6
Tamwarrit n Ayub x Ilifaz: Afeqqus nnes
1 Yarra-dd Ayub, inna:
2 A, mři weznen řhemm inu,
mři jjin ad igeɛɛed
x řmizan s tnayen n ṭṭawyat
uřa d řeɣben inu akides imun!
3 Maɣar řexxu aqa-t idqeř x yejdi n řebḥur,
x uya tteffɣen wawařen inu
nhřa axemmem.
4 Maɣar nnuɣent dayi fřitcat
n Umzemmar x kuřci,
ařami buḥbeř inu isess arrhaj nsent.
Inexřiɛen zi Arebbi kkaren-dd akidi.
5 Ma issḥundrut weɣyuř n řexřa
ɣar arbiɛ aziza?
Niɣ issmuhrut ufunas ɣar heddu nnes?
6 Macca břa aředdi
ma ad tt yecc bnadem břa tameǧaḥt?
Niɣ aqa din aředdi
di řmeḥḥ acemřař n tmeǧač?
7 Min yugi řeɛmar inu ad t iḥada,
řexxu aya marra i necc
am macca iɣummen.
8 Mři dd ɣa yas min ttareɣ
iwa, iwca Arebbi min sittimeɣ.
9 Mři tuɣa ixs SIDI maḥend ad ayi iřbez,
maḥend ad issarxu afus nnes
u maḥend ad ayi iqess.
10 Man aya ad ayi yiři ɛad d afewwej,
ad ayi inɛec di řeḥriq nni
war xafi issɛizzi ca,
maɣar war nkareɣ ca
awařen n Umqeddas.
11 Min iɛna jjehd inu,
aqa zemmareɣ ad rajiɣ ɛad?
Niɣ min iɛna uneggaru inu,
wenni x ttexseɣ
ad zzugarteɣ tudart inu ɛad?
12 Ma jjehd inu am jjehd n iẓra?
Ma aysum inu am nnḥas?
13 Ma war ǧiɣ qaɛ břa twiza s yixef inu,
ma war xafi ittwakkes ufekki qaɛ?
14 Wenni umi iqḍeɛ řayas ittxeṣṣa as
tamexsiwt icuwwaren
zeg umeddukkeř nnes,
mařa lla, izemmar ad yejj tiggʷudi
zeg Umzemmar x kuřci.
15 Aytma banen-dd d iɣeddaren
am tɣezrin deg idurar,
am tassut n tɣezrin nni iɛeddun deɣya,
16 am tiɣezrin tinni ittbarrecnen s wejris,
nni di issnuffar wedfeř ixef nnes.
17 Deg wussan nni di dewřent
ḥṣarent, beddent,
xmi ḥemmant, ttaẓɣent,
imḥa wemcan nsent.
18 Ibriden n tecři nsen farɣen,
geɛɛden di řeɛwin uca weddaren.
19 Imsebriden zi Tayma
qqimen ttmeẓrin daysent,
ikaravanen zi Caba ttrajan tent.
20 Nitni ttwacemten
deg utecři nni ɣarsen.
Usin-dd ɣar tɣezrin deg idurar
uca barrqen.
21 S tidett, řexxu tdewřem d walu,
teẓrim arẓiyyet inu uca tᵉggʷedem.
22 Ma nniɣ: ‘Awyem ayi-dd ca!’
niɣ: ‘Wcem ayi tirzifin zeg wagřa nwem!’
23 niɣ: ‘Fekk ayi zeg ufus n wenni iḥeṣṣaren!’
niɣ: ‘Fdi ayi zeg ufus n ayt n bu-řexcunet!’
24 Sɣar ayi, xenni ad sseɣdeɣ,
scen ayi min di weddareɣ!
25 Mammec jehhden wawařen yecnan,
maca min xef awebbex nwem?
26 Ma tᵉttxarrṣem deg wawařen,
maḥend ad ayi tᵉttwebbxem zzaysen?
Ma xenni awařen
n wenni umi qeḍɛen řayas
am řeɛwin i kenniw?
27 Ɛad x yijj n unibu ayujiř
ad xas tenḍarem taqedduḥt
u ɛad x yijj n umeddukkeř nwem
ad xas teggem tameɛmuč.
28 Xenni řexxu, mařa texsem,
ḥḍam xafi mliḥ,
necc war xawem ssxarriqeɣ
deg uɣembub nwem.
29 Qeǧbem ayi,
war iɛeddeř ad dayi yiři ddeǧ.
Qeǧbem ayi ɛawed,
tasegda inu tbedd ɛad nican.
30 Ma aqa din řɣecc x yiřes inu?
Ma war ittředdi waneɣ inu
x min war iḥřin?