13
Abyas n řeqṭen
1 “Ammu i d ayi inna SIDI: ‘Uyur, seɣ i yixef nnec ijj n webyas n řeqṭen uca beys i-t x tejɛinnatin nnec, maca war t tejji ad yadef deg waman!’
2 Necc sɣiɣ ijj n webyas ɛlaḥsab awař n SIDI uca beyseɣ t x tejɛinnatin inu.
3 Xenni yusa-dd ɣari wawař n SIDI i twařa wiss tnayen, inna:
4 ‘Ksi abyas i tesɣid, nni tbeysed x tejɛinnatin nnec uca kkar, uyur ɣar yeɣẓar n Lfuraṭ uca ffar i-t dinni di tazzect n jjarf.’
5 Necc uyureɣ uca ffareɣ t ɣar Lfuraṭ, am mammec tuɣa d ayi yumur SIDI.”
6 “Awarni i waṭṭas n wussan inna ayi SIDI: ‘Kkar, uyur ɣar Lfuraṭ uca ksi ssenni abyas nni d ac umureɣ maḥend ad t teffared dinni.’
7 Xenni uyureɣ ɣar Lfuraṭ uca ɣziɣ u kkseɣ-dd abyas zeg wemcan mani t tuɣa ffareɣ. Xzar, abyas iḍeyyeɛ, war iǧi min umi ɣa infiɛ ɛad.
8 Xenni yusa-dd ɣari wawař n SIDI, inna:
9 ‘Ammu i iqqar SIDI: ‘Ammu i ɣa ssḍeyyɛeɣ nnfaxet n Yahuda uřa d nnfaxet tameqqrant n Urcalim.
10 Řgens-a aɛeffan nni yugin ad iseř ɣar wawařen inu, nni iḍeffaren řeqsaḥet n wuř nnes uca yareddef irebbiten nneɣni maḥend ad ten iɛbed u ad asen ibendeq, řgens-a ad idweř am webyas-a i war ineffɛen i walu ɛad.
11 Maɣar mammec iqqen webyas i tejɛinnatin n weryaz, ammu i arriɣ marra taddart n Israil d marra taddart n Yahuda ad ɣari qqnent, ammu i iqqar SIDI, maḥend ad iřint d řgens inu d Yisem inu d ccan inu d uɛuǧi inu, maca nitni war sřin ca.’ ”
Iqedduḥen iccuren s binu
12 “Cek ad asen tinid awař-a: ‘Ammu i iqqar SIDI, AREBBI n Israil: Qaɛ aɣarraf ad ittwaccur s binu.’ Xenni ad ac inin nitni: ‘Ma zeɛma neccin war nessin simant nneɣ nican, aqa qaɛ aɣarraf ad ittwaccur s binu?’
13 Xenni ad d asen tinid: ‘Ammu i iqqar SIDI: Xzar, Necc ad arreɣ ad scaren marra imezdaɣ n temmurt-a, ijeǧiden nni iqqimen x řɛarc n Dawud, ikehhanen, inabiyyen d marra imezdaɣ n Urcalim.
14 Necc ad ten wteɣ d iwetwiten, ijj ak-d wenneɣni, ibabaten munen ak-d iḥenjiren, ammu i iqqar SIDI. Necc war ttḥinniɣ, war ssɛizziɣ u war areḥḥmeɣ maḥend war ten ttḍeyyiɛeɣ.’ ”
SIDI issawař s imedya nneɣni
15 “Sřem u wcem amezzuɣ, war ttnefxem, maɣar SIDI issiweř.
16 Wcem ccan i SIDI, AREBBI nwem, qbeř i dd ɣa tas taǧest u qbeř i ɣa nqarḍen iḍaren nwem x idurar ibbubsen, am tᵉttrajam tafawt, maca Netta ad tt yarr d tiři n unuri uřa d aseynu ibbumbes.
17 Maca mařa kenniw war tᵉttexsem ad tesřem, xenni ad iru řeɛmar inu di tnuffra x nnfaxet nwem, ad iksi deg imeṭṭawen, uca ad dd-ssehwan imeṭṭawen zi tiṭṭawin inu, maɣar taḥimart n SIDI aqa tᵉttwandeh di tmeḥbast.”
18 “Ini i ujeǧid d yemmas n ujeǧid: ‘Swaḍɛem ixef nwem, qqimem deg wemcan ihwa, maɣar ttaj nwem icuwwaren tewḍa awem-dd x uzeǧif.’
19 Ttwabellɛent tneddam n Temmurt n Ljanub, uca uřa d ijj war tent yarezzem. Aqa ittwandeh marra řgens n Yahuda ittwandeh imun.
20 Sgeɛɛdem tiṭṭawin nwem, u xzarem, man wen i dd-yusin zi ccamal! Mani teǧa tḥimart i d am immewcen, uǧi nnem icewwaren?
21 Min ɣa tinid mařa Netta igga d azeǧif xam inni i tessřemded maḥend ad iřin d imeddukkař nnem iɛizzen? Ma war cem dd-mennɛen řewjeɛ am yict n temɣart ittarwen?”
22 “Xmi ɣa tinid deg wuř nnem: ‘Mayemmi d ayi iřqef marra aya?’, ssen aqa: ‘X ubarru n řmuɛṣiyyet nnem ttwassgeɛɛdent xam timmawin n warruḍ, ttwadeǧen inirzen nnem’.
23 Ma izemmar ijj n weryaz zi temmurt n Kuc ad ibeddeř smex n teřmect nnes? Niɣ aɣiřas areqqiɛen nnes? Ma tzemmarem uřa d kenniw xenni ad tɛedřem, kenniw inni innumen tuɛeffna.
24 S uyenni Necc ad ten zuzzareɣ am uřum nni iṭṭawen s usuḍi n usemmiḍ n řexřa.
25 Wa ad yiři d zzhar nnem i d am dd-ikkaren zzayi, ammu i iqqar SIDI, minzi cem tᵉttud ayi u tᵉttecřed x ixarriqen.
26 Xenni uřa d Necc ad ssgeɛɛdeɣ ibeḥruren n warruḍ nnem ař tiwa aɣembub nnem uca ad ẓaren řefḍiḥet nnem:
27 zzina nnem d usneḥneḥ inezren nnem, farq-ccɣeř nnem infeḍḥen. X tewririn u deg iyyar ẓriɣ nnɛawat nnem n l’aṣnam. Uct xam, a Urcalim, ař meřmi war tᵉttwassizdiged ca ɛad zzaysent?”