13
SIDI issiweř ak-d Yacuwa
1 Umi tuɣa Yacuwa d awessar uca imɣar deg wussan n tudart nnes, inna as SIDI: “Cek tewsared u temɣared deg wussan uca ɛad teqqim aṭṭas n temmurt maḥend ad tt teksid d řwart.
2 Ta d tammurt iqqimen: marra iduwwaren n Ifilisṭiniyyen u marra jjwayeh n Ijacuriyyen,
3 zeg yeɣzar n Ciḥur nni issizzřen zzat i wudem n Miṣra, ař aymir n Ɛiqrun di ccamal nni ittwaḥseb-dd d tammurt n ayt n Kenɛan, dayes xemsa n řbacat n tneddam n Ifilisṭiniyyen, ixs ad yini Aɣazi d Acdudi d Acqaluni, Ajitti, d Aɛaqruni, d Iɛawiyyen,
4 uca xenni zi ljanub marra tammurt n ayt n Kenɛan d Muɣara tenni n Iṣiduniyyen, ař Afiq u ař weymir n Imuriyyen,
5 uca xenni tammurt n Ijibliyyen d marra Lubnan manis i dd-tneqqar tfuct, zi Baɛl-Jad swadday i wedrar n Ḥirmun ař mani ittakkwaḍ bnadem ɣar Ḥamat,
6 marra inni izeddɣen di jjwayeh zeg idurar n Lubnan ař Misrafut-Mayim, marra Iṣiduniyyen. Necc ad xasen aẓẓřeɣ zzat i wudem n ayt n Israil. Egg maca tammurt d řwart i Israil waha, am mammec d ac umureɣ.”
Tasɣart n Rubin, n Jad u i wezyen n teqbič n Manassi
7 “Bḍa řexxu tammurt-a d řwart jar tesɛa n tqebbař d wezyen n teqbič n Manassa,
8 iryazen n Manassa nni iksin ak-d Irubiniyyen d Ijadiyyen tasɣart n řwart nsen nni i d asen iwca Musa x ujemmaḍ n L’Urdun di ccarq, am mammec d asen tt iwca Musa, amsexxar n SIDI:
9 zi Aruɛir i iǧan x tma n Arnun d tendint i iǧan di řwesṭ n teɣzurt d marra řwaṭa yuɛřan zi Miydaba ař Dibun,
10 d marra tineddam n Siḥun, ajeǧid n Imuriyyen wenni tuɣa iḥekkmen di Ḥacbun, ař aymir n ayt n Ɛammun
11 uřa d Jilɛad d temmurt n Ijacuriyyen d Imaɛkiyyen d qaɛ wedrar n Ḥirmun d marra Bacan ař Salxa,
12 marra tageldit n Ɛuj, di Bacan, wenni tuɣa iḥekkmen di Ɛactarut d Idraɛi. Netta tuɣa iqqim zi min iqqimen n Irafawiyyen nni tuɣa iwta i-ten Musa uca yuẓẓeř xasen zi tesɣart nsen.
13 Maca ayt n Israil war uẓẓřen x ayt n Ijacuriyyen d Imaɛkiyyen zi tesɣart nsen. Jacur d Maɛkat qqimen zeddɣen di řwesṭ n ayt n Israil ař ass-a.
14 I teqbič n Lawi waha umi i war iwci tasɣart. Tiɣarṣa n tmessi n SIDI, AREBBI n Israil, d tasɣart nnes, am mammec tuɣa i d as issiweř Netta.
15 Iwca Musa i teqbič n ayt n Rubin tasɣart nsen, ɛlaḥsab řaǧat nsen.
16 I nitni umi dd-tekkar temmurt n Aruɛir, tenni i iǧan ɣar tma n teɣzart n Arnun ak-d tendint nni iǧan di řwesṭ n teɣzurt d marra řwaṭa yuɛřan ař Midiba.
17 Ḥacbun d marra tineddam nnes nni iǧan x řwaṭa yuɛřan: Dibun, Bamut-Baɛl d Bayt-Baɛl-Maɛun
18 d Yahṣa d Qadimut d Mayfaɛa
19 d Qaryatayim d Sibma d Ṣarat-Ha-Caḥar x wedrar n řewḍa n teɣzurt,
20 d Bayt-Faɣur d tisawnin n Fisja d Bayt-Yacimut,
21 marra tineddam x řwaṭa yuɛřan d marra tageldit n Siḥun, ajeǧid n Imuriyyen, inni i tuɣa iḥekkmen di Ḥacbun, i x iɣřeb Musa, am iɣřeb uřa x řḥukkam n Midyan: Awi d Raqam d Ṣur d Ḥur d Rabaɛ, inni i d asen iwca Ṣihun jjehd akides, imezdaɣ n temmurt.
22 Sennej i marra inni ittwanɣen di garra, nɣin ayt n Israil ɛawed Balɛam, mmis n Baɛur, agezzan, s řeqḍeɛ n ssif.
23 Tuɣa L’Urdun ak-d jjwayeh nnes d aymir n ayt n Rubin ak-d temmurt ɣar tma nnes. Ta d tasɣart n ayt n Rubin ɛlaḥsab řaǧat nsen, ak-d tneddam d dcurat nsen.
24 Iwca Musa i teqbič n Jad, i ayt n Jad, tasɣart nsen ɛlaḥsab řaǧat nsen.
25 I nitni umi dd-tekkar temmurt n Yaɛazir d marra tineddam n Jilɛad d wezyen n temmurt n ayt n Ɛammun ař Aruɛir nni iǧan zzat i wudem n Rabba,
26 zi Ḥacbun ař Ramat-Miṣfa d Buṭunim, u zi Maḥanayim ař aymir n Dabir.
27 U di řewḍa n teɣzurt: Bayt-Haram d Bayt-Nimra d Sukkut d Ṣafun d min iqqimen n tgeldit n Siḥun, ajeǧid n Ḥacbun, L’Urdun d jjwayeh nnes ař aneggar n řebḥar n Kinnarat x ujemmaḍ n L’Urdun ɣar ccarq.
28 Ta d tasɣart n ayt n Jad, ɛlaḥsab řaǧat nsen, tineddam d dcurat nnes.
29 Iwca Musa i wezyen n teqbič n Manassa tasɣart nsen. Tekkar as-dd i wezyen n teqbič n Manassa, ɛlaḥsab řaǧat nsen.
30 Tuɣa tammurt nsen zi Maḥanayim: marra Bacan, marra tageldit n Ɛuj, ajeǧid n Bacan, d marra dcurat n Ya’ir nni iǧan di Bacan, settin n tneddam.
31 D wezyen n Jilɛad d Ɛactarut d Idriɛi, tineddam n tgeldit n Ɛuj di Bacan, kkaren-dd i iḥenjiren n Maxir, mmis n Manassa, aqa i wezyen n iḥenjiren n Maxir, ɛlaḥsab řaǧat nsen.
32 Tina d jjwayeh i tuɣa ibḍa Musa d řwart di řewḍat n Mu’ab, x ujemmaḍ n L’Urdun, ɣar Ariḥa, ɣar ccarq.
33 Maca i teqbič n Lawi war d as iwci Musa ca tasɣart. SIDI, AREBBI n Israil d tasɣart nsen, am mammec tuɣa akidsen issiweř. *