6
Jidɛun d Lmalak n SIDI
1 Maca ayt n Israil ggin min iǧan d aɛeffan di tiṭṭawin n SIDI uca isellem i-ten SIDI deg ufus n Midyan, ijj n řmijař n sebɛa n iseggʷusa.
2 Umi tuɣa afus n Midyan ijhed x Israil, ggin ayt n Israil i yixef nsen ifran deg idurar d ixerdusen d lqelɛat ḍidd i Midyan.
3 Awarni řami tuɣa zarrɛen ayt n Israil, ttgeɛɛed Midyan uca uřa d ayt n Ɛamaliq d ayt n ccarq ttgeɛɛden ḍidd nsen.
4 Nitni wtin iqiḍan nsen ḍidd nsen uca areddǧen řɣiǧet n temmurt ař jjwayeh n Ɣazza. Nitni war jjin di Israil i zi ɣa iddar bnadem, řa d uǧi, řa d afunas uřa d aɣyuř.
5 Maɣar nitni geɛɛden s tḥimriwin nsen d iqiḍan nsen uca usin-dd am yijj n weyřaf n tmurɣi. War izemmar ad ttwaḥesben ak-d iřeɣman nsen uca nitni udfen ɣar tammurt, ḥima ad tt areddǧen.
6 Ammu iẓřeḍ Israil aṭṭas zi ssibbet n Midyan. Uca xenni sɣuyen ayt n Israil ɣar SIDI.
7 Xmi sɣuyen ayt n Israil ɣar SIDI di ssibbet n Midyan, imsar,
8 aqa SIDI issekk-dd ijj n weryaz, ijj n unabi, ɣar ayt n Israil. Netta inna asen: “Ammu i iqqar SIDI, AREBBI n Israil: ‘Necc ssgeɛɛdeɣ kenniw zi Miṣra u ssuffɣeɣ-dd kenniw zi taddart n tesmuɣi.
9 Necc fekkeɣ-dd kenniw zeg ufus n Imiṣriyyen u zeg ufus n marra inni kenniw iḥṣaren. Necc uẓẓřeɣ xasen zzat i wudem nwem u wciɣ awem tammurt nsen.
10 Necc nniɣ awem: Necc d SIDI, AREBBI nwem, war ttɛebbdem irebbiten n Imuriyyen, inni di temmurt nsen tzeddɣem!’ Maca kenniw war tesřim ɣar tmijja inu.”
11 Xenni yusa-dd lmalak n SIDI uca iqqim sadu n tcejjura n yigg nni iǧan ɣar Ɛafra, tenni n Yuwac, Abiɛazari. Mmis Jidɛun tuɣa-t din issarwat irden di tsirt n uḍiř ḥima ad t issarweř ammu zzat i wudem n Midyan.
12 Řexdenni iban as-dd lmalak n SIDI, inna as: “SIDI akidek, a cek, bu-teɣruḍt imeḥḍen!”
13 Jidɛun inna as: “A, Sidi inu, mařa SIDI aqa-t akidneɣ, mayemmi i d aneɣ iřqef xenni marra uya u mani ǧan marra řeɛjayeb i x d aneɣ ssiwřen řejdud nneɣ, umi nitni nnan: ‘Ma war d aneɣ-dd issuffeɣ SIDI zi Miṣra?’ Maca řexxu inḍar aneɣ SIDI, isellem aneɣ deg ifassen n Midyan.”
14 Rexdenni idweř-dd ɣares SIDI, inna: “Uyur di jjehd nnec wanita uca ad tfekked Israil zeg ufus n Midyan. Ma Necc war cek-dd ssekkeɣ?”
15 Maca netta yarra-dd xas: “A Sidi inu, s minzi i ɣa fekkeɣ Israil? Xzar řwacun inu d tamezřuḍt qaɛ di Manassa u necc d amudrus qaɛ di taddart n baba.”
16 Inna as SIDI: “Minzi Necc ad iřiɣ akidek, ad tɣeřbed Midyan, axmi d ijj n weryaz waha.”
17 Xenni inna as netta: “Mařa xenni ufiɣ arḍa di tiṭṭawin nnec, xenni iwca ayi ict n řeɛřamet, aqa d Cek simant nnec i kidi issawařen.
18 War ssa ttraḥ ca, ař ɣarek dd ɣa ɛeqbeɣ ad tiři iwyeɣ-dd tewhibt inu u ad tt-i-dd-ssarseɣ zzatek.” Netta inna: “Ad qqimeɣ ař dd ɣa tɛeqbed.”
19 Uca yudef Jidɛun, issewjed ijj n iɣayḍ d ameẓyan zeg iɣayḍen d iɣrumen břa aɣrum zeg yijj n ifa n waren. Netta issars aysum di tṣuǧet, igga arrwa deg ict n teydurt uca yiwi man aya ɣares ɣar barra sadu tcejjart n yigg uca issars as man aya.
20 Maca inna as lmalak n AREBBI: “Ksi aysum d iɣrumen břa antun u tessarsed ten da x teṣḍart uca zeǧeɛ xas arrwa!” Uca ammu i t igga.
21 Xas uca isarreḥ lmalak n SIDI tixeft n teɣɣarct i tuɣa ɣares deg ufus, iḥada zzayes aysum d iɣrumen břa antun. Řexdenni tgeɛɛed tmessi zi teṣḍart, tecca aysum d iɣrumen. Xenni innufseř lmalak n SIDI x tiṭṭawin n Jidɛun.
22 Umi Jidɛun iẓra, aqa tuɣa-t d lmalak n SIDI, inna Jidɛun: “A, Sidi inu, SIDI, aqa necc ẓriɣ lmalak n SIDI aɣembub deg uɣembub.”
23 Maca SIDI yarra-dd xas: “Ad kidek yiři řehna, war tteggʷed ca, cek war ttmettid.”
24 Uca Jidɛun ibna dinni ijj n uɛalṭar i SIDI, igga as: “SIDI d řehna!” Aqa-t di Ɛafra n ayt n Abiɛazari ař ass-a.
25 Di ǧiřet nni simant nnes, imsar aqa SIDI inna as: “Ksi ijj n ufunas ameẓyan zeg ifunasen i iǧan n babac, aqa afunas ameẓyan wiss tnayen n sebɛa n iseggʷusa uca ɣḍeř aɛalṭar n Baɛl i iǧan n babac u zdem tarebbit n cwarti nni zzates!
26 Bna xenni ijj n uɛalṭar i SIDI, AREBBI nnec, x tqiccat n lqelɛa-ya, sewjed i-t, uca ksi afunas ameẓyan wiss tnayen uca awyi t-i-dd d tɣarṣt n wecmaḍ s ukeccuḍ n trebbit n cwarti nni ittxeṣṣa ad tzedmed.”
27 Xenni iksi Jidɛun ɛecra n yeryazen zeg imsexxaren nnes uca igga am mammec d as inna SIDI. Maca umi netta iggʷed zi řwacun n taddart n babas u zeg yeryazen n tendint ad t igg s wass, igga i-t di ǧiřet.
28 Umi dd-kkaren yeryazen n tendint tiwecca zic, ẓrin nitni aqa aɛalṭar n Baɛl ittwahdem uca tᵉttwazdem trebbit n cwarti nni zzates u afunas ameẓyan wiss tnayen ittwabexxar x uɛalṭar i din ittwabnan.
29 Uca nnan i wayawya: “Man wen iggin aya?” Nitni sseqsan, arzun uca nnan: “Jidɛun, mmis n Yuwac, i-t iggin.”
30 Xenni nnan yeryazen n tendint i Yuwac: “Sufeɣ-dd mmic ḥima ad immet, minzi netta iɣḍer aɛalṭar n Baɛl u minzi netta izdem tarebbit n cwarti i zzates iǧan.”
31 Yuwac yarra-dd x marra inni i dd ɣares ibedden: “Ma texsem ad tmenɣem i Baɛl? Ma texsem ad t tessnejmem? Wenni akides i ɣa ibedden, ad ittwaneɣ di ṣṣbeḥ-a wanita. Mařa netta d ijj n arebbi, ejj i-t ad immneɣ i yixef nnes nnit, minzi ɣeḍřen aɛalṭar nnes.”
32 Deg wass nni iřaɣa as-dd i Jidɛun Yarubbaɛl, min ixs ad yini: “Baɛl immneɣ akides, maɣar netta iɣḍeř aɛalṭar nnes.”
33 Marra Midyan d Ɛamaliq d ayt n ccarq munen uca ẓwan-dd L’Urdun uca wtin iqiḍan nsen di řewḍa n teɣzurt n Yazraɛil.
34 Arruḥ n SIDI issyarḍ i Jidɛun uca netta isuḍ deg uyicc n icarri uca iřaɣa-dd x ayt n Abiɛazar maḥend ad bedden awarni as.
35 Issekk ireqqasen di marra Manassa uca ittwařaɣa Manassa maḥend ad bedden nitni awarni as. Xenni issekk ireqqasen ɣar Acir u ɣar Zabulun u ɣar Naftali uca nitni geɛɛden maḥend ad ten mmeřqan.
36 Xas uca inna Jidɛun i AREBBI: “Mařa Cek texsed s tidett ad tfekked Israil s ufus inu am mammec i d ayi tennid,
37 xzar, xenni necc ad ssarseɣ tahiḍurt n taḍuft x unedrar. Mařa iwḍa nnda mɣir x taḍuft waha, maca tammurt marra teqqim tuẓeɣ, xenni ssneɣ necc, aqa Cek ad tessnejmed Israil s ufus inu, am mammec i d ayi tennid.”
38 U ammu i temsar. Tiwecca nnes ikkar zic uca izři tahiḍurt uca iẓemm-dd nnda zi thiḍurt, ict n ṭṭawya teccur s waman.
39 Xas uca inna Jidɛun i AREBBI: “Ttzawgeɣ war xafi yareqq weɣḍab nnec mařa necc ssiwřeɣ ict n twařa nneɣnit. Ejj ayi ad qeǧbeɣ s thiḍurt ɛad ict n twařa nneɣni waha, uca ad teqqim thiḍurt tuẓeɣ u x marra tammurt ad din yiři nnda.”
40 Uca di ǧiřet nni igga i-t SIDI ammu: tahiḍurt waha i iqqimen tuẓeɣ u tuɣa nnda x marra tammurt.