uca ihekkwa-dd ɣar weẓru n Buhan, mmis n Rubin,
18 u iẓekkwa ɣar řgeɛɛdet nni iǧan ɣar ccamal arendad n Řewḍa uca xenni ihekkwa di Řewḍa.
19 Xenni iɛeddu weymir ɣar ccamal ɣar řgeɛɛdet n Bayt-Ḥujla u ṭṭrufa nnes aqa aten ɣar iřes n ccamal n Řebḥar Ameǧaḥ, ɣar uneggar n L’Urdun di ljanub. Wa d aymir n ljanub.
20 L’Urdun tuɣa d aymir nnes x uɣezdis n ccarq. Ta d tasɣart n ayt n Binyamin ɛlaḥsab iymiren nnes i d as iquwwaren, ɛlaḥasab řaǧat nsen.
21 Tineddam n teqbič n ayt n Binyamin, ɛlaḥsab řaǧat nsen d tina: Ariḥa d Bayt-Ḥujla d Ɛimaq-Qiṣiṣ
22 d Bayt-Ɛaraba d Ṣamarayim d Bayt-Il
23 d Iɛawiyyen d Ha-Fara d Ɛufra,
24 d Kafar-Ɛammuni d Ha-Ɛufni d Jabaɛ. Marra jmiɛ tuɣa atent di tenɛac n tneddam ak-d ředcur nsent.
25 Jibɛun d Rama d Biɛrut
26 d Miṣfa d Kafira d Muṣa
27 d Raqam d Yarafwil d Tarala
28 d Ṣalaɛ d Alaf d Ayabusi, wenni d Urcalim, d Jibɛa d Qaryat. Marra jmiɛ tuɣa atent di arbeɛṭac n tneddam ak-d ředcur nsent. Ta d tasɣart n ayt n Binyamin ɛlaḥsab řaǧat nsen.