11
Asnekkar n Aliɛazar zi řmewt
1 Tuɣa din ijj n bnadem ihřec, qqaren as Aliɛazar, zi dcar n Bayt-Ɛanya. Netta tuɣa d umas n Maryam d Marta.
2 Maryam tanita nettat d tenni i tuɣa idehnen Yasuɛ s řefwaḥet n mirru u temseḥ iḍaren nnes s ucuwwaf nnes, u umas Aliɛazar tuɣa ihřec.
3 Ssekkent-i-dd tnayen n suyᵉtmas ijjen ɣar Yasuɛ, nnant: “A Siditneɣ, xzar, wenni texsed, aqa ihřec.”
4 Maca Yasuɛ inna: “Řehřac-a war iǧi ca i řmewt, maca i uɛuǧi n AREBBI, ḥima ad zzayes ittwassɛuǧ Mmis n AREBBI.”
5 Tuɣa Yasuɛ ittexs Marta d Maryam d Aliɛazar.
6 Ařami isřa aqa Aliɛazar ihřec, řexdenni iqqim ɛad tnayen n wussan deg wemcan mani t tuɣa.
7 Awarni man aya inna i imeḥḍaren nnes: “Ejj aneɣ ad nraḥ ɛawed ɣar temmurt n Yahudiyya!”
8 Imeḥḍaren nnan as: “A Amseřmad nneɣ, drus zeg wami tuɣa Udayen arezzun ad Cek arejmen, mammec Cek ad traḥed dinni ɛawed?”
9 Yarra-dd Yasuɛ: “Ma war din tenɛac n tsaɛɛetin deg uziř? Mařa ca n yijjen yuyur s uziř, war ittneqriḍ ca, minzi ittwařa tafawt n ddunect-a.
10 Maca mařa ca n yijjen ad yuyur s ǧiřet, ad inqareḍ, minzi war dayes bu tfawt.”
11 Awarni řami inna man aya, inna asen: “Aliɛazar, ameddukkeř nneɣ aqa iṭṭeṣ, maca ad raḥeɣ ḥima ad t-i-dd-ssnekkareɣ.”
12 Nnan as imeḥḍaren: “A Siditneɣ, mařa netta iṭṭeṣ, xenni ad iggenfa!”
13 Maca Yasuɛ uɣa issawař x řmewt nnes, maca ittɣiř asen belli Netta issawař x arraḥet n yiḍeṣ.
14 Xenni inna asen Yasuɛ s bṭayṭay: “Aqa Aliɛazar immut.
15 U Necc farḥeɣ awem umi Necc war din ǧiɣ, ḥima ad tamnem. Maca ittxeṣṣa kenniw ad traḥem dinni.”
16 Inna Tuma, wenni umi qqaren ‘Acniw’, i imeḥḍaren imɛacaren nnes: “Ejj aneɣ ad nraḥ uřa d neccin, ḥima ad nemmet akides.”
17 Řami dd-yiweḍ Yasuɛ ɣar Bayt-Ɛanya, yufa aqa ɛdun arebɛa n wussan zeg wami tuɣa-t deg wenḍeř.
18 Bayt-Ɛanya tuɣa tudes Urcalim, ɛřaḥař xemmesṭac ‘istadiyyen’, ɛřaḥař třata kilumitr.
19 Aṭṭas n Wudayen usin-dd ɣar Marta d Maryam ḥima ad tent ɛezzan x umatsent.
20 Řami tesřa Marta, aqa Yasuɛ yiweḍ-dd, teffeɣ ḥima ad t teřqa, maca Maryam teqqim di taddart.
21 Tenna Marta i Yasuɛ: “A Sidi, meɛlik Cek tuɣa da, iři war ittmetti ca uma.
22 Maca řexxu ɛad ssneɣ ɛawed belli marra min ɣa tᵉttared zi AREBBI, Netta ad ac t iwc.”
23 Yasuɛ inna as: “Ad dd-ikkar umam.”
24 Tenna as Marta: “Ssneɣ belli ad dd-ikkar di tnukra deg wass aneggaru.”
25 Yasuɛ inna as: “NECC d Tanukra d Tudart. Wenni zzayi i ɣa yamnen, ad iddar, waxxa immut.
26 Marra wenni iddaren uca yumen zzayi, war ittmetti i řebda. Ma tumned di man aya?”
27 Tenna as: “Wah, a Sidi inu, umneɣ aqa Cek d Lmasiḥ, Mmis n AREBBI wenni tuɣa i d ttasen ɣar ddunect.”
28 Awarni řami tenna aya, truḥ třaɣa i učmas Maryam s řḥess, tenna as: “Amseřmad nneɣ yusa-dd, ittřaɣa-dd xam.”
29 Řami tesřa Maryam aya, tekkar s tazřa, truḥ ɣares.
30 Tuɣa Yasuɛ war dd-yusi ca ɛad ɣar dcar, maca tuɣa-t ɛad deg wemcan mani t teřqa Marta.
31 Uřa d Udayen, inni iǧan akides di taddart, tuɣa ttɛezzan tt, ḍeffaren tt řami ẓrin aqa Maryam tekkar s tazřa, teffeɣ, minzi ittɣiř asen aqa truḥ ɣar wenḍeř ḥima ad tru dinni.
32 Řami dd-tusa Maryam ɣar mani tuɣa Yasuɛ, uca teẓra i-t, tewḍa ɣar iḍaren nnes, tenna as: “A Sidi, meɛlik tuɣa Cek danita, iři uma war ittmetti ca!”
33 Řami tt iẓra Yasuɛ tᵉttru, uřa d Wudayen inni dd-yusin akides ttrun, innehweř Arruḥ nnes, inhezz di řeɛmar nnes.
34 Inna: “Mani t tessarsem?” Nnan as: “Araḥ-dd, a Siditneɣ, ad texzared!”
35 Xenni ffɣent as-dd i Yasuɛ imeṭṭawen.
36 Udayen nnan: “Xzarem, mecḥař t ittexs.”
37 Maca ca zzaysen nnan: “Ma war izemmar Wa, wenni yarezmen tiṭṭawin i udarɣař, ad igg ca maḥend uřa d wanita war ittmetti ca?”
38 Umi dd-yusa ɣar waxxam n wenḍeř, innehweř Yasuɛ aṭṭas deg Ixef nnes. Axxam n wenḍeř aqa-t d ijj n ifri uca ict n teṣḍart tuɣa temmars x wadaf nnes.
39 Yasuɛ inna: “Ksim taṣḍart-a.” Tenna as Marta, učmas n wenni immuten: “A Sidi, aqa yarṣuḍ, minzi teɛdu xas arebɛa n wussan.”
40 Inna as Yasuɛ: “Ma war d am nniɣ, mařa tumned, ad tẓared aɛuǧi n AREBBI?”
41 Kksin taṣḍart. Xenni issgeɛɛed Yasuɛ tiṭṭawin nnes ɣar sennej, inna: “A Baba, ɛafak řami d ayi tesřid.
42 Necc ssneɣ aqa řebda tᵉttesřid ɣari, maca di ṭṭweɛ n řɣaci i d ayi dd-innḍen, nniɣ t, ḥima ad amnen belli Cek tessekked ayi-dd.”
43 Řami inna aya, iřaɣa s jjehd: “Aliɛazar, ffeɣ-dd!”
44 Řexdenni iffeɣ-dd umettin, tuɣa ifassen d iḍaren nnes carfen s řecfen n řeqṭen u tuɣa ijj umendiř n řeqṭen ittwacarf x uɣembub nnes. Inna asen Yasuɛ: “Fesyem as-dd. Jjem t ad iraḥ.”
Imɣaren n Wudayen arezzun ad nɣen Yasuɛ
45 Aṭṭas n Wudayen inni dd-yusin ɣar Maryam, uca ẓrin min igga Yasuɛ, umnen zzayes.
46 Maca ca zzaysen ruḥen ɣar Ifarisiyyen, nnan asen min igga Yasuɛ.
47 Uca ggin imeqqranen n ikehhanen d Ifarisiyyen ijj n umuni, nnan: “Min ɣa negg, minzi Aryaz-a ittegg aṭṭas n řeɛřamat.
48 Mařa nejja i-t amya, marra ad zzayes amnen. Xenni ad dd-asen Irumaniyyen, ad zzayneɣ kksen amcan nneɣ iqeddsen uřa d iwdan n řgens nneɣ.”
49 Inna asen ijjen zzaysen, aqa-t d Qayafa, netta d arrays n ikehhanen deg useggʷas nni: “Kenniw war tessinem walu,
50 uca war tefhimem ca belli ineffeɛ i neccin x minni i ɣa immet ijj n bnadem di ṭṭweɛ n řgens, uca war ittmetti ca řgens nneɣ marra.”
51 War ini ca man aya zeg ixef nnes, maca, umi tuɣa d arrays n ikehhanen deg useggʷas nni, tuɣa ittnebba belli Yasuɛ ad immet di ṭṭweɛ n řgens.
52 War iǧi ḥaca di ṭṭweɛ n řgens, maca uřa ḥima ad issmun iḥenjiren ittwazuzzaren n AREBBI ɣar ijjen.
53 Zeg wass nni nwan ad t nɣen.
54 Maca Yasuɛ war iqqim iggur jar Wudayen s bṭayṭay, maca iruḥ ssenni ɣar ict n temmurt tudes řexřa, ɣar ict n tendint qqaren as Ifrayim, uca iqqim dinni ak-d imeḥḍaren nnes.
55 Tuɣa Řɛid n Tɣarṣt n Useɛdu n Wudayen ɛřayen yiweḍ-dd. Aṭṭas zi dcurat usin-dd ɣar Urcalim ḥima ad ṭehharen ixef nsen qbeř Řɛid.
56 Nitni tuɣa arezzun x Yasuɛ, nnan jar asen umi nitni bedden di Zzawect Tameqqrant: “Min tᵉttwařam? Ma zeɛma war dd-ittis ɣar Řɛid?”
57 Maca imeqqranen n ikehhanen d Ifarisiyyen weṣṣan belli, mařa ca n yijjen issen mani iǧa, ad t ini, ḥima ad t ṭṭfen.