2
1 “Suḍem deg uyicc n icarri di Ṣihyun, ṣudem dayes s jjehd x wedrar inu iqeddsen, jjem marra imezdaɣ n temmurt ad arjijen, maɣar yudes wass n SIDI, wah, aqa-t yudes.
2 Ijj n wass n taǧest d tubbarcent, ijj n wass n iseynuten u n yijj n useynu ibbumbes. Am tuffut n řḥař igguren x idurar ad dd-yas ijj n řgens d ameqqran u ijhed! Am wanita ɛemmarṣ war iǧi zi mecḥař uya u awarni as war ittiři ɛawed, deg iseggʷusa awarni as zi jjiř ař jjiř nneɣni.
3 Zzat i wudem nnes tᵉttett tmessi u awarni as icemmeḍ uceɛɛař. Zzates tammurt tegga am weḥwic n Ɛadn, maca awarni as aqa din ict n temmurt ittwareddǧen. War izemmar ad zzayes injem.
4 Ccuf nsen am ccuf n yiysan u nitni ttazzřen am yiysan n tazřa.
5 Am uqarqeb n ikarruten n umenɣi x tqiccitin n idurar, ammu neggzen nitni, am řḥess n uceɛɛař n tmessi ittetten iɣeǧ, am yijj n řgens ijehden isedden i umenɣi.
6 Zzat i wudem nsen ttarjijen řegnus, marra iɣembab dewřen d icemřařen.”
7 “Nitni ttazzřen am ayt n bu-teɣruḍt, am yiɛeskariyyen ttgeɛɛaden nitni řḥiḍ, kuř ijj iggur abrid nnes u nitni war dd-tteffɣen ca zeg umesruq nsen.
8 Uřa d ijjen war iɛarren wenneɣni, kuř bu-ṭeɣřuḍt iggur deg webrid nnes, u waxxa nitni wḍan s lansa, war ttemsbeɛɛiden
9 Nitni weṭṭan x tendint, ttazzřen x řḥiḍ, ttgeɛɛaden ɣar tudrin, ttadfen zi řekwaza am uxewwan.
10 Tᵉttarjiji temmurt zzat i wudem nsen, ijenwan ttenhezzan, tafuct d tziri bbarcnent u itran arrin tafawt nsen.
11 SIDI yarra tmijja nnes ad teffeɣ zzat i řɛeskar nnes, maɣar řɛeskar nnes d ameqqran aṭṭas, maɣar s ṣṣulṭa ittkemmař Netta awař nnes, maɣar ass n SIDI d ameqqran, issaggʷad aṭṭas. Wi izemmaren ad t iksi?”
Ařaɣi i ttubet d uẓummi d wecḍan
12 “Uřa řexxu ɛad iqqar SIDI, ɛeqbem-dd ɣari s marra uř nwem, s uẓummi u s imeṭṭawen u s tɣuyyit n wecḍan.
13 Carrgem uř nwem, war iǧi arruḍ nwem, u dewřem-dd ɣar SIDI, AREBBI nwem, maɣar Netta d aḥnin d arḥim u ɣares ttasiɛ n řxaḍar d tmexsiwt tameqqrant icewwaren u Netta ineddem x řɣar.
14 Wi issnen aqa Netta ad dd-idweř ad indem u ad yejj ict n lbaraka. awarni as: ict n tewhibt n řɣiǧet u ict n tewbibt n useyyeb i SIDI, AREBBI nwem.”
15 “Suḍem deg uyicc n icarri di Ṣihyun, qeddsem ijj n uẓummi, barrḥem s yijj n umuni ifarz.
16 Smunem řgens, qeddsem agraw n řgens, jarwem imɣaren, smunem iḥenjiren imeẓyanen uřa d iseyman nni ɛad itteṭṭḍen. Ejj muřay ad iffeɣ zeg wexxam nnes n daxeř d tesřit zeg uqiḍun nnes.
17 Jjem ikehhanen, imsexxaren n SIDI, ad run jar wesqif d uɛalṭar u jjem i-ten ad inin: ‘Sɛizz x řgens nnec, a SIDI, u war ttejji tasɣart nnec ad zzayes stehezzan u ad tt ggen d ijj n řmatal jar asen, jar řegnus. Mayemmi ɣa qqaren jar řegnus: Mani iǧa AREBBI nsen?’ ”
Mammec i dd-yarra SIDI x wenni d as ittẓaǧan
18 Xenni yusem SIDI x temmurt nnes u iḥinn x řgens nnes.
19 SIDI yarra-dd, inna i řgens nnes: “Xzar, Necc ssekkeɣ awem-dd imendi d binu n jdid d zzect, ḥima kenniw ad zzaysen tejjawnem, u Necc war kenniw tticeɣ ɛad i useḥqar jar řegnus.
20 Wenni dd-yusin zi ccamal ad t ssiggʷejeɣ xawem u ad t ssuffɣeɣ ɣar ict n temmurt yuẓɣen tᵉttwakeḥḥeḍ. Aɣembub nnes ad t ssuffɣeɣ ɣar řebḥar n ccarq u ḍeffar nnes ɣar řebḥar di ccarq. Ad tgeɛɛed arriḥet nnes, wah, ad tgeɛɛed arriḥet n terṣuḍi nnes, waxxa netta aqa igga timesřayin timeqqranin.”
21 “War tteggʷed, a tammurt, sřiwřew d tfarḥed, maɣar SIDI igga timesřayin timeqqranin.
22 War tteggʷedem ca, a řmař n yiyyar, maɣar ddmani n řexřa ad zzeyzun, ticejjura ad wcent řɣiǧet nsent, tazayart d wartu n tazart ad wcen řɣiǧet nsen.
23 Iḥenjiren n Ṣihyun, sřiwřewem u farḥem di SIDI, AREBBI nwem, maɣar Netta ad awem iwc Amseɣɣar n tsegda u Netta ad dd-issehwa anẓar i kenniw, anẓar n řexrif d wenẓar n arbiɛ ɣar umezwaru n yimir.
24 Inedrar ad ccuren s imendi u tisarfin n uḍiř ad ssefyent s binu n jdid d zzect.
25 Necc ad awem xeřfeɣ iseggʷusa i ccint tmurɣi - bu-weřsaḥ d bu-uṣarḍ d bu-weqḍeɛ - řɛeskar inu ameqqran nni ssekkeɣ jar awem.
26 Kenniw ad teccem ař ɣa tfeyyḍem, ař ɣa tejjawnem u kenniw ad tṣebbḥem Isem n SIDI, AREBBI nwem, wenni akidwem iggin řeɛjeb, uca řgens inu ɛemmarṣ ad iseḍḥa ɛad.
27 Kenniw ad tessnem aqa Necc di řwest n Israil i ǧiɣ u d Necc d SIDI, AREBBI nwem, war din iǧi ḥed nneɣni u řgens inu war ittseḍḥa ɛemmarṣ i řebda.”