15
Tazayart d tiṣedwin nnes
1 “NECC d Tazayart n tidett, Baba d bab n weḥwic n tzayart.
2 Kuř taseṭṭa dayi i war itticen řɣiǧet, ad tt ikkes, uca kuř taseṭṭa i dd-ittawyen řɣiǧet, ad tt issizdeg, ḥima ad tarni di řɣiǧet.
3 Kenniw aqa tᵉttwassizedgem zi ssibbet n wawař i d awem nniɣ.
4 Qqimem dayi, am mammec Necc aqa ayi daywem. Am tseṭṭa i war izemmaren ad dd-tawyi řɣiǧet zeg ixef nnes mařa war teqqim di tzayart, amya uřa d kenniw, mɣir mařa teqqimem dayi.
5 NECC d Tazayart, kenniw d tiseḍwin. Wenni dayi i ɣa iqqimen u Necc dayes, netta ad dd-yawi řɣiǧet aṭṭas, minzi břa zzayi war tzemmarem ad teggem walu.
6 Mařa ca n yijjen war dayi iqqim, ad immenḍar ɣar barra am tseṭṭa tuẓeɣ, xenni ad tt yarwen, ad tt nḍaren di tmessi, ad yareɣ.
7 Maca mařa teqqimem dayi uca awařen inu ad daywem qqimen, ttarem min texsem uca ad ɣarwem yiři.
8 Zi man aya ad ittwassɛuǧ Baba, xmi i dd ɣa tawyem aṭṭas n řɣiǧet uca ad tiřim d imeḥḍaren inu.
9 Am mammec Baba tuɣa ittexs ayi, ammu uřa d Necc tuɣa ttexseɣ kenniw. Qqimem di tayri inu.
10 Mařa tᵉṭṭfem di tweṣṣa inu, ad teqqimem di tayri inu, am mammec Necc tuɣa ttᵉṭṭfeɣ di tweṣṣa n Baba uca ttɣimeɣ di tayri nnes.
11 Nniɣ awem man aya, ḥima ad daywem tiři řefraḥet inu uca ḥima ad tᵉttwakemmeř řefraḥet nwem.
12 Tawṣeyyet inu d tanita: aqa ad texsem ijjen wenneɣni am mammec Necc tuɣa xseɣ kenniw.
13 Uřa d ijj war ɣares bu tayri tameqqrant x tanita: belli ca n yijjen ad iwc tudart nnes i imeddukkař nnes.
14 Kenniw d imeddukkař inu, mařa teggim marra min kenniw weṣṣiɣ.
15 War ttɛiwideɣ ad awem semmiɣ ‘imsexxaren’, minzi amsexxar war issin min ittegg sidis. Maca Necc tuɣa ttřaɣiɣ awem d ‘imeddukkař inu!’, minzi Necc ssecneɣ kenniw marra min sřiɣ zi Baba.
16 War iǧi d kenniw i d ayi ixḍaren, maca d Necc i kenniw ixḍaren uca Necc ggiɣ kenniw ḥima ad traḥem, ad dd-tawyem řɣiǧet u ḥima ad teqqim řɣiǧet nwem, ḥima marra min ɣa tᵉttarem zi Baba s Yisem inu, ad awem t iwc Netta.
17 D man aya i zi kenniw umureɣ, ḥima ad texsem ijjen wenneɣni.”
Ddunect tcarreh Yasuɛ
18 “Mařa ddunect ad kenniw tcarh, snem aqa tcarh ayi qbeř kenniw.
19 Mařa aqa kenniw zi ddunect, iři aqa ddunect tuɣa tᵉttexs inni zzayes. Maca minzi kenniw war teǧim ca zi ddunect, maca Necc ixḍareɣ kenniw zi ddunect, s uyenni tcarreh ddunect kenniw.
20 Ɛeqřem awař i d awem nniɣ: ‘Amsexxar war yuɛři x sidis!’ Mařa darracen ayi, ad kenniw darrcen ɛawed. Mařa ṭṭfen deg wawař inu, ad ṭṭfen ɛawed deg wawař nwem.
21 Maca ad zzaywem ggen man aya marra di ssibbet n Yisem inu, minzi nitni war ssinen ca Wenni d ayi dd-issekken.
22 Mařa war dd-usiɣ u war kisen ssiwřeɣ, ad yiři war ɣarsen bu ddnub. Maca řexxu war ɣarsen bu smaḥet x ddnub nsen.
23 Wenni d ayi icarrhen, ad icarh uřa d Baba.
24 Mařa war ggiɣ zzat i tiṭṭawin nsen řexdayem i war tent yeggi uřa d ijj bnadem nneɣni, ad yiři war ɣarsen bu ddnub. Maca řexxu ẓrin tent, carhen ayi Necc uřa d Baba.
25 S uya ad ittwakemmeř wawař i yuran di Ccariɛa nsen: ‘Carhen ayi x walu’.
26 Xmi dd ɣa yas Umseṣřaḥ, wenni ɣarwem dd ɣa ssekkeɣ zi Baba, Arruḥ n tidett i dd-yusin zi ɣar Baba, xenni wanita ad ayi iched.
27 Uca ad tcehdem uřa d kenniw, minzi tuɣa kenniw akidi zeg umezwaru.”