3
Israil jar řegnus - Řquḍat
1 Ina d řegnus i ijja SIDI ad areyyḥen, ḥima ad zzaysen iqeǧeb Israil, ixs ad yini marra inni war issinen ca ɛad x marra garrat ak-d Kenɛan,
2 mɣir ḥima ad dewřen jjiřat n ayt n Israil ad ssnen amenɣi, ḥima ad řemden ad mmenɣen, mɣir inni war issinen ca amenɣi:
3 xemsa n řbacat n tneddam n ayt n Ifilisṭiniyyen d marra ayt n Kenɛan d Iṣiduniyyen d Iḥiwiyyen i izeddɣen x idurar n Lubnan, zeg wedrar n Baɛl-Hirmun ař mani ɣa tiwḍed ɣar Ḥamat.
4 Nitni tuɣa aten din ḥima ad zzaysen ittwaqeǧeb Israil, ḥima ad yiři ittwassnen ma nitni ad sřen i tweṣṣa n SIDI, tinni yumur Netta i řejdud nsen s tsexxart n Musa.
5 Ayt n Israil tuɣa zeddɣen di řwesṭ n ayt n Kenɛan: Iḥittiyyen d Imuriyyen d Ifiriziyyen d Iḥiwiyyen d Iyabusiyyen.
6 Nitni iwyen yessitsen d temɣarin nsen i yixef nsen u tiḥenjirin nsen wcin tent i iḥenjiren nsen uca nitni bdan ad sexxaren i irebbiten nsen. *
7 Uca ggin ayt n Israil min iǧan d aɛeffan di tiṭṭawin n SIDI, ttun SIDI, AREBBI nsen, uca uyuren ad sexxaren i ‘Ibaɛlen’ d tirebbin nsen n cwarti.
8 Xenni yarɣa weɣḍab n SIDI x Israil u Netta iwca i-ten deg ufus n Kucan-Ricaɛtayim, ajeǧid n Aram-Nahrayn, aqa-tt d Misuputamya. Xenni sexxaren ayt n Israil tmenya n iseggʷusa i Kucan-Ricaɛtayim.
9 Sɣuyyen ayt n Israil ɣar SIDI uca SIDI igga ad ikkar ijj n umsenjem i ayt n Israil, wenni i ten ifekken, Ɛutniyil, mmis n Qanaz, umas n Kalib, wenni d ameẓyan xas.
10 Tuɣa xas Arruḥ n SIDI u tuɣa d řqaḍi x Israil uca iffeɣ ɣar umenɣi. Iwca as SIDI Kucan-Ricaɛtayim, ajeǧid n Aram, deg ufus nnes uca iɣřeb netta x Kucan-Ricaɛtayim.
11 Tareyyeḥ temmurt arebɛin n iseggʷusa. Xenni immut Ɛutniyil, mmis n Qanaz.
12 Ayt n Israil arnin ad ggen min iǧan d aɛeffan di tiṭṭawin n SIDI. Uca SIDI igga jjehd di Ɛijlun, ajeǧid n Mu’ab, ḍidd i Israil, minzi nitni ggin min iǧan d aɛeffan di tiṭṭawin n SIDI.
13 Netta issmun ɣares ayt n Ɛammun u n Ɛamaliq uca iffeɣ, iɣřeb x Israil uca nitni ṭṭfen Tandint n Tcejjura n Tini.
14 Tmenṭac n iseggʷusa tuɣa ayt n Israil ttsexxaren i Ɛijlun, ajeǧid n Mu’ab.
15 Xenni sɣuyen ayt n Israil ɣar SIDI uca SIDI igga ad dd-ikkar ijj n umsenjem, Ihud, mmis n Jira, zi teqbič n Binyamin, ijj n weryaz i war ittwadarreb mliḥ s ufusi nnes afusi. Uca ayt n Israil ssekken t ḥima ad wcen ict n terzeft i Ɛijlun, ajeǧid n Mu’ab, s ufus nnes.
16 Ihud igga i yixef nnes ijj n ssif ɣares tnayen n řeqduɛ, tuzzeggart nnes anect n ijj n uɣiř, iqqen i-t sadu warruḍ nnes ɣar tmeṣṣaḍt nnes tafusect.
17 Ammu i dd-iqarreb s terzeft ɣar Ɛijlun, ajeǧid n ayt n Mu’ab, Ɛijlun tuɣa d aryaz iṣeḥḥ aṭṭas.
18 Umi tuɣa Ihud ikemmeř timewca n tarzeft, imsar, aqa issqebbeḍ iwdan i tuɣa yarebbun tarzeft ɣar řaggʷaj,
19 maca netta simant nnes iɛqeb awarni man aya zi řexyař ineqcen i din iǧan di Jiljal, inna: “Necc ɣari ijj n ssir xak, ajeǧid!” Uca wa inna: “Sqarem!” Marra wi tuɣa ibedden ɣares, ffɣen zi ɣares ɣar barra.
20 Yusa-dd ɣares Ihud umi Ɛijlun iqqim deg wexxam n nnej asemmaḍ, wenni tuɣa i netta waha. Xenni inna Ihud: “Necc ɣari ijj n wawař n AREBBI i cek.” Uca ikkar ujeǧid zi řkursi nnes igellden.
21 Xenni isswiẓẓeḍ Ihud s ufus nnes azeřmaḍ, ijbed-dd ssif nni x tmeṣṣaḍt nnes tafusect, icukk i-t deg uɛeddis nnes,
22 ařami yudef s ufus nni awarni i řmus n ssif uca tadunt tbelleɛ-dd x řmus, maɣar netta war ikkis ssif zeg uɛeddis nnes. Xas uca iffeɣ s webrid n wexxam n yiḍeṣ.
23 Xenni iffeɣ Ihud zeg wuffuɣ n wexxam n wesqif. Ibelleɛ tiwwura n wexxam n nnej awarni as u yarra zzekrun.
24 Umi yuyur netta, usin-dd imsexxaren nnes uca umi ẓrin aqa tiwwura n wexxam n nnej ttwabellɛent s zzekrun, nnan: “Netta aqa idřa waha iḍaren nnes deg wexxam asemmaḍ n daxeř.”
25 Nitni qqimen ttrajan ařami dewřen sseṣḥan, u xzar, netta war yarzim ca tiwwura n wexxam n nnej. Nitni ksin ssarut, arzmen tawwart, uca xzar, immenḍar siditsen ɣar temmurt immut.
26 Ihud maca tuɣa yarweř, am tuɣa ttrajan nitni. Netta tuɣa ikka x řexyař ineqcen uca yarweř ɣar Siɛirat.
27 Řami dd-yiweḍ netta dinni, isuḍ deg uyicc n icarri x idurar n Ifrayim. Xenni hwan ayt n Israil akides zeg wedrar u netta simant nnes yuyur zzat i wudem nsen.
28 Netta inna asen: “Ḍfarem ayi-dd, minzi SIDI iwca awem řɛedyan nwem, ayt n Mu’ab, deg ufus nwem.” Uca nitni ḍfaren t uca ṭṭfen imucan n uẓekkwu n L’Urdun ɣar Mu’ab uca war jjin uřa d ijj ad iẓwa.
29 Di řweqt nni wtin nitni ayt n Mu’ab, ɛřaḥař tenɛac-ařef n yeryazen, marra nitni jehden, iɛeskariyyen, uřa d ijj n weryaz war injim.
30 Ammu ittwassdeǧ Mu’ab deg wass nni sadu ufus n Israil uca tareyyeḥ temmurt tmenyin n iseggʷusa.
31 Awarni as yusa-dd Camjar, mmis n Ɛanat, wenni inɣin setta-mya n yeryazen zeg Ifilisṭiniyyen s yijj n řmacam n ifunasen. Ammu issenjem uřa d netta Israil.