3
Iřes n bnadem
1 War ttejjim aṭṭas zzaywem ad dewřen d imesɣaren, a aytma, aqa kenniw tessnem belli ad neksi řḥukm ameqqran.
2 Minzi marra neccin nᵉnnedref deg waṭṭas. Mařa ca n yijjen war ittnedraf deg wawař, aqa netta d bnadem ikmeř, izemmar ad iqemmeɛ marra arrimet nnes.
3 Xzar, nᵉttegg sřimat deg iqemmumen n iysan ḥima ad aneɣ mmarsen, aqa nzemmar ad zzaysent nessuyur arrimet nsen tmun.
4 Uřa d iɣarruba imeqqranen inni ittwaɛarrnen zeg usemmiḍ ijehden, ttwaneddhen s yijj n řgidun ameẓyan, mani ma ixs řxaḍar n řqebṭan ad indeh.
5 Ammu uřa d iřes, aqa-t d ijj n ixef ameẓyan, waxxa amenni issgeɛɛed ixef nnes. Xzar, mammec timessi tameẓyant ad tessecmeḍ řɣabet tameqqrant.
6 Iřes d ict n tmessi u ddunect n ddenb am yict n wezɣar. Iřes-a jar iɣezdisen nneɣ am yict n řḥajjet tessexmej arrimet marra, issarɣ jjiřat i iḍeffaren ijj i wenneɣni, inni iqnunniyen am tjarrarin. Uca uřa d yiřes s yixef nnes aqa ittwassareɣ s tmessi.
7 Minzi marra ddarb n řmař, n ijḍaḍ u n imuddaren inni ittbuɛen di řebḥar u x temmurt, ttwamarsen i ṭṭbiɛet n bnadem.
8 Maca iřes war izemmar ad t issqemmeɛ uřa d ijj n bnadem. Aqa-t d ijj n řɣar i war ittwassqemmɛen, aqa iccur s ssem ineqqen.
9 Zzayes i nbarek SIDI d Babatneɣ uca zzayes nᵉneɛɛeř x iwdan inni ittwaggen di ṣṣifet n AREBBI.
10 Aqa zeg ijj n uqemmum tᵉtteffeɣ-dd lbaraka d nneɛřet. A aytma, man aya war iɛeddeř ad yiři ammu!
11 Ma izemmar ad dd-ffɣen zeg ijj n řɛunṣar waman imiẓiden d waman imerzagen?
12 A aytma, ma izemmar wartu ad iwc zzitun niɣ tzayart řbacur? Ammu uřa d aman imeǧaḥen war zemmaren ad ten arren d imiẓiden.
Tiɣit zi sennej d tiɣit zi temmurt
13 Wi zzaywem iǧan d amiɣis u s řeɛqeř? Ad isscen wanita řexdayem nnes zi ticři nnes iṣebḥen s tiɣit ak-d temhint.
14 Maca mařa din řeḥsed amerzag d umcubbec deg wuřawen nwem, war sgiɛɛid ixef nnec x tidett u war sxarriq ca!
15 Tanita war teǧi d tiɣit i dd-ihwan zi sennej, aqa-tt zi temmurt, zeg ixarriṣen n buḥbeř n bnadem u zi ccwaṭen.
16 Minzi mani iǧa řeḥsed d umcubbec, aqa din ixarwiḍen d ɛřam kuř tuɛeffna.
17 Maca tiɣit zi sennej tezdeg, xenni dayes řehna d řeḍrafet, tᵉttegg array, teccur s arreḥmet d řɣiǧet iṣebḥen, war ttegg ca s řeḥzab niɣ s wudmawen.
18 Maca řɣiǧet n tsegda tᵉttwazarreɛ di řhudnet zeg yinni itteggen řehna.