18
Taqbič n Dan teṭṭef Layic d tasɣart nnes
1 Deg wussan nni war din tuɣi ajeǧid di Israil u deg wussan nni tuɣa taqbič n Dan tarezzu tasɣart i yixef nnes maḥend ad dayes tezdeɣ, minzi war d as dd-tekkar ɛad tesɣart jar tqebbař n Israil.
2 Ssekken ayt n Dan zi řwacun nsen xemsa n yeryazen zi marra ṭṭrufa nsen, iryazen nni d ayt n umenɣi inni dd-yusin zi Ṣurɛa d Icta’ul, ḥima ad arzun řexbar x temmurt, ad dayes yarzun. Nitni nnan asen: “Uyurem, arzum tammurt!” Usin-dd ɣar idurar n Ifrayim ɣar taddart n Mixa uca ssensen dinni.
3 Umi iwḍen nitni ɣar taddart n Mixa, ɛeqřen x tmijja n webřiɣ zeg ayt n Lawi, uca ffɣen zeg webrid ɣares, nnan as: “Min cek i da dd-yiwyen u min i da tᵉttegged u min i da tarezzud cek?”
4 Netta yarra-dd xasen: “Ta d ta i igga Mixa akidi. Netta icra ayi u ammu i dewřeɣ necc d akehhan nnes.”
5 Nitni nnan as: “Seqsa aneɣ AREBBI, maḥend ad nessen, ma abrid i ɣa nuyur, ad yiři mliḥ.”
6 Yarra-dd xasen ukehhan: “Uyurem di řehna! Abrid i texsem ad t tekkem, aqa-t yarezmen zzat i tiṭṭawin n SIDI.”
7 Xenni ruḥen xemsa n yeryazen nni, iwḍen ɣar Layic. Nitni ẓrin aqa řgens izdeɣ dayes di řaman am mammec t tuɣa d lqaɛida ɣar ayt n Ṣidun, s řhudnet u di řaman. Tuɣa war din uřa d ijj di temmurt wenni iḥṣaren x yijjen di ca n řḥajjet niɣ iṭṭef ca s řexcunet. Nitni tuɣa iggʷejen aṭṭas x ayt n Ṣidun u war ɣarsen tuɣi walu uřa ak-d ijj n bnadem.
8 Uca usin-dd ɣar aytmatsen di Ṣurɛa d Icta’ul uca nnan asen aytmatsen: “Man awař i ɣarwem?”
9 Nitni arrin-dd xasen: “Kkarem, jjem ad ngeɛɛed, minzi neẓra tammurt, u xzar, aqa-tt tecna aṭṭas. Ma xenni texsem ad teqqimem tᵉttarsam ammu? War tteɛgizem ca maḥend ad tadfem ɣar temmurt ḥima ad tt tᵉṭṭfem d řwart.
10 Mařa kenniw ad tawḍem din, xenni ad tafem ijj n řgens izeddɣen di řaman uca tammurt tewseɛ aṭṭas ɣar tnayen n iɣezdisen, minzi AREBBI igga awem tt deg ufus nwem, aqa-t d ijj n wemcan mani war d as ittxeṣṣi walu n min iǧan x temmurt.”
11 Xas uca kksen iqiḍan nsen ssenni, zi řaǧ n Dan zi Ṣurɛa d Icta’ul, setta mya n yeryazen ḥezzmen s řesnaḥ.
12 Nitni geɛɛden uca wtin iqiḍan nsen ɣar Qaryat-Yaɛarim di Yahuda. X uya qqaren as i wemcan nni ‘Maxan-Dan’ ař ass-a. Xzar, aqa-tt awarni i Qaryat-Yaɛarim.
13 Ssenni ffɣen, ɛdun ɣar idurar n Ifrayim iwḍen ɣar taddart n Mixa.
14 Xenni ssiwřen xemsa n yeryazen, inni tuɣa igguren ḥima ad bergen tammurt n Layic, nnan i aytmatsen: “Ma tessnem, aqa di tudrin nni aqa din ijj n upalṭu n ukehhan d řexyařat timeẓyanin n l’aṣnam d ijj n řexyař ineqcen d ijj n řexyař ifesyen? Xenni řexxu, tessnem min xawem ad t teggem.”
15 Řexdenni ffɣen zeg webrid nsen, usin-dd ɣar taddart n webřiɣ, ɣar taddart n weryaz zeg ayt n Lawi, ɣar taddart n Mixa, uca sseqsan x mammec iǧa.
16 Setta-mya n yeryazen zeg ayt n Dan i iḥezzmen s řesnaḥ nsen, qqimen bedden ɣar wadaf n tewwart.
17 Xemsa n yeryazen, inni tuɣa iffɣen ḥima ad bergagen tammurt, geɛɛden, udfen u iwyen řexyař ineqcen d upalṭu n ukehhan d řexyařat timeẓyanin n l’aṣnam d řexyař ifesyen. Akehhan iqqim ibedd ɣar uqemmum n tewwart ak-d setta-mya n yeryazen iḥezzmen s řesnaḥ.
18 Xemsa ina udfen ɣar taddart n Mixa, kksen řexyař ineqcen d upalṭu n ukehhan d řexyařat timeẓyanin n l’aṣnam d řexyař ifesyen. Xenni inna asen ukehhan: “Min din tᵉtteggem?”
19 Nitni nnan as: “Susem, sars afus nnec x uqemmum nnec, uyur akidneɣ u dweř d baba d akehhan nneɣ! Min iḥřan, mařa cek d akehhan di taddart n ijj n weryaz waha niɣ mařa cek d akehhan i yict n teqbič d yijj n řaǧ di Israil?”
20 Řexdenni ifarḥ wuř n weryaz nni uca iksi apalṭu n ukehhan d řexyařat timeẓyanin n l’aṣnam d řexyař ineqcen uca yudef jar řgens.
21 Uca ɛeqben nitni, ffɣen uca nedhen iḥenjiren d řmař d ddquřat akidsen ɣar zzat.
22 Umi nitni tuɣa iggʷejen aṭṭas x taddart n Mixa, řaɣan-dd i yeryazen di tudrin yudsen x taddart n Mixa, ḥima ad munen uca nitni xeccen x ayt n Dan.
23 Nitni řaɣan awarni i ayt n Dan, maca ina nnqeřben azeǧif nsen, nnan i Mixa: “Min cek yuɣin? Mayemmi třaɣid ḥima ad ttwassmunen marra?”
24 Inna netta: “Kenniw tekksem xafi irebbiten inu i ggiɣ uřa d akehhan uca tuyurem. Min ɣari řexxu ɛad? Mammec teggim ɛad teqqarem ayi: ‘Min cek yuɣin?’ ”
25 Ayt n Dan nnan as: “Ɣarek ad nseř i tmijja nnec ɣarneɣ niɣ izemmar ad xawem wḍan iryazen yewɛaren u iři ad taɣ ad iweddar řeɛmar nnec uřa d řeɛmur n taddart nnec.”
26 Uca uyuren ayt n Dan deg webrid nsen uca umi iẓra Mixa belli nitni tuɣa jehden xas, inneqřeb, yareggʷeḥ ɣar taddart nnes.
27 Nitni maca iwyen min iggin Mixa uřa d akehhan wenni tuɣa ɣares ittsexxaren. Nitni iwḍen ɣar Layic, ɣar ijj n řgens izeddɣen di řhudnet d řaman uca nɣin ten s řeqḍeɛ n ssif u sscemḍen tandint s tmessi.
28 War din uřa d ijjen izemmar ad ifekk, minzi Layic tuɣa tiggʷwej aṭṭas x Ṣidun u war tuɣi ɣarsen walu uřa ak-d ijj n bnadem. Tuɣa-tt di řewḍa n teɣzurt nni ɣar Bayt-Raḥub. Awarni uya bnan tandint ɛawed uca zeddɣen dayes.
29 Nitni qqaren as i tendint ‘Dan’, x yisem n babatsen Dan, wenni dd-ittwarwen i Israil. Maca zic tandint tuɣa qqaren as Layic.
30 Ayt n Dan ssbedden řexyař ineqcen i yixef nsen. Uca Yahunatan, mmis n Jarcum, mmis n Musa, netta ak-d iḥenjiren nnes, tuɣa aten d ikehhanen n teqbič n Dan ař ass i di tᵉttwandeh temmurt ɣar lmenfa.
31 Nitni tuɣa ssbedden řexyař ineqcen n Mixa, tenni igga, zzat i yixef nsen marra ussan min tekka Taddart n AREBBI teǧa di Cilu.