11
Řgens yarẓa Řɛahd ak-d SIDI
1 Awař nni dd-iffɣen zi SIDI ɣar Irmiya, inna:
2 “Sřem i wawařen n Řɛahd-a uca siweř ak-d yeryazen n Yahuda u ak-d imezdaɣ n Urcalim,
3 ini asen: ‘Ammu i iqqar SIDI, AREBBI n Israil: Ittwanɛeř weryaz nni war isřin i wawařen n Řɛahd-a,
4 wenni weṣṣiɣ i řejdud nwem deg wass umi ten ssuffɣeɣ zi temmurt n Miṣra, zeg ufarran n wuzzař, řami nniɣ: Sřem i tmijja inu uca ggem am mammec i kenniw weṣṣiɣ marra, xenni ad ayi tiřim d řgens inu uca Necc ad awem iřiɣ d AREBBI nwem,
5 ḥima ad menɛeɣ di tjaǧit nni jjuǧeɣ di ṭṭweɛ n řejdud nwem, maḥend ad asen wceɣ ict n temmurt ifeyyḍen s uɣi d tamment, am teǧa ass-a.’ ” Xenni necc arriɣ-dd, nniɣ: “Amin, SIDI!”
6 Inna ayi SIDI: “Barreḥ s marra awařen-a di tneddam n Yahuda u di dcurat n Urcalim, ini: ‘Sřem i wawařen n Řɛahd-a, ggem zzaysen,
7 maɣar Necc ɛeřmeɣ s jjehd i řejdud nwem deg wass umi ten ssuffɣeɣ zi temmurt n Miṣra, zeg umezwaru ař ass-a, wah, cehdeɣ nniɣ: Sřem ɣar tmijja inu’
8 Maca nitni war sřin u war d ayi wcin amezzuɣ nsen, maca nitni ḍfaren marra idsen řeqsaḥet n wuř nsen aɛeffan. S uyenni ssiwḍeɣ xasen marra awařen n Řɛahd-a, inni x ten weṣṣiɣ maḥend ad zzaysen ggen, maca war zzaysen ggin.’ ”
9 Inna ayi SIDI: “Aqa tᵉttwaɛarra ict n tmeɛmuč jar iryazen n Yahuda u jar imezdaɣ n Urcalim.
10 Nitni dewřen-dd ɣar řmuɛṣiyyet n řejdud nsen nni yugin ad sřen ɣar wawařen inu. Nitni ruḥen ḍeffaran irebbiten nneɣni maḥend ad asen sexxaren. Taddart n Israil d taddart n Yahuda arẓin Řɛahd inu nni ggiɣ ak-d řejdud nsen.”
11 “S uya, ammu i iqqar SIDI: ‘Xzar, Necc ad xasen nḍareɣ ijj n řɣar i zi war zemmaren ad nejmen. Mařa řaɣan ayi-dd xenni, Necc war dd ɣarsen ttesřiɣ ca.
12 Xenni ad ffɣen tineddam n Yahuda d imezdaɣ n Urcalim, ad řaɣan ɣar irebbiten i yinni umi qeddmen tiwhibin n řebxur, maca yina war zemmaren ad asen wcen afus di řweqt umi ten iřqef řɣar.
13 Maɣar irebbiten nnec deg waṭṭas anect n tneddam nnec, a Yahuda, u iɛaltaren i tessbeddem i nnɛi n ṣṣanam nni deg waṭṭas anect n ibriden n Urcalim, iɛalṭaren maḥend ad xasen wehhben tiwhibin n řebxur i Baɛl.’ ”
14 “Cek xenni war tᵉttar i řgens-a, war ttekkared ad asen trud niɣ ad asen tedɛid, maɣar Necc war ttesřiɣ di řweqt nni xafi dd ɣa řaɣan zi ssibbet n řɣar i ten iřeqfen.”
15 “Min i teggid, a tamɛizt inu, di Taddart inu, umi teǧa řefḍiḥet nnes d ta: aqa aṭṭas ttaggʷejen xam ak-d weysum iqeddsen. Maɣar s tuɛeffna i teggid, ma tzemmared ad tnegzed s řefraḥet?
16 ‘Tazitunt tazeyzawt, a cem, řemřaḥet, s řɣiǧet icnan di řewṣifet!’, ammu i tuɣa igga SIDI isem nnem, maca řexxu iqqed as timessi am ittwaseř řḥess n ijj n zzhir d ameqqran uca ttwarẓen řefruɛ nnes.
17 SIDI n řɛeskarat, d wenni cem iẓẓun, igga xam ijj n řɣar zi ssibbet n řɣar i tegga taddart n Israil d taddart n Yahuda, řɣar i ggint i yixef nsent umi d ayi sɛarent s tewhibin n řebxur i Baɛl.”
Tudart n unabi Irmiya di lxaṭař
18 “SIDI isscen t ayi uca řexxu ssneɣ, řami tessecned ayi timegga nsen.
19 Necc simant inu tuɣa ayi am yijj n yezmar aynaw n taddart, neddhen t i tɣarṣt, maɣar tuɣa war ssineɣ aqa nitni ggin ayi ijj n řfex umi qqaren: ‘Ejj aneɣ ad nḍeyyeɛ tacejjart ak-d řɣiǧet nnes u ad tt nteḥḥa zi temmurt n yinni iddaren maḥend isem nnes war t ttidaren ɛad.’ ”
20 “SIDI n řɛeskarat, a Cek Řqaḍi iseggden nni ittjarraben tiẓẓař d wuř, scen ayi nneqmet nnec, maɣar necc sellmeɣ ddeɛwet inu deg ifassen nnec.”
21 “S uya, ammu i iqqar SIDI x yeryazen n Ɛanatut, inni yarezzun řeɛmar nnec, qqaren: ‘War ttnab s Yisem n SIDI ařami war tmettid s ufus nneɣ.’
22 S uya, ammu i iqqar SIDI n řɛeskarat: ‘Xzar, Necc ad ten xeǧṣeɣ: iḥudriyyen ad mmten s ssif, iḥenjiren d yessitsen ad mmten s řaẓ.
23 War ittɣimi min iqqimen zzaysen, maɣar Necc ad xasen dd-ssiwḍeɣ ijj n řɣar d aɛeffan x yeryazen n Ɛanatut deg useggʷas nni di ten i ɣa xeǧṣeɣ.’ ”