21
Aḍhar n Yasuɛ ɣar řebḥar n Tibiriyas
1 Awarni uya tuɣa Yasuɛ immeř ixef nnes ɛawed i imeḥḍaren nnes ɣar řebḥar n Tibiriyas, iḍhar-dd ammu.
2 Tuɣa din jmiɛ Cimɛun Buṭrus d Tuma, wenni umi qqaren ‘Acniw’, d Natanayil, wenni tuɣa zi Qana di temmurt n Ljalil, d tarwa n Zabdi uřa d tnayen nneɣni zeg imeḥḍaren nnes.
3 Inna asen Cimɛun Buṭrus: “Necc ad raḥeɣ ad gmareɣ iseřman.” Nnan as: “Ad kik nraḥ uřa d neccin.” Ffɣen-dd uca nyin deɣya di tɣarrabut. Di ǧiřet nni war ṭṭifen walu.
4 Ɣar tuffut, ibedd-dd Yasuɛ x tma n řebḥar, maca imeḥḍaren war ssinen ca aqa d Yasuɛ.
5 Inna asen Yasuɛ: “A iḥenjiren, ma ad taɣ ɣarwem ca n macca?” Arrin-dd xas “Lla!”
6 Inna asen: “Nḍarem tracca nwem ak-d uɣezdis afusi n tɣarrabut, ad tafem.” Xenni nḍaren tracca uca war zemmaren ad tt-i-dd-jebden zi ssibbet n ubarru n iseřman i dayes ittwaṭṭfen.
7 Inna umeḥḍar wenni tuɣa ittexs Yasuɛ i Buṭrus: “Aqa Netta d Siditneɣ.” Řami isřa Cimɛun aqa Netta d Sidi, iṭṭef tcamir nnes minzi tuɣa d aɛaryan, inḍar ixef nnes di řebḥar ařami ɣa dd-iqarreb ɣar Yasuɛ.
8 Maca imeḥḍaren inneɣni usin-dd s tɣarrabut minzi war iggʷijen ca x řbarr mɣir mitayen n iɣaǧen, uca jebden-dd tracca ak-d iseřman.
9 Řami dd-ffɣen ɣar řbarr, ẓrin diha aqa ittwassewjed ijj n ufennic n řefḥem mixef mmarsen iseřman d weɣrum.
10 Inna asen Yasuɛ: “Awyem-dd zeg iseřman i tegmarem řexxu.”
11 Cimɛun Buṭrus yuyur, ijbed tracca teccur s iseřman imeqqranen ɣar řbarr, aqa-tt dayes mya u-třata u-xemsin. Waxxa dayes s wanect uya aṭṭas, war tcarreg ca tracca.
12 Inna asen Yasuɛ: “Araḥem-dd da, ad tariyyqem!” Uřa d ijj zeg imeḥḍaren war izɛim ad t isseqsa ‘Min teɛnid Cek?’, minzi ssnen aqa-t d Siditneɣ.
13 Řexdenni yusa-dd Yasuɛ, iksi aɣrum d iseřman, iwca asen.
14 Wanita d twařa wiss třata i dd-iḍhar Yasuɛ i imeḥḍaren nnes awarni řami dd-ittwassnekkar zi taddart n imettinen.
Aseqsi n Yasuɛ i Buṭrus
15 Awarni řami ariyyqen, inna Yasuɛ i Cimɛun Buṭrus: “A Cimɛun, mmis n Yuna, ma tᵉttexsed ayi ktar zeg yina?” Inna as: “Wah, a Sidi, Cek tessned aqa necc ttexseɣ Cek.” Inna as: “Arwes izmaren inu!”
16 Inna as ɛawed i twařa wiss tnayen: “A Cimɛun, mmis n Yuna, ma tᵉttexsed ayi?” Inna as: “Wah a Sidi, Cek tessned aqa necc ttexseɣ Cek.” Inna as: “Arwes icarriyyen inu!”
17 Inna as i twařa wiss třata: “A Cimɛun, mmis n Yuna, ma tᵉttexsed ayi?” Icḍen Buṭrus minzi inna as t twařa wiss třata: ‘Ma tᵉttexsed ayi?’, uca inna as: “A Sidi, Cek tessned kuřci, tessned aqa necc ttexseɣ Cek.” Inna as Yasuɛ: “Arwes tixsiwin inu!
18 S tidett, s tidett, Necc ad ac iniɣ: Řami cek tuɣa d ameẓyan, tbeysed i yixef nnec, truḥed mani texsed, maca x minni i ɣa tewsared, ad tesswiẓẓḍed ifassen nnec uca wenneɣni ad cek ibyes uca ad cek yawi ɣar mani war tᵉttexsed.”
19 Inna ammu ḥima ad isscen i man řmewt i zi ɣa issɛuǧ AREBBI. Awarni řami d as inna ammu, inna as: “Ḍfar ayi-dd!”
20 Inneqřeb Cimɛun Buṭrus, iẓra ameḥḍar nni tuɣa ittexs Yasuɛ, iḍfar i-t, netta d wenni tuɣa yarra ixef nnes ad imeyyeř ɣar idmaren n Yasuɛ ɣar umensi i innan: “A Sidi inu, wi Cek i ɣa iɣdaren?”
21 Řami iẓra Buṭrus wa, inna i Yasuɛ: “A Sidi, i wa, min d as ɣa imsaren?”
22 Inna as Yasuɛ: “Mařa xseɣ ad iqqim ař dd ɣa ɛeqbeɣ, min d ac iruḥen? Cek ḍfar ayi-dd!”
23 Uca iffeɣ-dd wawař-a jar wawmaten belli ameḥḍar nni war ittmetti ca, maca Yasuɛ war d as inni ca belli netta war ittmetti ca, maca: “Mařa xseɣ ad iqqim ař dd ɣa ɛeqbeɣ, min d ac iruḥen?”
Taneggarut
24 D wa d ameḥḍar i icehhden s man aya uca netta yura man aya, u neccin nessen aqa cchadet nnes d tidett.
25 Aqa din ɛad aṭṭas n tmesřayin nneɣni i igga Yasuɛ. Mařa ttwarint ict awarni tenneɣnit, ittɣiř ayi, ad tiři ddunect simant nnes war dayes ca ttasiɛ ḥima ad teksi idlisen i ɣa ittwarin. Amin!
Aneggar n L’Injil Iqeddsen am mammec t ibarreḥ Yuḥanna.
Aneggar n tira n idlisen n arebɛa n idlisen n L’Injil.
Aɛuǧi i Babas, i Mmis u i Arruḥ Iqeddsen, řexxu, řebda u i řebda n řebdat.