36
Adlis ittwannḍen
1 Deg useggʷas wiss arebɛa n Yahuyaqim, mmis n Yuciya, ajeǧid n Yahuda, imsar aqa yusa-dd wawař n SIDI wanita ɣar Irmiya, inna:
2 “Ksi ijj n wedlis ittwanḍen uca ari xas marra awařen i ɣarek ssiwřeɣ x Israil u x Yahuda u x marra řegnus, zeg wass i dd ɣarek ssiwřeɣ, zeg wussan n Yuciya ař ass-a.
3 Ad taɣ ad sřen inni n taddart n Yahuda x marra řɣar nni xseɣ ad asen ggeɣ maḥend ad dd-dewřen ad tuben, kuř ijj zeg webrid nnes aɛeffan, u Necc ad asen ɣfareɣ řmuɛṣiyyet nsen d ddnub nsen.”
4 Xenni iřaɣa-dd Irmiya x Barux, mmis n Niri-Yah, uca yura Barux zeg uqemmum n Irmiya marra awařen n SIDI nni d as inna deg ijj n wedlis ittwannḍen.
5 Yumur Irmiya i Barux, inna: “Necc ttwassbeddeɣ, war zemmareɣ ad dd-adfeɣ ɣar Taddart n SIDI.
6 Adef-dd cek ɣar daxeř uca ɣar awařen n SIDI zeg wedlis ittwanḍen nni turid zeg uqemmum inu deg imezzuɣen n řgens di Taddart n SIDI deg wass n uẓummi. Ittxeṣṣa ad ten tɣared deg imezzuɣen n marra ayt n Yahuda, inni dd-yusin zi marra tineddam nsen.
7 Ad taɣ ad yaf tutra nsen arḍa zzat i wudem n SIDI u ad dd-dewřen ad tuben nitni, kuř ijj zeg webrid nnes aɛeffan, maɣar d ameqqran i yeǧa weɣḍab d wesɛar i x tuɣa issiweř SIDI i řgens-a.”
8 Barux, mmis n Niri-Yah, igga marra am mammec t yumur unabi Irmiya, uca iɣra-dd awařen n SIDI i řgens zeg wedlis ittwannḍen di Taddart n SIDI.
9 Deg useggʷas wiss xemsa n Yahuyaqim, mmis n Yuciya, ajeǧid n Yahuda, deg uyur wiss tesɛa barrḥen s ijj n uẓummi zzat i wudem n SIDI i marra řgens di Urcalim u i marra řgens nni dd-yusin di Urcalim zi tneddam n Yahuda.
10 Iɣra-dd Barux awařen n Irmiya di Taddart n SIDI x imezzuɣen n marra řgens zeg wedlis ittwannḍen, deg wexxam n Jamarya, mmis n Cafan, amarir, di řemraḥ n sennej, ɣar wadaf n tewwart n jdid n Taddart n SIDI.
11 Umi Mixa-Yahu, mmis n Jamarya, mmis n Cafan, isřa i marra awařen n SIDI zeg wedlis ittwannḍen,
12 ihwa-dd netta ɣar taddart n ujeǧid, ɣar wexxam n umarir. Xzar, qqimen din marra řḥukkam: Alicamaɛ, amarir, Dalaya, mmis n Camɛiya, Il-Natan, mmis n Ɛakbur, Jamarya, mmis n Cafan, Ṣidqiya, mmis n Ḥananya, u marra řḥukkam.
13 Mixa-Yahu iɛawed asen marra awařen nni tuɣa isřa umi dd-iɣra Barux zeg wedlis ittwanḍen deg imezzuɣen n řgens.
14 Xenni ssekken-dd marra řḥukkam Yahudi, mmis n Natanya, mmis n Calamya, mmis n Kuci, ɣar Barux, nnan: “Adlis ittwanḍen manis dd-teɣrid x řgens, ksi t deg ufus nnec uca as-dd!” Řexdenni iksi Barux, mmis n Niri-Yah, adlis ittwannḍen nni uca yudef-dd ɣarsen.
15 Nitni nnan as: “Qqim, tɣared adlis ittwannḍen xaneɣ!” Xenni iɣra t Barux xasen.
16 Umi sřin nitni marra awařen nni, xzaren deg wayawya ggʷeden uca nnan i Barux: “Nican ad nɛawed marra awařen-a i ujeǧid.”
17 Nitni sseqsan Barux, nnan: “Ini aneɣ maca, mammec turid marra awařen-a zeg uqemmum nnes?”
18 Yarra-dd xasen Barux: “S uqemmum nnes i xafi iɣra marra awařen-a u necc uriɣ ten s ssmex deg wedlis-a ittwannḍen.”
19 Xas uca nnan řḥukkam i Barux: “Uyur, ffar ixef nnec, cek uřa d Irmiya! Uřa d ijj war ittessen mani teǧam.”
20 Udfen nitni ɣar ujeǧid di řemraḥ, maca nitni tuɣa xemmřen adlis ittwannḍen deg wexxam n Ilicamaɛ, amarir, u nitni ḥajan marra awařen-a ɣar imezzuɣen n ujeǧid.
21 Xenni issekk ujeǧid Yahudi maḥend ad dd-yawi adlis ittwannḍen. Wanita yiwi t i-dd zeg wexxam n Alicamaɛ, amarir, uca iɣra i-t-i-dd Yahudi deg imejjan n ujeǧid u deg imejjan n marra řḥukkam nni dd-ibedden ɣar ujeǧid.
22 Tuɣa iqqim ujeǧid di taddart n tagarst, tuɣa d ayur wiss tesɛa. Zzates tareqq dinni tmessi x tmejmart.
23 Řami iɣra Yahudi třata niɣ arebɛa n iḍewḍan, iqess i-ten ujeǧid s řmuss n umarir uca inḍar i-ten di tmessi x řmejmar, ařami tuɣa timessi x řmejmar tecca marra adlis.
24 Ajeǧid d marra imsexxaren nnes inni isřin i wawařen-a marra, war nnxeřɛen u war carrgen arruḍ nsen.
25 Ttaren Il-Natan d Dalaya d Jamarya i ujeǧid aṭṭas ḥima war issecmiḍ adlis ittwannḍen, maca netta war ɣarsen isři.
26 Ɛad yumur ujeǧid i Yarḥamiyil, mmis n ujeǧid, i Saraya, mmis n Ɛazrayil, u i Calamya, mmis n Ɛabdiyil, ḥima ad ṭṭfen amarir Barux d unabi Irmiya d imeḥbas. Maca SIDI issnuffar i-ten.
27 Yusa-dd wawař n SIDI ɣar Irmiya, awarni řami issecmeḍ ujeǧid adlis ittwannḍen d wawařen nni yura Barux, inni dd-iffɣen zeg uqemmum n Irmiya, inna:
28 “Ksi ɛawed ijj n wedlis ittwannḍen nneɣni u ari xas marra awařen imezwura, inni tuɣa deg wedlis amezwaru i issecmeḍ Yahuyaqim, ajeǧid n Yahuda,
29 uca ini i Yahuyaqim, ajeǧid n Yahuda: ‘Ammu i iqqar SIDI: Cek tesscemḍed adlis-a ittwannḍen, tennid: Mayemmi dayes turid, tennid: Ajeǧid n Babil ad dd-yas, ad ixarreb tammurt uca ad zzayes imḥa bnadem d řmař?’
30 ‘S uya, ammu i iqqar SIDI x Yahuyaqim, ajeǧid n Yahuda: War ɣares ittiři wenni i ɣa iqqimen x řɛarc n Dawud uca řxecbet nnes ad temmenḍar i řeḥmu n uziř u i tesmeḍ n ǧiřet.
31 Necc ad zzayes xeřfeɣ řmuɛṣiyyet nsen, uřa zi tarwa nnes uřa zeg imsexxaren nnes. Necc ad ssɣeḍřeɣ xasen, x imezdaɣ n Urcalim u x iryazen n Yahuda, marra řɣar i d asen nniɣ, waxxa nitni war xsen ad sřen.’ ”
32 Iksi Irmiya ijj n wedlis nneɣni ittwannḍen uca iwca i-t i umarir Barux, mmis n Niri-Yah. Wanita yura xas, zeg uqemmum n Irmiya, marra awařen n wedlis ittwannḍen nni tuɣa Yahuyaqim, ajeǧid n Yahuda, issecmeḍ s tmessi uca ttwarnin ɛad ɣarsen waṭṭas n wawařen nneɣni i ten yudsen.