14
Ayub issiweř ak-d Ṣufar x řmewt
1 Bnadem i dd-ittwaxeřqen
zi temɣart,
aqa ussan n tudart nnes udrusen
u netta iccur s řeḥweř.
2 Netta iɣemmi am tnewwact,
xenni ittwaqḍeɛ.
Ittrakkwař am tiři, war ittɣimi.
3 Waxxa amenni tarezmed
tiwa nnes tiṭṭawin nnec,
tᵉttawyed ayi-dd di ddeɛwet akidek.
4 Man wen izemmaren ad issuffeɣ
ijj n umezdag zeg umexmuj?
Uřa d ijj!
5 Mara ussan nnes urin,
řqedd n iyuren nnes aqa ittwassen ɣarek
uca teggid as řeḥdud nnes
nni war d as iɛeddeř ad ten iɛdu,
6 neqřeb xenni xas maḥend ad yareyyeḥ,
ařami izemmar ad yarr meẓri
am yijj n ucewwař deg wass nnes.
7 Maɣar i tcejjart aqa din ɛad řayas!
Mařa tᵉttwaqess,
ad tessuffeɣ ɛawed řefruɛ,
řefruɛ nnes war ttbeddin zeg uɣemmi.
8 Waxxa iwsar weẓwar nnes di temmurt,
immut jjdeɛ nnes deg ucař,
9 ad teɣmi tcejjart ɛawed
xmi ɣa taca ak-d waman,
ad tessuffeɣ ɛawed řefruɛ
am ict n tcejjart ẓẓun tt beḥřa.
10 Maca mařa immut ijj n weryaz, ifenna,
mařa iffeɣ as buḥbeř i bnadem,
mani iǧa xenni?
11 Aman tteffɣen-dd zi řebḥar,
iɣzar ittaẓeɣ u ixekkwa.
12 Izzeř bnadem din, war ittekkar ɛad.
Ař war ttiřin ɛad ijenwan, war d ttfiqin,
war ttwassekkaren zeg iḍeṣ nsen.
13 Ax, mři d ayi ɣa tarred ɣar řaxart,
ad ayi tessnuffared
ař ɣa iḥeyyed weɣḍab nnec,
mři d ayi turid ijj n řmijař imten,
ḥima ad ayi tidared ɛawed!
14 Mařa ijj n weryaz immut,
ma ad dd-idweř ɣar tudart?
Xenni ad qqimeɣ ttrajiɣ
marra ussan n umenɣi inu,
ař dd-yusa ufekki inu.
15 Mařa xenni Cek třaɣid,
necc ad Cek dd-arreɣ
uca Cek ad temmeẓřed
ɣar řxedmet n ifassen nnec.
16 Maca řexxu tḥessbed iṣuraf inu,
war tmennɛed lɣaḍab nnec x ddnub inu.
17 Axeṭṭu inu ittwacemmeɛ di tcemmust,
ɣar řmuɛṣiyyet inu tarnid dayes ktar.
18 Wah, adrar iweṭṭan, ifessi,
jarf iḥruǧed zeg wemcan nnes,
19 aman tteddzen iẓra,
iɣezran nnes ttekksen acař n temmurt,
ammu i tareddǧed řayas n bnadem.
20 Cek tarennid dayes i řebda, xenni yuyur.
Tᵉttbeddařed udem nnes
uca tessekked i-t.
21 Mařa iḥenjiren nnes ṭṭfen ccan,
netta war t issin,
mařa ten deǧen,
war kidsen ittici.
22 Maca arrimet nnes tᵉttnezbar
di ṭṭweɛ n yixef nnes waha,
u řeɛmar nnes ittecḍin
di ṭṭweɛ nnes.