29
Tabrat n Irmiya i imeḥbas di Babil
1 Ina d awařen n tebrat i dd-issekk unabi Irmiya zi Urcalim i imɣaren n řgens i iqqimen jar ayt n lmenfa i ikehhanen d inabiyyen u i marra řgens nni tuɣa indeh Nabuxadnaṣṣar zi Urcalim di lmenfa ɣar Babil,
2 awarni i umi iffeɣ ujeǧid Yakunya d yemmas n ujeǧid, řa imsexxaren icennɛen, řa řḥukkam n Yahuda d Urcalim, řa řemɛuǧam uřa d imziřen zi Urcalim.
3 Issekk Irmiya tabrat nni s ufus n Alɛasa, mmis n Cafan, d Jamarya, mmis n Ḥilqiya, inni issekk Ṣidqiya, ajeǧid n Yahuda, ɣar Babil ɣar Nabuxadnaṣṣar, ajeǧid n Babil. Tabrat tenna:
4 “Ammu i iqqar SIDI n řɛeskarat, AREBBI n Israil, i marra ayt n lmenfa nni dd-iwyeɣ zi Urcalim ɣar Babil:
5 ‘Sgeɛɛdem tudrin uca zedɣem daysent, ẓẓum iḥwicen uca ccem řɣiǧet nsen,
6 awyem timɣarin uca jjem-dd iḥenjiren d tḥenjirin, awyem i iḥenjiren nwem timɣarin uca wcem tḥenjirin nwem i yeryazen, maḥend ad urwent iḥenjiren d tḥenjirin. Ḥḍam ad dinni temmarnim, war tneqqṣem,
7 arzum řehna i tendint mani kenniw i ɣa nedheɣ u ttarem i man aya i SIDI, maɣar di řehna nnes i iǧa řehna nwem.’
8 Maɣar ammu i iqqar SIDI n řɛeskarat, AREBBI n Israil: ‘War ttejjim ad kenniw cemten inabiyyen d igezzanen nni iǧan di řwesṭ nwem u war ttesřim ca ɣar ayt n bu-tirja i kenniw ittejjan ad tarjam,
9 maɣar nitni ttnebban ixarriqen s Yisem inu. Necc war ten dd-sekkeɣ ca, ammu i iqqar SIDI.’
10 Minzi ammu i iqqar SIDI: ‘Xmi ɣa qefřen sebɛin n iseggʷusa di Babil, xenni ad kenniw arzfeɣ uca ad awem kemmřeɣ awař inu aṣebḥan umi kenniw ɣa arreɣ ɣar temmurt-a.
11 Maɣar Necc ssneɣ man ixarriṣen i ɣari xawem, ammu i iqqar SIDI, ixarriṣen n řehna, war iǧi n řɣar, ḥima ad awem wceɣ imar d řayas.
12 Mařa kenniw ad ayi třaɣam, ad ɣari teẓẓaǧem, Necc ad ɣarwem sřeɣ.
13 Ad xafi tarzum uca ad ayi tafem mařa kenniw tarzum xafi s marra wuř nwem.
14 Ad zzaywem ttwafeɣ, ammu i iqqar SIDI, ad ssenqeřbeɣ tameḥbast nwem uca ad kenniw ssmuneɣ zi marra řegnus u zi marra imucan mani xawem uẓẓřeɣ, ammu i iqqar SIDI, u Necc ad kenniw arreɣ ɣar wemcan i zi kenniw nedheɣ di lmenfa.’ ”
15 “Maca minzi tennam: ‘SIDI issnekkar aneɣ-dd inabiyyen di Babil!’,
16 x uya, ammu i iqqar SIDI x ujeǧid, wenni iqqimen x řɛarc n Dawud, u x marra řgens i izeddɣen di tendint-a, aytmatwem inni war akidwem yuyuren di lmenfa,
17 wah, ammu i iqqar SIDI n řɛeskarat: “Xzar, Necc ad ssekkeɣ jar asen ssif d řaẓ d ṭṭaɛun uca ad ten jjeɣ am tazart ixsaren, tenni war iḥřin maḥend ad zzayes ccen.
18 Necc ad ten ḍfareɣ s ssif d řaẓ d ṭṭaɛun u Necc ad ten arreɣ d ict n řqecɛet n unexřiɛ i marra tigeldiwin n ddunect, ad tiřid d ict n řqecɛet n wexzi d usiggʷed d tseḍḥact d řḥegra jar marra řegnus mani ten i ɣa ssuffɣeɣ.
19 minzi nitni war sřin ɣar wawařen inu, ammu i iqqar SIDI, umi ɣarsen dd-ssekkeɣ imsexxaren inu, inabiyyen. Ɛad zeg umezwaru ssekkeɣ ten, maca kenniw war tesřim ca, ammu i iqqar SIDI.”
20 “Kenniw maca, sřem i wawař n SIDI, marra kenniw inni ittwanedhen di lmenfa, inni ssekkeɣ zi Urcalim ɣar Babil.
21 Ammu i iqqar SIDI n řɛeskarat, AREBBI n Israil, x Axab, mmis n Qulaya, u x Ṣidqiya, mmis n Maɛasiya, inni d awem ittnebban deg Yisem inu s ixarriqen: ‘Xzar, Necc ad ten ggeɣ deg ufus n Nabuxadraṣṣar, ajeǧid n Babil, u netta ad ten ineɣ zzat i tiṭṭawin nwem.
22 Marra ayt n lmenfa zi Yahuda nni iǧan di Babil ad zzaysen kksen ict n nneɛřet, ad inin: SIDI ad cek yegg am Ṣidqiya d Aḥab nni icnef ujeǧid n Babil s tmessi!,
23 minzi nitni ggin ict n tubbuheřya di Israil: nitni znan ak-d temɣarin n wi ten yudsen u barrḥen s Yisem inu awařen n ixarriqen i tuɣa war d asen nniɣ. Necc d wenni issnen d wenni icehden x man aya!’, ammu i iqqar SIDI.”
24 I Camɛiya zi Naḥlam, ittxeṣṣa ad kides tessiwřed ad as tinid ammu:
25 “Ammu i iqqar SIDI n řɛeskarat, AREBBI n Israil, iqqar: ‘Minzi s isem nnec i-dd-tessekked tibratin i marra řgens di Urcalim u i ukehhan Ṣafanya, mmis n Maɛasiya, u i marra ikehhanen, yura daysen:
26 SIDI igga cek d akehhan deg wemcan n ukehhan Yahuyadaɛ, maḥend ad din iřin iweqqafen di Taddart n SIDI x kuř ijj ubuhaři nni itteggen ixef nnes d anabi. Ad t teqqned x ukeccuḍ ak-d řgid x yiri nnes.
27 Xenni řexxu, mayemmi war tɛaqbed Irmiya zi Ɛanatut, wenni xawem ittarran ixef nnes d anabi?
28 Maɣar netta issekk-dd ict n tebrat i neccin di Babil mani iqqar: Aṭṭas i ɣa iqqimen! Sbeddem tudrin u zedɣem daysent, ẓẓum iḥwicen u ad tawyem řiqqi i řɣiǧet nsen!”
29 Tuɣa iqqar ukehhan Ṣafanya tabrat-a deg imezzuɣen n unabi Irmiya.
30 Xenni yusa-dd wawař n SIDI ɣar Irmiya, inna:
31 “Sqad areqqas-a i marra ayt n lmenfa: ‘Ammu i iqqar SIDI x Cimɛiya zi Naḥlam: Minzi Camɛiya tuɣa ittnabb awem, waxxa Necc war t-i-dd ssekkeɣ, uca yarra kenniw ad tᵉttiqqem deg ixarriqen!’,
32 s uya, ammu i iqqar SIDI: ‘Xzar, Necc ad xeřfeɣ i Camɛiya zi Naḥlam u zi tarwa nnes. Uřa d ijjen zeg inni nnes war ittɣimi izdeɣ di řwesṭ n řgens-a u netta war iẓarr řxir i ɣa ggeɣ i řgens inu, ammu i iqqar SIDI, minzi s řhard nnes igga ad ḥeyyden x SIDI.’ ”