17
Taẓaǧit n Yasuɛ am Ukehhan Ameqqran
1 Tuɣa Yasuɛ issawař s man aya uca issgeɛɛed tiṭṭawin nnes ɣar ujenna, inna: “A Baba, aqa tasaɛɛet tiweḍ-dd. Suɛřa Mmic, ḥima uřa d Mmic ad Cek issuɛřa,
2 ařami d as tewcid ṣṣulṭa x marra ddat, ḥima xenni Netta ad iwc Tudart ittduman i kuř ijjen i d as tewcid.
3 D tanita d Tudart ittduman, aqa nitni ad Cek ssnen, maɣar Cek weḥḥdek d AREBBI d tidett, d Yasuɛ Lmasiḥ wenni dd-tessekked.
4 Necc ssuɛřiɣ Cek x temmurt. Necc kemmřeɣ řxedmet i d ayi tewcid ḥima ad tt ggeɣ.
5 Řexxu, sɛuǧi ayi, a Baba, ɣar Ixef nnec s uɛuǧi i tuɣa ɣari qbeř ma ad tiři ddunect.
6 Secneɣ Isem nnec i iwdan inni d ayi tewcid zi ddunect. Nitni tuɣa aten nnec, tewcid ten i Necc, aqa ṭṭfen deg Wawař nnec.
7 Řexxu ssneɣ belli marra min d ayi tewcid, aqa-t zzayek dd-yusa.
8 Minzi Necc wciɣ asen awařen i d ayi tewcid uca nitni qebřen zzaysen, ssnen s tidett belli Necc ffɣeɣ-dd zzayek, umnen aqa Cek tessekked ayi-dd.
9 Necc ttareɣ di ṭṭweɛ nsen, war ttᵉttareɣ di ṭṭweɛ n ddunect, maca di ṭṭweɛ n yinni d ayi tewcid, minzi aqa aten nnec.
10 Marra min iǧan inu aqa-t nnec u min iǧan nnec aqa-t inu, u Necc ttwassɛuǧeɣ daysen.
11 Zi řexxu Necc war ǧiɣ ɛad di ddunect, maca nitni aqa aten di ddunect, uca Necc ad ɣarek dd-aseɣ. A Baba iqeddsen, ḥḍa ten deg Yisem nnec, Isem nni d ayi tewcid, ḥima nitni ad iřin d ijjen am Neccin.
12 Řami d ayi tuɣa akidsen, ḥḍiɣ ten deg Yisem nnec. Necc ɛesseɣ x yinni d ayi tewcid. Uřa d ijj zzaysen war ittwahellek, mɣir mmis n tehliket, ḥima ad ittwakemmeř min yuran di Tira Iqeddsen.
13 Maca řexxu ad ɣarek dd-aseɣ u ssawařeɣ x man aya di ddunect, ḥima ad tiři řefraḥet inu tekmeř daysen.
14 Wciɣ asen awař nnec uca ddunect tuɣa tcarreh i-ten, minzi war ǧin ca zi ddunect, am Necc war ǧiɣ ca zi ddunect.
15 Necc war ttareɣ ḥima ad ten teksid zi ddunect, maca ḥima ad ten teḥḍid zeg umɛeffan.
16 Nitni war ǧin ca zi ddunect am Necc war ǧiɣ ca zi ddunect.
17 A Baba, sqeddes i-ten di tidett, awař nnec d tidett.
18 Am mammec i d ayi dd-tessekked ɣar ddunect, ammu i ten ssekkeɣ ɛawed ɣar ddunect.
19 Ssqeddaseɣ Ixef inu di ṭṭweɛ nsen, ḥima ad ttwaqeddsen uřa d nitni di tidett.
20 War ttareɣ di ṭṭweɛ n yina waha, maca ɛawed di ṭṭweɛ n yinni dayi yumnen s wawař nsen.
21 ḥima ad iřin marra d ijjen, a Baba, am Cek dayi u Necc dayek, ḥima uřa d nitni ad iřin d ijjen dayneɣ, ḥima ad tamen ddunect belli aqa d Cek i d ayi dd-issekken.
22 Necc wciɣ asen aɛuǧi i d ayi tewcid, ḥima ad iřin d ijjen am mammec Neccin neǧa d Ijjen.
23 Necc daysen, Cek dayi, ḥima ad iřin ttwakemmřen ɣar ijjen, ḥima ad tessen ddunect aqa Cek tessekked ayi-dd u texsed ten am mammec i d ayi texsed.
24 A Baba, xseɣ i yinni d ayi tewcid ad iřin akidi mani ma ǧiɣ Necc, uca ad ẓaren aɛuǧi inu i d ayi tewcid, minzi Cek texsed ayi qbeř ma ad tᵉttwagg ddunect.
25 A Baba inu iseggden, aqa ddunect war Cek tessin, maca Necc aqa ssneɣ Cek u ina ssnen aqa Cek tessekked ayi-dd.
26 Necc ssecneɣ asen Isem nnec u ad t ssecneɣ, ḥima tayri i zi tuɣa d ayi tᵉttexsed ad tiři daysen u Necc daysen.”