1 Awař n SIDI yusa-dd ɣar Yunus, mmis n Amittay, inna: 2 “Kkar, ruḥ ɣar tendint n Ninwa tameqqrant uca barreḥ ḍidd nnes minzi tuɛeffna nsen tgeɛɛed am ict n arriḥet yarṣuden ař udem inu.” ◘ 3 Maca Yunus ikkar ḥima ad yarweř zeg wudem n SIDI. Netta ihwa ɣar tendint n Yafa uca yufa din ict n tɣarrabut ad traḥ ɣar tendint n Tarcic. Netta ixeǧeṣ ttaman n usafar uca inya dayes maḥend ad iraḥ ɣar Tarcic, ixs ad iggʷej x wudem n SIDI. 4 Maca SIDI issekk-dd asemmiḍ ijhed x řebḥar uca yarni idweř d taḥaryaḍt tameqqrant x řebḥar ařami ɛřaḥař tiweḍ ad tarẓ tɣarrabut. 5 Ggʷeden ibeḥriyyen uca kuř aryaz isɣuy, ittar ɣar arebbi nnes uca nḍaren řeqcuɛ nni di tɣarrabut ɣar řebḥar ḥima ad xas ssneqṣen ddqeř. Tuɣa ihwa-dd Yunus maca ɣar uɣezdis aḍeffar n tɣarrabut, izzeř din uca iṭṭeṣ ijj n yiḍeṣ yuǧeɣ. 6 Yusa-dd ɣares bab n tɣarrabut, inna as: “Min tᵉttegged, mayemmi dinni tᵉṭṭṣed? Kkar, řaɣa x AREBBI nnec, ad taɣ AREBBI nnec ad aneɣ ifekkar ḥima war nɣarreq ca.” 7 Nnan yeryazen i wayawya: “As-dd, ejj aneɣ ad nḍar taqedduḥt, ḥima ad nessen wi d aneɣ iggin di nnɛi-ya.” Nitni nḍaren taqedduḥt uca tusa-dd tqedduḥt deg Yunus.

8 Xenni nnan as: “Ini aneɣ, mayemmi d aneɣ teḥkem nnɛi-ya. Min teɛna řxedmet nnec? Manis dd-tusid? Min teɛna tammurt nnec u zi man řgens i ɣar teqqned?” 9 Inna asen: “Necc d Aɛibrani uca ggʷedeɣ zi SIDI, AREBBI n ijenwan, wenni dd-ixeřqen řebḥar d řbar.” 10 Iryazen nni ggʷeden aṭṭas, nnan as: “Min teggid?” Minzi tuɣa ssnen, netta yarweř-dd zeg wudem n SIDI, aqa tuɣa zeɛma issxebbar i-ten. 11 Uca nnan as: “Min zzayek i ɣa negg, ḥima ad xaneɣ ihedden řebḥar?” Minzi řebḥar tuɣa ɛad yarenni deg uhaji. 12 Inna asen: “Ksim ayi u nḍarem ayi di řebḥar ḥima ad xawem ihedden řebḥar, minzi ssneɣ aqa taḥaryaḍt-a tameqqrant i xawem dd-iwḍan di ssibbet inu.” 13 Maca iryazen tuɣa qeddfen ɣar řbar, maca war d as zemmaren ca, minzi řebḥar tuɣa ɛad yarenni xasen aṭṭas s waṭṭas deg uhaji. 14 Xenni řaɣan i SIDI, nnan: “A SIDI, war d aneɣ ttejji ca ad nettwahellek di ssibbet n řeɛmar n weryaz-a uca war d aneɣ tḥessibed x idammen imezdagen, minzi Cek, a SIDI, teggid min d ac yarḍan.” 15 Xas uca ṭṭfen Yunus, nḍaren t di řebḥar. Řexdenni ibedd uhaji n řebḥar. 16 Ggʷden iryazen nni aṭṭas zi SIDI uca ɣarṣen ict n tɣarṣt i SIDI uca waɛden lwuɛud.